ជំនួបពិភាក្សារវាងភាគីកម្ពុជា ជាមួយថ្នាក់ដឹកនាំ AMICABILITY នៅទីក្រុងម៉ូស្គូ កាលពីថ្ងៃទី៤ ខែមិថុនា។ ក្រសួងពាណិជ្ជកម្ម
រុស្ស៊ីបានបង្ហាញចំណាប់អារម្មណ៍ក្នុងការស្វែងរកកិច្ចសហប្រតិបត្តិការជាមួយស្ថានទូតកម្ពុជា ដើម្បីរៀបចំព្រឹត្តិការណ៍មួយចំនួនក្នុងន័យផ្សព្វផ្សាយពីសក្តានុពលនៃការបណ្តាក់ទុនផ្ទាល់នៅកម្ពុជា ក៏ដូចជាជំរុញភ្ញៀវទេសចររុស្ស៊ីឱ្យធ្វើដំណើរមកកម្សាន្តនៅកម្ពុជាកាន់តែច្រើន។
គំនិតនេះត្រូវបានលោក Sergey Dvoryanov ប្រធានក្លឹបការទូតអន្តរជាតិ AMICABILITY (International Diplomatic Club) លើកឡើងក្នុងជំនួបពិភាក្សាជាមួយលោក ពេជ្រឃុន បញ្ញា ឯកអគ្គរាជទូតកម្ពុជាប្រចាំសហព័ន្ធរុស្ស៊ី និងមានការចូលរួមពីលោក ហុង សាមឌី អនុព័ន្ធពាណិជ្ជកម្មកម្ពុជាអមឯកអគ្គរាជទូតកម្ពុជាប្រចាំសហព័ន្ធរុស្ស៊ី នៅទីក្រុងម៉ូស្គូ ប្រទេសរុស្ស៊ី កាលពីថ្ងៃទី៤ ខែឧសភា ឆ្នាំ២០២៥។
ក្នុងជំនួបនេះ លោក Sergey Dvoryanov និងគណៈប្រតិភូរុស្ស៊ី បានបង្ហាញពីចំណាប់អារម្មណ៍ក្នុងការស្វែងរកកិច្ចសហប្រតិបត្តិការជាមួយស្ថានទូតកម្ពុជា ដើម្បីរៀបចំព្រឹត្តិការណ៍មួយក្នុងគោលបំណងទាក់ទាញវិនិយោគិនរុស្ស៊ីឱ្យចូលមកស្វែងរកឱកាសវិនិយោគនៅកម្ពុជា ការលើកកម្ពស់មរតកវប្បធម៌អរិយធម៌កម្ពុជា ការតាំងពិព័រណ៍ផលិតផលខ្មែរ ការផ្សព្វផ្សាយពីវិស័យសុខាភិបាលរុស្ស៊ី និងការផ្សព្វផ្សាយពីតំបន់ទេសចរណ៍កម្ពុជា ក៏ដូចជាការទាក់ទាញភ្ញៀវទេសចរណ៍រុស្ស៊ីមកលេងកម្ពុជាកាន់តែច្រើន។
ជាការឆ្លើយតប លោក ពេជ្រឃុន បញ្ញា បានសម្តែងសេចក្តីស្វាគមន៍ចំពោះក្រុមហ៊ុនរុស្ស៊ីដែលមានបំណងចង់ស្វែងរកកិច្ចសហប្រតិបត្តិការក្នុងការរៀបចំព្រឹត្តិការណ៍ដ៏សំខាន់នេះ ដើម្បីលើកកម្ពស់ និងផ្សព្វផ្សាយពីវប្បធម៌អរិយធម៌ខ្មែរបន្ថែមទៀតលើឆាកអន្តរជាតិ។ បន្ថែមលើនេះ លោកក៏បានលើកឡើងពីកិច្ចខិតខំប្រឹងប្រែងរបស់រដ្ឋាភិបាលកម្ពុជាក្នុងការលើកកម្ពស់បរិយាកាសធុរកិច្ច និងវិស័យសក្តានុពលផ្សេងៗទៀត។
កាលពីថ្ងៃទី២៨ ខែមេសា ឆ្នាំ២០២៥ កម្ពុជា-រុស្ស៊ី បានរៀបចំកិច្ចប្រជុំគណៈកម្មការអន្តររដ្ឋាភិបាលកម្ពុជា-រុស្ស៊ី លើកទី១ តាមប្រព័ន្ធវីដេអូ ដែលមានលោកឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា ប្រាក់ សុខុន និងរដ្ឋមន្ត្រីក្រសួងកសិកម្មនៃសហព័ន្ធរុស្ស៊ី លោកស្រី Oksana Lut បានធ្វើជាសហប្រធាន។ កិច្ចប្រជុំនេះមានគោលបំណងដើម្បីពង្រឹងកិច្ចសហប្រតិបត្តិការពាណិជ្ជកម្ម សេដ្ឋកិច្ច វិទ្យាសាស្ត្រ និងបច្ចេកទេស (IGC) រវាងប្រទេសទាំង ២ ឱ្យកាន់តែប្រសើរ។
ក្នុងកិច្ចប្រជុំនោះ លោក ប្រាក់ សុខុន បានលើកឡើងពីសារៈសំខាន់នៃការពង្រឹងកិច្ចសហប្រតិបត្តិការទ្វេភាគីកម្ពុជា-រុស្ស៊ី ឱ្យបានកាន់តែប្រសើរបន្ថែមទៀត ព្រមទាំងបានជំរុញឱ្យមានការពន្លឿន និងអនុវត្តឱ្យបានពេញលេញនូវកិច្ចព្រមព្រៀង/អនុស្សរណៈដែលភាគីទាំង ២ បានចុះហត្ថលេខានាពេលកន្លងមក ដើម្បីទាញយកអត្ថប្រយោជន៍ឱ្យបានជាអតិបរមា។
លោកបានបញ្ជាក់ថា មានវិស័យអាទិភាពចំនួន ៣ ដែលភាគីទាំង ២ បានសន្យានឹងខិតខំពង្រឹងកិច្ចសហប្រតិបត្តិការជាមួយគ្នា ដូចជា វិស័យពាណិជ្ជកម្ម, ថាមពល និងឧស្សាហកម្ម, និងកិច្ចសហប្រតិបត្តិការលើការអភិវឌ្ឍធនធានមនុស្សនៅកម្ពុជា។
ទាក់ទងនឹងវិស័យពាណិជ្ជកម្ម លោក ប្រាក់ សុខុន បានថ្លែងថា៖«លើវិស័យពាណិជ្ជកម្ម និងវិនិយោគ ខ្ញុំសូមអញ្ជើញថ្នាក់ដឹកនាំធុរកិច្ច សហគ្រិន និងអ្នកវិនិយោគរុស្ស៊ី មកចូលមកស្វែងយល់ពីទីផ្សារកម្ពុជា ជាពិសេសក្នុងវិស័យដូចជា កសិកម្ម និង ផលិតផលម្ហូបអាហារ»។ លោកបន្តថា៖«បន្ថែមលើនេះក៏ស្នើឱ្យភាគីទាំង ២ ពិចារណាពីការរៀបចំវេទិកាធុរកិច្ច ឬពិព័រណ៍រួមគ្នា ដើម្បីជាវេទិកាសម្រាប់ការភ្ជាប់ទំនាក់ទំនង ការផ្គូផ្គង និងការធ្វើអាជីវកម្មរួម»។
បន្ទាប់ពីការពិភាក្សាលើបញ្ហាជាច្រើន អង្គប្រជុំបានឯកភាពលើសកម្មភាពដែលត្រូវអនុវត្តដើម្បីជំរុញកិច្ចសហប្រតិបត្តិការលើវិស័យសំខាន់ៗរួមទាំង វិស័យសេដ្ឋកិច្ច ពាណិជ្ជកម្ម ការវិនិយោគ ថាមពលនិងធនធានធម្មជាតិ ឧស្សាហកម្ម ដឹកជញ្ជូន បច្ចេកវិទ្យា គមនាគមន៍និងព័ត៌មាន ហិរញ្ញវត្ថុនិងធនាគារ អប់រំ វប្បធម៌និងកីឡា សុខាភិបាល និងបរិស្ថាន។
របាយការណ៍បូកសរុបលទ្ធផលការងារប្រចាំឆ្នាំ២០២៤ របស់ក្រសួងពាណិជ្ជកម្ម ឱ្យដឹងថា បច្ចុប្បន្នកម្ពុជា-រុស្ស៊ី បាននិងកំពុងបន្តនីតិវិធីមួយចំនួន ដើម្បីឈានទៅរកការចុះហត្ថលេខាលើពិធីសាររវាងសេវាគយសហព័ន្ធរុស្ស៊ី-កម្ពុជា លើកិច្ចសហប្រតិបត្តិការផ្នែករដ្ឋបាល ការផ្លាស់ប្តូរព័ត៌មាន និងការជួយគ្នាទៅវិញទៅមកដែលបានសហនើឡើងដោយភាគីរុស្ស៊ី ដើម្បីជំរុញកិច្ចសហប្រតិបត្តិការទ្វេភាគី ក្រោមប្រព័ន្ធអនុគ្រោះពន្ធរបស់សហភាពសេដ្ឋកិច្ចអឺរ៉ុប-អាស៊ី។
ក្រសួងទេសចរណ៍ បានឱ្យដឹងថា ក្នុងឆ្នាំ២០២៤ មានជនជាតិរុស្ស៊ីចំនួន ៧១ ៩០១នាក់ បានធ្វើដំណើរមកកម្ពុជា ធ្លាក់ចុះ ១៥,៧ភាគរយបើធៀបនឹងឆ្នាំ២០២៣៕
