The Phnom Penh Post Search

Search form

Logo of Phnom Penh Post newspaper Phnom Penh Post - ប្ដីប្រពន្ធ​រុស្ស៊ី​រស់នៅ​ភ្នំពេញ​ នាំ​យក​រូបមន្ដ​នំ​អេក្លែរ​​បារាំង​បាន​ទាំង​សោភណភាព និង​រសជាតិ​ឆ្ងាញ់​




ប្ដីប្រពន្ធ​រុស្ស៊ី​រស់នៅ​ភ្នំពេញ​ នាំ​យក​រូបមន្ដ​នំ​អេក្លែរ​​បារាំង​បាន​ទាំង​សោភណភាព និង​រសជាតិ​ឆ្ងាញ់​

Content image - Phnom Penh Post
អ្នកស្រី ហ្កាលីនណា ហ្សូហ្កូវ (រូបពាក់អាវស) បង្ហាញ​នំ និង​បង្អែម​អ្នកស្រី​បង្កើត​ឡើង​សម្រាប់​លក់​តាម​អនឡាញ​។ រូបថត ហ្វេសប៊ុក​

ប្ដីប្រពន្ធ​រុស្ស៊ី​រស់នៅ​ភ្នំពេញ​ នាំ​យក​រូបមន្ដ​នំ​អេក្លែរ​​បារាំង​បាន​ទាំង​សោភណភាព និង​រសជាតិ​ឆ្ងាញ់​

ភ្នំពេញ៖ ភាព​ល្វីង​ជូរ​ចត់​នៃ​ជីវិត​ក្នុង​ស្ថានភាព​វិបត្តិ​​កូវីដ អាច​ត្រូវ​បាន​បន្សាប​ដោយ​​ភាព​ផ្អែម​ល្ហែម​​​របស់ Hey. Claire ដែល​ធ្វើ​ឱ្យ​មនុស្ស​ទទួល​បាន​នូវ​​អារម្មណ៍​ធូរ​ស្រាល ​ជាមួយ​នំ​បង្អែម​ទាំង​រសជាតិ​ឆ្ងាញ់​ និង​សោភណភាព​ស្អាត​​​ប្លែក​ទាក់​ភ្នែក​ពី​ស្វាមី​ភរិយា​ជនជាតិ​​រុស្ស៊ី​ ​​ជា​ម្ចាស់ហាង​អនឡាញ​។

Hey. Claire ត្រូវ​បាន​យក​ជា​ឈ្មោះ​​តាម​ប្រភេទ​នំ​អេក្លែរ​ (​éclair) ​ដែល​មាន​ប្រភព​នៅ​ទឹកដី​បារាំង​អំឡុង​សតវត្សរ៍​​ទី១៩។ នំ​វែងៗ​ដ៏​ល្បីល្បាញ​តុបតែង​ដោយ​គ្រីម​​រលើប​រលោង​នេះ​ ត្រូវ​បាន​លោក ស្តាស និង អ្នកស្រី ហ្កាលីនណា ហ្សូហ្កូវ ប្រាប់​ថា ​វា​គឺ​ជា​នំ​ប្រចាំ​ហាង​អ្នក​ទាំង ២ ​តែ​ម្ដង។

ទាំង​ជា​ម្ចាស់​ហាង​ និង​ចុងភៅ​​ប្ដី​ប្រពន្ធ​រុស្ស៊ី​ដែល​ចាត់​ទុក​កម្ពុជា​ គឺ​ជា​ផ្ទះ​ទី២ ​របស់​ខ្លួន​បាន​​ប្រាប់​ ភ្នំពេញ ប៉ុស្តិ៍​ថា​៖ «នៅ​​កម្ពុជា​ យើង​ឃើញ​មាន​នំ​ច្រើន​ប្រភេទ​ តែ​មិន​ទាន់​មាន​អ្នក​​ធ្វើ​នំ​ អេក្លែរ ទេ ​យើង​ក៏​យក​វា​ជា​នំ​ប្រចាំ​ហាង។ យើង​ព្យាយាម​រក​ឈ្មោះ​​ស្រដៀង​នឹង​វា​ទើប​ពេល​នោះ​ Hey. Claire ជា​​ឈ្មោះ​ដែល​យើង​នឹក​ឃើញ​ដោយ​​​មាន​សំនៀង​ស្រដៀង​ និង​គួរ​ឱ្យ​ចាប់​អារម្មណ៍​»។

Hey. Claire ​​នៅ​ភ្នំពេញ ​​​ចាប់​​បើក​តាំង​ពី​ថ្ងៃទី ១៥ ​ខែ​ធ្នូ​ ឆ្នាំ​មុន ​​បន្ទាប់​ពី​ក្រុមហ៊ុន​ទេសចរណ៍​របស់​​អ្នក​ទាំង ២ ត្រូវ​បាន​បិទ​ដោយសារ​​​វិបត្តិ​កូវីដ​។

លោក ស្តាស បាន​រំឭក​​ថា​​៖ «មុន​ពេល​កូវីដ​ យើង​រស់នៅ​សៀមរាប​ និង​​ប្រកប​ជំនួញ​ដ៏​ជោគជ័យ​ទាំង​សណ្ឋាគារ​ និង​ភោជនីយដ្ឋាន​។ យ៉ាងណា​មិញ​ដូច​ជំនួញ​ដទៃ​ទៀត​ដែរ ក្នុង​អំឡុង​ពេល​កូវីដ​នេះ​ យើង​ត្រូវ​បង្ខំ​ចិត្ត​​បិទ​។ ជំនួស​ឱ្យ​ការ​បរាជ័យ​ យើង​យក​ពេល​មក​អភិវឌ្ឍ​ខ្លួន​ និង​ដើរ​តាម​ចំណូល​ចិត្ត​​​​ក្នុង​ការ​បង្កើត​បង្អែម​ដ៏​ឆ្ងាញ់​»។

ឆ្លៀត​ឱកាស​​ហាង​​​បិទ​ទ្វារ អ្នក​ទាំង​ ២ លៃលក​ប្រើប្រាស់​​​ឧបករណ៍​ផ្ទះ​បាយ​ទៅ​រៀន​អ្វី​​ថ្មី។ ​ពេល​​បាន​រៀន​ពី​នំ​ផ្អែម​ផ្សេងៗ​កាន់​តែ​ច្រើន ​ពួក​គាត់​កាន់​តែ​ជក់​ចិត្ត​​នឹង​គំនិត​ដែល​ចង់​នាំ​បង្អែម​មាន​សោភណភាព​ប្លែក​ភ្នែក​ និង​រសជាតិ​សម្បូរបែប​មក​កាន់​តុ​អាហារ​នៅ​​កម្ពុជា​។

អ្នក​ទាំង ២ ក្រេប​យក​ចំណេះ​ជំនាញ​នេះ​ពី​ចុងភៅ​​អន្តរជាតិ​ល្បីៗ ដូចជា​​ចុងភៅ​នំ​បង្អែម​ល្បី​​នៅ​អាមេរិក លោក Antonio Bachour ចុងភៅ​ Karim Bourge ចុងភៅ​បារាំង Cedric Grolet និង​អ្នក​ជំនាញ​ខាង​ធ្វើ​នំសូកូឡា​ គឺ​លោក ​Alexander Bordeaux។

Content image - Phnom Penh Post
​នំ​អេក្លែរ ដើមកំណើត​ពី​ប្រទេស​បារាំង ស្នាដៃ​ប្ដីប្រពន្ធ​រុស្ស៊ីរស់​នៅ​រាជធានី​ភ្នំពេញ​។ រូបថត សហ​ការី

ប្ដីប្រពន្ធ​ដែល​រស់នៅ​កម្ពុជា​ជាង​ ១១ ​ឆ្នាំ ប្រាប់​ថា​ ពួក​គេ​​​​ហ្វឹកហាត់​តាម​វគ្គ​សិក្សា​អនឡាញ​រាល់​ថ្ងៃ​រយៈពេល​ ៦ ​ខែ។

ក្រៅ​ពី​ជំនាញ​ធ្វើ​នំ​ Hey. Claire ​​ជ្រើសរើស​បាន​គ្រឿង​ផ្សំ​​ល្អ​បំផុត​ដែល​អនុលោម​តាម​​តម្រូវ​ការ GOST & HACCP ដូចជា ​សូកូឡា ប៊័រ គ្រីម ឈីស និងម្សៅ​ផ្សេងៗ​មក​ពី​ប្រទេស​បែលហ្ស៊ិក​ និង​បារាំង​។

ចំពោះ​ភាព​វិសេស​របស់ Hey. Claire ត្រូវ​បាន​​អ្នកស្រី ហ្កាលីនណា ​ប្រាប់​ថា​៖ «យើង​មិន​​ប្រើ​ប៊ីចេង​ ឬ​ក៏​ប្រើ​ល័ក្ត​ទេ​។ គ្រឿង​ផ្សំ​គ្រប់​យ៉ាង​ គឺ​ធម្មជាតិ​។ ​​​ដើម្បី​រក្សា​រសជាតិ​ដើម​ គឺ​យើង​មិន​មាន​​ធ្វើ​ទុក​ទេ​ គឺ​យើង​ធ្វើ​​ថ្មីៗ​តែ​ម្ដង។ យើង​មាន​ទាំង​ជម្រើស​សម្រាប់​​អ្នក​មិន​ចូលចិត្ដ​ផ្អែម​ ឬ​ស្ករ​​។ នំ ​និង​បង្អែមនី​មួយៗ​ត្រូវ​បាន​​ដាក់​វេចខ្ចប់​ក្នុង​ប្រអប់​ពណ៌​ស និង​ខ្សែ​បូដ៏​ស្រស់​ស្អាត​»។

តម្លៃ​នំ​ គឺ​ចាប់​ពី​ ៣ ដុល្លារ​។ រីឯ​​នំខេក​ ការ​កុម្ម៉ង់​​​តម្លៃ​​ ១ គីឡូ ៣០ ដុល្លារ​។

Hey. Claire ផ្តល់​ជូន​នូវ​បង្អែម​ប្លែកៗ ​មាន​តុល្យភាព​រវាង​​រសជាតិ​ និង​គ្រឿង​ផ្សំ​ល្អ​បំផុត​។ ការ​ច្នៃ​ប្រឌិត​របស់​ពួក​គេ​ត្រូវ​បាន​កោត​សរសើរ​មិន​ត្រឹមតែ​​ពី​អ្នក​គាំទ្រ​ប៉ុណ្ណោះ​ទេ​ ប៉ុន្តែ​ថែម​ទាំង​ពី​មេ​ចុងភៅ​ជំនាញ​ និង​​នាយក​គ្រប់គ្រង​សណ្ឋាគារ ​និង​ភោជនីយដ្ឋាន​ប្រណីតៗ​​នៅ​​កម្ពុជា​ទៀត​ផង​។

លោក ​Thomas Bianco នាយក​គ្រប់គ្រង​ផ្នែក​អាហារ​ និង​​ភេសជ្ជៈ​នៅ​សណ្ឋាគារ Raffles ​​និយាយ​ថា៖ «ការ​ស្វែងរក​នំ​ដែល​មាន​គុណភាព​ល្អ​ គឺ​មិន​ងាយ​ស្រួល​ទេ តែ Hey. Claire ធ្វើ​បាន​រូបមន្ត​ល្អ​បំផុត​។ មិន​ត្រឹម​តែ​​សោភណភាព​​ទេ​ ប៉ុន្តែ​រសជាតិ​ក៏​ល្អ​អស្ចារ្យ​ដែរ​»។

អ្នក​ដែល​បាន​ភ្លក្ស​នំ Hey. Claire ម្នាក់​ទៀត​ គឺ​លោក Pierre Favitski ចុងភៅ​ និង​ម្ចាស់​ហាង Le Deli Bistro Gourmet ក៏​បាន​លាន់​មាត់​​​ថា៖ «រសជាតិនំ អេក្លែរ​ ពួក​គាត់​ធ្វើ​បាន​​ល្អ​ឥត​ខ្ចោះ បូក​បញ្ចូល​ទាំង​​គំនិត​ច្នៃ​ប្រឌិត រសជាតិ​ធម្មជាតិ មិន​ផ្អែម​ពេក​ដែល​ធ្វើ​ឱ្យ​​អតិថិជន​ចង់ញ៉ាំ​​អស់​ពី ១ ​ប្រអប់​ ទៅ​ ១ ប្រអប់​»។

លោក ​Bertrand Dardé នាយក​ប្រតិបត្តិ​ចុងភៅ​នៅ Bouchon Wine Bar ក៏​ស្ញើច​សរសើរ​​ថា៖​ «ខ្ញុំ​មាន​ការ​ភ្ញាក់​ផ្អើល​​​នំ​អាច​ច្នៃ​ស្រស់ស្អាត​បាន​ដល់​ថ្នាក់​នេះ​។ ​​រសជាតិ​ពិត​ជា​អស្ចារ្យ​ និង​​រីករាយ​ទ្វេ​ដង​»។

Hey. Claire មាន​ការ​ដឹក​ជញ្ជូន​​ទាំង​​​ក្នុង​ក្រុង ​និង​តាម​​ខេត្ត​​ដោយ​ដាក់​ប្រអប់​ទឹក​កក ព្រោះតែ​​ម្ចាស់​ហាង​​​តែង​ព្យាយាម​​​វេច​ខ្ចប់​ធ្វើ​​​ឱ្យ​នំបង្អែម​បាន​ទៅ​​ដល់ដៃ​ភ្ញៀវ​ក្នុង​ទម្រង់ និង​រសជាតិ​ដើម។​

ពួក​គេ​និយាយ​ថា៖ «Hey. Claire ​សម្រាប់​អ្នក​​​មិន​ចង់​ជ្រើសរើស​រវាង​រសជាតិ​ និង​សោភណភាព​​ពីព្រោះ Hey. Claire មាន​គ្រប់​យ៉ាង​»។

ចូល​ទៅ​កាន់​ទំព័រ​ហ្វេសប៊ុក @hey.claire.kh, និង​​ Telegram ឬ Whatsapp +៨៥៥៧០ ៨០១ ៨៨៨៕

អត្ថបទគួរចាប់អារម្មណ៍