លោកស្រី ជា រដ្ឋា ក្នុងសន្និសីទសារព័ត៌មានស្តីពី«ការរៀបចំវេទិកាពាណិជ្ជកម្មឌីជីថលកម្ពុជា និងពិព័រណ៍អនឡាញ» លើកទី២។ សហការី
កម្ពុជាកំពុងបំផុស និងលើកទឹកចិត្តប្រជាពលរដ្ឋឱ្យចូលរួមប្រើប្រាស់វិធីសាស្រ្តនៃការធ្វើពាណិជ្ជកម្មតាមប្រព័ន្ធឌីជីថលកាន់តែច្រើន និងមានសុវត្ថិភាពជាងមុន តាមរយៈការរៀបចំវេទិកាពាណិជ្ជកម្មឌីជីថលកម្ពុជា និងពិព័រណ៍អនឡាញ។
ក្រសួងពាណិជ្ជកម្ម គ្រោងនឹងរៀបចំ«វេទិកាពាណិជ្ជកម្មឌីជីថលកម្ពុជា និងពិព័រណ៍អនឡាញ» លើកទី២ នៅថ្ងៃទី១២-១៣ ខែកញ្ញា ឆ្នាំ២០២៥ នាមជ្ឈមណ្ឌលសន្និបាត និងពិព័រណ៍កោះពេជ្រ។
ក្នុងសន្និសីទសារព័ត៌មានស្តីពី«ការរៀបចំវេទិកាពាណិជ្ជកម្មឌីជីថលកម្ពុជា និងពិព័រណ៍អនឡាញ» លើកទី២ កាលពីរសៀលថ្ងៃទី១៧ ខែមិថុនា ឆ្នាំ២០២៥ លោកស្រី ជា រដ្ឋា រដ្ឋលេខាធិការក្រសួងពាណិជ្ជកម្ម បានប្រាប់ថា ដើម្បីជំរុញសកម្មភាពនៃការធ្វើពាណិជ្ជកម្ម និងការផ្សព្វផ្សាយផលិតផលនៅតាមប្រព័ន្ធឌីជីថលនៅកម្ពុជា ឱ្យកាន់តែមានភាពរស់រវើក និងមានសុវត្ថិភាព ក្រសួងពាណិជ្ជកម្មនឹងរៀបចំ«វេទិកាពាណិជ្ជកម្មឌីជីថលកម្ពុជា និងពិព័រណ៍អនឡាញ» លើកទី២ នៅខែកញ្ញាខាងមុខ បន្ទាប់ពីទទួលបានជោគជ័យក្នុងការរៀបចំលើកទី១ កាលពីចុងឆ្នាំ២០២៤។
លោកស្រីបន្តថា វេទិកាពាណិជ្ជកម្មឌីជីថល ពិតជាមានសារៈសំខាន់ក្នុងការជួយលើកកម្ពស់សមត្ថភាពនៃការផ្សព្វផ្សាយ ជំរុញការលក់ ព្រមទាំងអាចជួយពង្រឹងកិច្ចសហប្រតិបត្តិការរវាងក្រុមហ៊ុនក្នុងស្រុក-ក្នុងស្រុក និងក្រុមហ៊ុនបរទេស។ វេទិកានេះក៏នឹងជួយពង្រីកទីផ្សារនាំចេញទំនិញកម្ពុជាទៅទីផ្សារអន្តរជាតិឱ្យកាន់តែច្រើនជាងមុន។
លោកស្រីបានបន្ថែមថា ការជំរុញ និងលើកកម្ពស់ប្រតិបត្តិការទិញ-លក់ទំនិញតាមប្រព័ន្ធឌីជីថល ក៏ស្របគ្នានឹងអនុសាសន៍របស់លោកនាយករដ្ឋមន្ត្រី ហ៊ុន ម៉ាណែត ដែលថ្លែងថា«ពង្រឹងទីផ្សារចាស់ និងពង្រីកទីផ្សារថ្មី»។ បច្ចុប្បន្នក្រសួងពាណិជ្ជកម្ម ក៏បានដាក់ឱ្យដំណើរការគេហទំព័រ https://cambodiatrade.com/ ដែលមានដាក់តាំងលក់ផលិតផលក្នុងស្រុកជាច្រើន។
ទាក់ទងនឹងសកម្មភាពនៃប្រតិបត្តិការអាជីវកម្មតាមឌីជីថលនៅកម្ពុជា គឺគេសង្កេតឃើញមានការវិវវឌ្ឍគួរឱ្យកត់សម្គាល់នារយៈពេល ៤-៥ ឆ្នាំចុងក្រោយនេះ។
លោកស្រី រដ្ឋា បានលើកឡើងថា ការមកដល់នៃបដិវត្តន៍ឧស្សាហកម្ម ៤.០ បានជំរុញឱ្យកម្ពុជាបង្កើតច្បាប់ស្តីពី ពាណិជ្ជកម្មតាមអេឡិចត្រូនិក នៅក្នុងឆ្នាំ ២០១៩ ហើយនៅឆ្នាំ ២០២០ កម្ពុជាបានដាក់ចេញនូវយុទ្ធសាស្ត្រពាណិជ្ជកម្មអេឡិចត្រូនិកជាលើកដំបូងដោយផ្តោតលើអាជីវកម្មធុនតូច និងមធ្យម(SME)។ បច្ចុប្បន្នកម្ពុជាក៏កំពុងរៀបចំសេចក្តីព្រាងយុទ្ធសាស្ត្រពាណិជ្ជកម្មឌីជីថល ២០២៥-២០៣០ ផងដែរ។
លោកស្រីបញ្ជាក់ថា តាមរយៈ«វេទិកាពាណិជ្ជកម្មឌីជីថលកម្ពុជា និងពិព័រណ៍អនឡាញ» ក្រសួងពាណិជ្ជកម្មរំពឹងថានឹងសម្រេចបានគោលដៅមួយចំនួនដូចជា ជំរុញសកម្មភាពធ្វើពាណិជ្ជកម្មតាមឌីជីថល, ការចាប់ដៃគូសហការរវាងម្ចាស់អាជីវកម្ម និងការយល់ដឹងកាន់តែច្រើនពីភាពវិជ្ជមាននៃការធ្វើពាណិជ្ជកម្មតាមឌីជីថល ក៏ដូចជាបញ្ហាសុវត្ថិភាពនៃការធ្វើពាណិជ្ជកម្មតាមប្រព័ន្ធឌីជីថល ជាដើម។
បើតាមលោកស្រីរដ្ឋលេខាធិការ ក្នុងវេទិកាខាងលើក៏នឹងមានការធ្វើបទបង្ហាញពីអ្នកជំនាញលើផ្នែកបញ្ញាសិប្បនិម្មិត ពាណិជ្ជកម្មឌីជីថល ព្រមទាំងការជជែកដេញដោលរបស់ក្រុមយុវជនផងដែរ។
យោងតាមក្រសួងពាណិជ្ជកម្ម ក្នុងឆ្នាំ២០២៤ ការធ្វើពាណិជ្ជកម្មតាមប្រព័ន្ធឌីជីថលនៅកម្ពុជា(ក្នុងស្រុក និងឆ្លងដែន) មានទឹកប្រាក់ប្រមាណ ១,៥១ ពាន់លានដុល្លារ កើនពី ១,២៨ ពាន់លានដុល្លារក្នុងឆ្នាំ ២០២៣។ ក្នុងឆ្នាំ២០២៥ នេះត្រូវបានព្យាករណ៍ថានឹងកើនដល់ ១,៧៨ពាន់លានដុល្លារ។ ចំនួននេះ គឺនៅមានកម្រិតទាបនៅឡើយបើធៀបទៅទឹកប្រាក់សរុបក្នុងតំបន់អាស៊ាន ដែលមានប្រមាណ ១១៦ ពាន់លានដុល្លារ ក្នុងឆ្នាំ២០២៤ និងរំពឹងកើនដល់ ១៣៧ ពាន់លានដុល្លារ ក្នុងឆ្នាំ២០២៥ នេះ៕
