ភ្ញៀវទេសចរជាតិ និងអន្តរជាតិចូលទស្សនាប្រាសាទអង្គរវត្ត កាលពីខែឧសភា ឆ្នាំ២០២៥។ ហ៊ឹន ពិសី
ភ្ញៀវទេសចរបរទេសជិត ៥៣ ម៉ឺននាក់បានទិញសំបុត្រចូលទស្សនារមណីយដ្ឋានអង្គរ នៅក្នុងរយៈពេល ៥ខែដើមឆ្នាំ២០២៥ ដែលធ្វើឱ្យគ្រឹះស្ថានអង្គរ (Angkor Enterprise) ប្រមូលប្រាក់ពីការលក់សំបុត្របានជាង ២៤ លានដុល្លារ កើនជាង ១០ភាគរយបើធៀបនឹងរយៈពេលដូចគ្នាកាលពីឆ្នាំ២០២៤។ បើបូកបញ្ចូលជាមួយទីតាំងផ្សេងទៀត គ្រឹះស្ថានមួយនេះ រកប្រាក់បានជិត ២៦ លានដុល្លារ។
គ្រឹះស្ថានអង្គរ គឺជាគ្រឹះស្ថានសាធារណៈរដ្ឋបាលដែលត្រូវបង្កើតឡើងកាលពីឆ្នាំ២០១៦ ដោយស្ថិតក្រោមអាណាព្យាបាលបច្ចេកទេសនៃក្រសួងទេសចរណ៍ និងស្ថិតក្រោមអាណាព្យាបាលហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុ។ ការប្រមូលចំណូលរបស់គ្រឹះស្ថានអង្គរ គឺរួមមាន រមណីយដ្ឋានអង្គរ, ប្រាសាទកោះកែរ, និងសំបុត្រទូកនៅកំពង់ផែចុងឃ្នៀស។
សម្រាប់តម្លៃតម្លៃសំបុត្រចូលទស្សនារមណីយដ្ឋានអង្គរ ត្រូវបានចែកចេញជា ៣ប្រភេទ គឺសំបុត្រចូលទស្សនា ១ថ្ងៃមានតម្លៃ ៣៧ដុល្លារ, រយៈពេល ៣ថ្ងៃតម្លៃ ៦២ដុល្លារ និង ៧ថ្ងៃ មានតម្លៃ ៧២ដុល្លារ។
សេចក្តីប្រកាសព័ត៌មានរបស់គ្រឹះស្ថានអង្គរ ចេញផ្សាយនៅថ្ងៃទី១ ខែមិថុនា បានឱ្យដឹងថា ចាប់ពីខែមករា ដល់ខែឧសភា ឆ្នាំ២០២៥ មានភ្ញៀវទេសចរបរទេស ៥២៧ ៥៧៧ នាក់បានទិញសំបុត្រចូលទស្សនារមណីយដ្ឋានអង្គរ ដោយចំនួននេះកើនឡើងប្រមាណ ១១,៧១ ភាគរយបើធៀបនឹងរយៈពេលដូចគ្នាកាលពីឆ្នាំ២០២៤ ចំណែកទឹកប្រាក់ដែលទទួលបានពីការលក់សំបុត្រ គឺ ២៤,៥៧ លានដុល្លារ កើនឡើង ១០,៦៤ភាគរយ។
ដោយឡែកក្រៅពីការលក់សំបុត្រតំបន់រមណីយដ្ឋានអង្គរ គ្រឹះស្ថានអង្គរក៏ទទួលបានចំណូលពីប្រភពចំនួន ៤ ផ្សេងទៀត ដែលរួមមាន តំបន់ប្រាសាទកោះកែរ មានទឹកប្រាក់ ១៧២ ៤៨៥ ដុល្លារ, ប្រាសាទបេងមាលា ៧៥ ៥២០ដុល្លារ, តំបន់ភ្នំក្បាលស្ពាន ២ ៨៥០ដុល្លារ និងតំបន់កំពង់ផែចុងឃ្នៀស ១ ១៤៣ ៤២១ដុល្លារ។
ប្រធានសមាគមន៍មគ្គុទ្ទេសក៏ទេសចរអង្គរ លោក ខៀវ ធី បានប្រាប់ភ្នំពេញប៉ុស្តិ៍ក្នុងថ្ងៃទី២ ខែមិថុនាថា ភ្ញៀវទេសចរបរទេសដែលធ្វើដំណើរមកទស្សនាតាមបណ្តាប្រាសាទនានាក្នុងខេត្តសៀមរាបបានកើនឡើងច្រើនកាលពីដើមត្រីមាសទី ៤ ឆ្នាំ២០២៤ ប៉ុន្តែពេលនេះមិនសូវមានទេ ព្រោះវាជាអំឡុងពេលមិនសូវមានភ្ញៀវ(Low Season)។ ភ្ញៀវបរទេសដែលធ្វើដំណើរមក គឺមានចម្រុះជាតិសាសន៍ ពិសេសមកតំបន់អ៊ឺរ៉ុប អាមេរិក។ លោកបន្តថា ចំនួនភ្ញៀវទេសចរបរទេសនឹងមានច្រើនវិញនៅក្នុងរយៈពេល ៣-៤ខែខាងមុខ។
លោកនិយាយថា៖«បន្ទាប់ពីធ្លាក់ចុះយ៉ាងគំហុកកាលពីអំឡុងឆ្នាំ២០២០ ដល់ឆ្នាំ២០២៣ ដោយសារវិបត្តិជំងឺកូវីដ១៩ ភ្ញៀវបរទេសដែលធ្វើដំណើរមកទស្សនាប្រាសាទបុរាណកម្ពុជាបានកើនឡើងជាបន្តបន្ទាប់»។ លោកបន្តថា៖«សម្រាប់រយៈពេលខាងមុខ គឺខ្ញុំមិនទាន់ហ៊ានសន្និដ្ឋានបែបណាទេ ព្រោះចរន្តនៃការធ្វើដំណើររបស់ភ្ញៀវទេសចរបរទេស ក៏អាស្រ័យទៅលើស្ថានភាពនយោបាយ និងសេដ្ឋកិច្ចសកលផងដែរ»។
សម្រាប់ឆ្នាំ២០២៥ នេះក្រសួងទេសចរណ៍ បានព្យាករណ៍ថាកម្ពុជានឹងទទួលបានភ្ញៀវទេសចរបរទេសប្រមាណ ៧,៥ លាននាក់ដែលនឹងនាំចំណូលចូលសេដ្ឋកិច្ចជាតិ ប្រមាណជាង ៥ ពាន់លានដុល្លារ។
ក្រសួងទេសចរណ៍ ឱ្យដឹងថា ក្នុងត្រីមាសទី១ ឆ្នាំ ២០២៥ មានភ្ញៀវទេសចរបរទេសជិត ១,៨៤ លាននាក់បានធ្វើដំណើរមកកម្ពុជា កើនឡើង ១៦,១ភាគរយបើធៀបនឹងត្រីមាសទី១ ឆ្នាំ២០២៤។
បុរសវ័យ ៣៥ឆ្នាំម្នាក់ ជាឆ្មាំនៅប្រាសាទអង្គរវត្ត បាននិយាយកាលពីពាក់កណ្តាលខែឧសភាថា បច្ចុប្បន្នភ្ញៀវទេសចរបរទេសដែលមកដើរកម្សាន្តនៅប្រាសាទនានាក្នុងខេត្តសៀមរាម ភាគច្រើនគឺមកពីតំបន់អឺរ៉ុប និងអាមេរិក។ ចំនួនភ្ញៀវជាតិ និងអន្តរជាតិដែលមកកម្សាន្តនៅប្រាសាទអង្គរវត្ត ពិតជាកើនឡើងបើធៀបនឹងរយៈពេលដូចគ្នាកាលពីឆ្នាំមុន។
លោកបានអះអាងថា៖«ក្នុងពេលនេះ គឺមានភ្ញៀវបរទេសតិចតួចប៉ុណ្ណោះមកលេងអង្គរ ប៉ុន្តែវានឹងមានចំនួនច្រើនចាប់ពីចុងខែសីហាតទៅ»។
ទិន្នន័យក្រសួងទេសចរណ៍ បានបង្ហាញថា ក្នុងឆ្នាំ ២០២៤ កម្ពុជាទទួលបានភ្ញៀវទេសចរបរទេសសរុប ៦,៧ លាននាក់ កើនឡើង ២២,៩ ភាគរយ ចំណែកចំណូលពីទេសចរណ៍អន្តរជាតិ គឺមានសរុជិត ៣,៦៤ ពាន់លានដុល្លារ កើនជាង ១៨ភាគរយបើធៀបនឹងឆ្នាំ២០២៣។ វិស័យទេសចរណ៍បានចូលរួមចំណែកក្នុងផលិតផលក្នុងស្រុកសរុបប្រមាណ ៩,៤ភាគរយ៕
