ការប្រមូលផលស្រូវរបស់ប្រជាកសិករនៅក្នុងខេត្ដកំពង់ឆ្នាំង។ រូបថត ភ្នំពេញប៉ុស្ដិ៍
ភ្នំពេញ៖ ក្នុងសន្និសីទសារព័ត៌មាននាពេលថ្មីៗនេះ ជាមួយក្លឹបអ្នកកាសែតកម្ពុជា (CCJ) ឯកអគ្គរដ្ឋទូតឥណ្ឌូនេស៊ីប្រចាំកម្ពុជា លោក Santo Darmosumarto បានសង្កត់ធ្ងន់លើសក្តានុពលនៃការកើនឡើងពាណិជ្ជកម្មអង្កររវាងប្រទេសទាំងពីរ ខណៈពេលដែលបានលើកឡើងពីបញ្ហាប្រឈមជុំវិញតម្លៃប្រកួតប្រជែង និងថ្លៃដឹកជញ្ជូន។
ឥណ្ឌូណេស៊ី ជាប្រទេសផលិតអង្ករធំមួយ រក្សាស្តុកអង្ករយ៉ាងច្រើនសម្រាប់ការប្រើប្រាស់ក្នុងស្រុក។ ទោះជាយ៉ាងណាក៏ដោយ ជាមួយនឹងចំនួនប្រជាជនជិត ៣០០ លាននាក់ ប្រទេសនេះនៅតែបន្តត្រូវការតម្រូវការអង្ករមួយចំនួន ជាពិសេសពីដៃគូពាណិជ្ជកម្មក្នុងតំបន់របស់ខ្លួន។
យោងតាមសភាពាណិជ្ជកម្មឥណ្ឌូនេស៊ីនៅកម្ពុជា ទំនាក់ទំនងពាណិជ្ជកម្មរវាងប្រជាជាតិទាំងពីរមានភាពប្រសើរឡើងជាលំដាប់ ដោយសភាឥណ្ឌូនេស៊ីបានគាំទ្រយ៉ាងសកម្មដល់ការពង្រីកកិច្ចសហប្រតិបត្តិការវិនិយោគ។
យ៉ាងណាមិញ លោក Santo បានថ្លែងជាភាសាឥណ្ឌូនេស៊ី និងបកប្រែជាភាសាខ្មែរថា៖ «ពេលខ្លះ ការនាំអង្ករចូលពីប្រទេសកម្ពុជា នៅទាន់មានការប្រកួតប្រជែងជាមួយប្រទេសដទៃក្នុងតំបន់ ហើយឥណ្ឌូនេស៊ីថ្លឹងថ្លែងអំពីគុណភាព និងតម្លៃ ប្រសិនបើយើងមានតម្រូវការ»។
មួយទៀត គឺការតភ្ជាប់ការដឹកជញ្ជូនក៏ជាចំណុចសំខាន់ ខណៈបរិមាណនៃផលិតផលដែលអាចនាំចូលប្រទេសឥណ្ឌូនេស៊ីមានច្រើនប្រភេទពីប្រទេសកម្ពុជា។
ឯកអគ្គរដ្ឋទូតឥណ្ឌូនេស៊ីប្រចាំកម្ពុជា លោក Santo Darmosumarto និងលោក ពុយ គា ប្រធានក្លឹបអ្នកកាសែតកម្ពុជា (CCJ) អំឡុងពេលធ្វើសន្និសីទសារព័ត៌មានកាលពីថ្ងៃទី៤ ខែមិថុនា។ រូបថត ហុង រស្មី
លោក Santo បានសង្កត់ធ្ងន់ធ្ងរថា តម្លៃដើមអាចជាដើមហេតុដែលធ្វើឱ្យផលិតផលប្រទេសកម្ពុជាមានតម្លៃខ្ពស់។ បើសិនជាអាចកាត់បន្ថយតម្លៃដើម ផលិតផលរបស់កម្ពុជានៅតែមានគុណភាពល្អ និងតម្លៃប្រកបដោយការប្រកួតប្រជែង។
លោកបានថ្លែងថា៖ «ទាក់ទងមធ្យោបាយដឹកជញ្ជូននេះពិតជាមានសារសំខាន់ណាស់ ដោយសារគុណភាពជាមួយប្រទេសដទៃអាចមានលក្ខណៈប្រហាក់ប្រហែលគ្នា តែតម្លៃអាចខុសគ្នា»។
ប្រទេសកម្ពុជាដែលមានគោលបំណងសម្រេចបាននូវគោលដៅនាំចេញអង្ករចំនួន ១ លានតោនក្នុងមួយឆ្នាំនៅឆ្នាំ ២០២៥ មានសុទិដ្ឋិនិយមចំពោះការពង្រីកទីផ្សារអង្កររបស់ខ្លួននៅក្នុងប្រទេសឥណ្ឌូនេស៊ី និងតំបន់ផ្សេងទៀត។
យុទ្ធសាស្ត្ររបស់កម្ពុជា មិនត្រឹមតែលើកកម្ពស់គុណភាពអង្កររបស់ខ្លួនប៉ុណ្ណោះទេ ប៉ុន្តែថែមទាំងធ្វើពិពិធកម្មផលិតផលអង្ករ ដើម្បីទាក់ទាញអ្នកទិញអន្តរជាតិឱ្យកាន់តែទូលំទូលាយ។
កន្លងមក កម្ពុជា និងឥណ្ឌូនេស៊ីបានចុះហត្ថលេខាលើកិច្ចព្រមព្រៀងមួយដើម្បីផ្គត់ផ្គង់អង្ករចំនួន ២៥ម៉ឺនតោនក្នុងមួយឆ្នាំ ដោយចាប់ផ្តើមពីឆ្នាំ ២០២៤។
កិច្ចព្រមព្រៀងនេះត្រូវបានគេមើលឃើញថាជាជំហានដ៏សំខាន់មួយក្នុងការពង្រឹងទំនាក់ទំនងពាណិជ្ជកម្មរវាងប្រទេសទាំងពីរ។
ការបម្រុងអង្កររបស់ប្រទេសឥណ្ឌូនេស៊ី ដែលបច្ចុប្បន្នមានចំនួនជាង ៣,៧ លានតោន គឺជាបរិមាណដ៏ធំបំផុតនៅក្នុងអាស៊ាន ដែលលើសពីប្រទេសផលិតធំៗផ្សេងទៀត ដូចជាប្រទេសថៃ និងវៀតណាម។
ជាមួយនឹងរដូវកាលស្រូវឆ្នាំ ២០២៤/២០២៥ ដែលត្រូវបានកំណត់ថានឹងមានការកើនឡើងនៃផលិតកម្មដែលឈានដល់ការប៉ាន់ប្រមាណចំនួន ៣៤,៦ លានតោន ឥណ្ឌូនេស៊ីបំពេញតម្រូវការក្នុងស្រុក និងលើកកម្ពស់តួនាទីរបស់ខ្លួនជាតួអង្គសំខាន់ក្នុងពាណិជ្ជកម្មអង្ករក្នុងតំបន់៕
