ទិដ្ឋភាពនៅរោងចក្រដំឡើងរថយន្ត FORD នៅខេត្តពោធិ៍សាត់។ STPM
ទុនវិនិយោគក្នុងវិស័យយានយន្តកម្ពុជា គិតត្រឹមឆ្នាំ ២០២៤ មានប្រមាណ ៧៤៦ លានដុល្លារ ខណៈការនាំចេញមានទឹកប្រាក់ជាង ១,១ ពាន់លានដុល្លារ ដែលភាគច្រើនបានមកពីការនាំចេញផលិតសំបកកង់រថយន្ត។ នេះបើតាមលោក ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា(CDC)។
ក្នុងកិច្ចប្រជុំលើកទី២ នៃគណៈកម្មាធិការប្រតិបត្តិដឹកនាំការអនុវត្តផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកកម្ពុជា ដែលរៀបចំនៅទីស្តីការក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី១៧ ខែមិថុនា ឆ្នាំ២០២៥ លោក ស៊ុន ចាន់ថុល បានលើកឡើងថា វិស័យយានយន្តកម្ពុជាកំពុងបង្ហាញពីវឌ្ឍនភាពដ៏គួរឱ្យកត់សម្គាល់។ កិច្ចប្រជុំនេះ គឺពិតជាមានសារៈសំខាន់ណាស់ក្នុងការពិនិត្យ និងពិភាក្សាលើសេចក្ដីព្រាងរបាយការណ៍វាយតម្លៃលើការអនុវត្តផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកកម្ពុជា ក្នុងឆ្នាំ២០២៣-២០២៤ មុននឹងដាក់ឆ្លងគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ នាពេលខាងមុខ។
លោកបន្តថា បច្ចុប្បន្នកម្ពុជាកំពុងខិតខំធ្វើបុរេសកម្មក្នុងចក្ខុវិស័យដើម្បីប្រែក្លាយខ្លួនទៅជា «មជ្ឈមណ្ឌលប្រមូលផ្ដុំសកម្មភាពផលិតគ្រឿងបង្គុំយានយន្ត និងបរិក្ខារអេឡិចត្រូនិក សម្រាប់នាំចេញទៅទីផ្សារក្នុងតំបន់ និងពិភពលោក» ចាប់តាំងពីការដាក់ចេញផែនទីបង្ហាញផ្លូវនេះនៅចុងឆ្នាំ២០២២ រហូតទទួលបាន«សេចក្ដីព្រាងរបាយការណ៍វាយតម្លៃលើការអនុវត្តផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកកម្ពុជា ក្នុងឆ្នាំ២០២៣-២០២៤»។
លោកបានថ្លែងថា៖« ក្រោយពីបានដាក់ចេញនូវផែនទីបង្ហាញផ្លូវនាពេលកន្លងមក ការធ្វើពិពិធកម្មសេដ្ឋកិច្ចបានលេចចេញជាផ្លែផ្កាគួរជាទីមោទនៈ។ ជាក់ស្ដែងនៅឆ្នាំ ២០២៤ វិស័យយានយន្តកម្ពុជាទទួលបានទំហំទុនប្រមាណ ៧៤៦ លានដុល្លារ ខណៈការនាំចេញបានកើនឡើងដល់ប្រមាណ ១,១៤ ពាន់លានដុល្លារ គឺលើសពីផែនការសម្រាប់ឆ្នាំ២០២៧។ មួយផ្នែកធំនៃទឹកប្រាក់នាំចេញ គឺបានមកពីការវិនិយោគលើការផលិតសំបកកង់រថយន្ត ដែលបច្ចុប្បន្នកម្ពុជាទទួលបានគម្រោងវិនិយោគផលិតសំបកកង់រថយន្តចំនួន ៧ ដែលកំពុងផ្តល់ជាទីផ្សារធំសម្រាប់កៅស៊ូកម្ពុជាផងដែរ»។
លោកលើកឡើងទៀតថា ដោយឡែកការវិនិយោគ និងការនាំចេញក្នុងវិស័យអេឡិចត្រូនិក ក៏បានបង្ហាញនិន្នាការនៃការកើនឡើងផងដែរ បើទោះបីបានថយល្បឿនបន្តិចនៅឆ្នាំ ២០២៤ ដោយសារនិន្នាការគាំពារនិយមនៅក្នុងពាណិជ្ជកម្មសកល។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី១៩ ខែមិថុនាថា កត្តាស្ថិរភាពនយោបាយ ហេដ្ឋារចនាសម្ព័ន្ធដឹកជញ្ជូន តម្លៃកម្លាំងពលកម្មជំនាញ និងកត្តាទីផ្សារ បានជួយឱ្យកម្ពុជាទាក់ទាញអ្នកវិនិយោគឱ្យមកបណ្តាក់ទុនផ្ទាល់កាន់តែច្រើន និងមាននៅស្ទើរគ្រប់វិស័យ។
លោកបន្តថា បន្តិចម្តងៗកម្ពុជាបានប្រែក្លាយពីប្រទេសពឹងផ្អែកលើការនាំចូលទាំងស្រុង ទៅជាប្រទេសនាំចេញទំនិញចម្រុះមុខទៅទីផ្សារពិភពលោក។ បច្ចុប្បន្នក្រៅពីការនាំចេញផលិតផលវាយនភណ្ឌ កសិកម្ម និងធនធានធម្មជាតិ កម្ពុជាក៏កំពុងបង្កើនការនាំចេញផលិតផលសម្រេចដែលជាប្រភេទគ្រឿងម៉ាស៊ីន គ្រឿងបង្គុំអេឡិចត្រូនិក សំបកកង់រថយន្ត ព្រមទាំងរថយន្តមួយចំនួនផងដែរ។
លោកបានថ្លែងថា៖«ផលិតផលនាំចេញរបស់កម្ពុជាកំពុងត្រូវបានធ្វើពិពិធកម្មជាបន្តបន្ទាប់ ដែលទិដ្ឋភាពនេះបានជួយឱ្យកម្ពុជាមានទីផ្សារនាំចេញកាន់តែច្រើន ហើយជន្ទល់សេដ្ឋកិច្ចជាតិក៏កាន់តែរឹងមាំជាងមុនផងដែរ»។
លោកលើកឡើងទៀតថា ជាមួយនឹងអ្វីដែលកម្ពុជាកំពុងមាននៅពេលនេះ គឺការនាំចេញផលិតផល/ទំនិញដែលប្រើប្រាស់បច្ចេកវិទ្យាទំនើបៗទៅទីផ្សារអន្តរជាតិនឹងមានកាន់តែច្រើនបន្ថែមទៀតនាពេលខាងមុខ។
បច្ចុប្បន្នកម្ពុជាមានរោងចក្រដំឡើងរថយន្តមួយចំនួន ដូចជា ក្រុមហ៊ុន RMA មានរោងចក្ររថយន្ត Ford នៅខេត្តពោធិ៍សាត់, ក្រុមហ៊ុន Hyundai នៅខេត្តកោះកុង, ក្រុមហ៊ុន ISUZU នៅខេត្តកំពង់ស្ពឺ, ក្រុមហ៊ុន TOYOTA នៅតំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញ, ក្រុមហ៊ុន GTV MOTOR នៅខេត្តកណ្តាល និងក្រុមហ៊ុន BYD (រោងចក្រដំឡើងរថយន្តអគ្គិសនី) នៅខេត្តព្រះសីហនុ។
របាយការណ៍ក្រសួងពាណិជ្ជកម្ម ឱ្យដឹងថា ចន្លោះពីខែមករា ដល់ខែវិច្ឆិកា ឆ្នាំ ២០២៤ ការនាំចេញសំបកកង់រថយន្តទៅទីផ្សារអន្តរជាតិ មានទឹកប្រាក់សរុប ៧៧២,៥៥ លានដុល្លារ កើនឡើង ១៣៥,៣៤ ភាគរយបើធៀបនឹងរយៈពេលដូចគ្នាក្នុងឆ្នាំ ២០២៣ ដែលមាន ៣២៨,២៧ លានដុល្លារ។
រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បាននិយាយថា កំណើនទឹកប្រាក់នាំចេញសំបកកង់រថយន្ត ឆ្លុះបញ្ចាំងពីការធ្វើពិពិធកម្មនៃការនាំចេញរបស់កម្ពុជាទៅទីផ្សារអន្តរជាតិ ខណៈចំនួនរោងចក្រផលិតសំបកកង់រថយន្តកំពុងកើនឡើង។ កំណើនទឹកប្រាក់នាំចេញសំបកកង់រថយន្ត គឺជាវឌ្ឍនភាពនៃការខិតខំរបស់រដ្ឋាភិបាលក្នុងការធ្វើកំណែទម្រង់ប្រព័ន្ធច្បាប់វិនិយោគ និងការចរចាបើកទីផ្សារជាមួយប្រទេសកាន់តែច្រើន។
លោកថ្លែងថា៖«ការនាំចេញផលិតផលសំបកកង់រថយន្ត គឺជាភាពជោគជ័យថ្មីមួយទៀតដែលកម្ពុជាអាចយកផលិតផលរបស់ខ្លួនទៅដាក់លក់នៅទីផ្សារអន្តរជាតិ។ ការនាំចេញផលិតផលក្នុងវិស័យឧស្សាហកម្មមានកាន់តែច្រើន»៕
