The Phnom Penh Post Search

Search form




Logo of Phnom Penh Post newspaper Phnom Penh Post - ភោជនីយដ្ឋាន​ជប៉ុន ឃី​យ៉ូ អូ​ម៉ា​កា​សេ ផ្ដល់​ទាំង​​រសជាតិ​ប្រណីត និង​ការសម្ដែង​ចម្អិនម្ហូប​លំដាប់​ខ្ពស់​

ភោជនីយដ្ឋាន​ជប៉ុន ឃី​យ៉ូ អូ​ម៉ា​កា​សេ ផ្ដល់​ទាំង​​រសជាតិ​ប្រណីត និង​ការសម្ដែង​ចម្អិនម្ហូប​លំដាប់​ខ្ពស់​

Content image - Phnom Penh Post
មេចុងភៅ Kentaro Katsumata ចៀរចំណិត​ហេមអេស្ប៉ាញ Peta Negra បង្ហាញជូនអតិថិជន​។ រូបថត Ashley Hui Yin Tan

ភោជនីយដ្ឋាន​ជប៉ុន ឃី​យ៉ូ អូ​ម៉ា​កា​សេ ផ្ដល់​ទាំង​​រសជាតិ​ប្រណីត និង​ការសម្ដែង​ចម្អិនម្ហូប​លំដាប់​ខ្ពស់​

​ភ្នំពេញៈ ប្រជាប្រិយភាព​ភោ​ជ​នី​យ​ដ្ឋា​ន​ជប៉ុន​ប្រណីត​ក្នុង​ព្រះរាជា​​ណា​ចក្រ​កម្ពុជា ជា​ដំណើរ​រួមគ្នា​រវាង​ជនជាតិ​ជប៉ុន និង​កម្ពុជា ដូចជា​អ្វីដែល​មាននៅ​ភោជនីយដ្ឋាន ​១ ​នេះ​។​

​នៅ​ភោជនីយដ្ឋាន​ជប៉ុន ឃី​យ៉ូ អូ​ម៉ា​កា​សេ ស្ថិត​លើ​វិថី​លេខ ១៧៤ សង្កាត់​ផ្សារ​ថ្មី ៣ ខណ្ឌដូនពេញ ខ្ញុំ​កុម្ម៉ង់​អាហារ​ឈុត​ចំនួន ១៨ ​មុខ Platinum Set តម្លៃ ២៧៨​ ដុល្លារ ដោយ​អង្គុយ​រយៈពេល ២ ​ម៉ោង ជាមួយ​ការនាំ​អារម្មណ៍​ទៅកាន់​សមុទ្រ ផ្ទៃដី និង​ទឹកកក​។

​នៅពេល​ឈាន​ជើង​ចូល​បន្ទប់​អាហារ ខ្ញុំ​ត្រូវបាន​ស្វាគមន៍​ដោយ​មេ​ចុងភៅ ឃេ​នតា​រ៉ុ និង​ចុងភៅ​ដទៃទៀត នៅក្បែរ​ជើង​ហេម Pata Negra ត្រូវបាន​ដាក់តាំង​បង្ហាញ​។​

​មកដល់​មិនយូរប៉ុន្មាន ខ្ញុំ​ត្រូវបាន​ស្វាគមន៍​ជាមួយ​សូ​ដា​យូ​ហ្សា​រសជាតិ​មុត​ឈី​បៗ​។ ខណៈ​ខ្ញុំ​ក្រេប​ភេសជ្ជៈ លោក ឃេ​នតា​រ៉ុ មិន​បង្អង់​យូរ ក៏​ផ្ដើមចេញ​មុខម្ហូប​អម​ការពន្យល់​ត្រួសៗ​។

​បើក​ក្បាល​ពីមុខ​ម្ហូប​ថ្លើម​ត្រី រចនា​ក្បាច់ក្បូរ​ជាមួយ​សន្លឹក​ខ្ទឹម ឆៃថាវ និង​អ្វីដែល​លោក​បាន​ហៅថា «​ទឹក​​ជ្រលក់​ប្រចាំ​ហាង​» រួច​បន្ដ​ដោយ​ម្ហូប​ប្រចាំ​ហាង​មួយ​មុខ គឺ​ប្រហិត​សាច់​​ក្ដាម​រោយ​បន្ទះ​ផ្សិត​។ មុខម្ហូប​ទាំង ​២ បង្កើតបាន​រសជាតិ​កាន់តែ​ជក់​ចិ​ត្ដ​។

​ដោយ​ស្នង​អាជីព​ជា​មេ​ចុងភៅ​ពី​ឪពុក លោក ឃេ​នតា​រ៉ុ ត្រូវបាន​បណ្ដុះ​​បណ្ដាលឱ្យ​ចេះ​គូរគំនូរ​ប្រេង​នៅ​សាលា​សិល្បៈ​សហរដ្ឋអាមេរិក ដោយ​លោក​បានបង្ហាញ​ទេពកោសល្យ​តុបតែង​ម្ហូប​ថែមទៀត​។ ចាប់ពី​កាច់​ត្របកផ្កា​ដាក់​លម្អ​លើ​សាច់គោ​វេ​ក​យូ អ្វីៗ​គ្រប់យ៉ាង​ត្រូវបាន​ធ្វើឡើង​ដោយ​យក​ចិ​ត្ដ​ទុកដាក់ ឱ្យ​សម​ទៅនឹង​រសជាតិ​អាហារ​ប្រណីត​។

Content image - Phnom Penh Post
​សិល្បៈ​រចនា និង​ចម្អិន​ម្ហូប​ប្រណីត នៅភោជនីយដ្ឋាន ឃីយ៉ូ អូម៉ាកាសេ។ រូបថត Ashley Hui Yin Tan

​លោក​ធ្វើការ​ជា​មេ​ចុងភៅ​តាំងពី​ក្រុង​តូ​ក្យូ​ទៅដល់​ក្រុង​ញូវយ៉ក ជាទី​ដែល​លោក​បាន​បង្កើត​សមត្ថភាព​អាជីព​រយៈពេល ២ ​ឆ្នាំ​មុនពេល​មកកាន់​រាជធានី​ភ្នំពេញ​ ក្នុង​ឆ្នាំ ​២០២០ ជាមួយ​ការចាប់ផ្ដើម​ការដឹកជញ្ជូន​អាហារ​ប្រណីត​អំឡុងពេល​ការបិទ​ខ្ទប់​ដោយសារ​ជំងឺ​កូ​វីដ ​១៩​។

​ដោយ​ចំណាយពេល​ស្រាវជ្រាវ​មួយឆ្នាំ​កន្លះ និង​ស្វែងយល់​ពី​រស​និយម​របស់​ជនជាតិ​កម្ពុជា​មុន​បើកសម្ពោធ​ភោជនីយដ្ឋាន ឃី​យ៉ូ មានន័យថា «​រំភើប​ក្រៃលែង​» លោក ឃេ​នតា​រ៉ុ និង​ដៃគូ​ជា​ជនជាតិខ្មែរ បានដឹងថា ពលរដ្ឋ​ខ្មែរ​ត្រូវការ​បទពិសោធ​ទទួល​អាហារ​បែប​ថ្មី​។

​ប៊ី​ល ជា​ដៃគូ​ម្នាក់ បាន​ប្រាប់ថា អតិថិជន​ប្រមាណ​ពី ៨០ ទៅ ៩០​ ភាគរយ ​គឺជា​ជនជាតិខ្មែរ​។ បាយ​ស៊ូ​ស៊ិ​មាន​រសជាតិ​ហឹរ​តិចៗ និង​ស៊ុប​មីសួ ស្រដៀង​នឹង​សម្ល​ខ្មែរ​។

​បន្ទាប់ពី​ដកឃ្លា​បន្ដិច ពួកគេ​បាន​បន្ដ​ចេញមុខ​ម្ហូប​ប្រណីតៗ​បន្ថែមទៀត ជាមួយ​ខ្យង​អា​បា​ឡូ​ន ស្រោច​ទឹកជ្រលក់​ថ្លើម និង​ក្រែ​ម រួច​បន្ដទៅ​បង្កង​រុំ​ម្សៅ​បំពង​ស្រួយៗ​។

​លោក ឃេ​នតា​រ៉ុ បាន​ពន្យល់​ពី​ប្រភព​គ្រឿងផ្សំ​របស់លោក​ថា សត្វ​កាំប្រមា​សមុទ្រ និង​ក្ដាម​យកមក​ពី​កោះ​ហុក​កៃ​ដុ ហើយ​បង្កង​សម្រាប់ធ្វើ​ចា​យ៉ មកពី​ខេត្ដ​ឈី​បា​។

​មេ​ចុងភៅ​រូបនេះ ដែល​យល់ថា គ្មានអ្វី​ស្មុគស្មាញ បើទោះបីជា​មុខម្ហូប​ជាច្រើន​ពិបាក​នឹង​យល់​ពី​របៀបរបប​នៃ​ការ​ទទួលទាន​ក៏ដោយ បាន​ប្រាប់ ភ្នំពេញ ប៉ុស្ដិ៍ថា​៖ «​នៅ​ជប៉ុន ស៊ូ​ស៊ិ​គឺជា​អាហារសម្រន់​តិចៗ​​។

​លោក​បានបង្ហាញ​ការទទួល​ទាន​អាហារ​លាង​មាត់ ដែល​ច្របល់​បញ្ចូល​គ្នា​មុនពេល​ទំពា​។ លោក ឃេ​នតា​រ៉ុ បាន​ទាញយក​បាយ​ស៊ូ​ស៊ិ​ត្រី​ស្បៃ​កាទឹក​ខ្មេះ និង​ហុច​ជូន​ភ្ញៀវ​។

​ការសម្ដែង​ចម្អិនម្ហូប ​គឺជា​ភាព​ទាក់​​ទាញ​ ១​ ផ្សេងទៀត​។ លោក ឃេ​នតា​រ៉ុ លើក​ចំណិត​នំប៉័ង​ជប៉ុន​ជាមួយ​កាំប្រមា​សមុទ្រ បន្ថែម​ដោយ​ល្បាយ​កម្ទេចមាស​បង្ហើរ​ចេញពី​ដប​។

Content image - Phnom Penh Post
បង្អែម​ផ្សែងត្រជាក់​ និងស៊ូស៊ី​ត្រីម៉ាខារ៉ែល​​ ត្រូវបាន​រៀបចំ​យ៉ាងផ្ចិតផ្ចង់។ រូបថត Ashley Hui Yin Tan

​បាន​ពាក់​កណ្ដាលផ្លូវ សំឡេង​លាន់​ចេញពី​បំពង់​ផ្លុំភ្លើង ដែល​ដុត​សាច់​ត្រី​ធូ​ណា និង​ត្រូវបាន​លាប​ស្រទាប់​ស្លឹក​មាស​។ វា​ជា​ប្រភេទ​នៃ​ការសម្ដែង​ស្រដៀង​មេ​ចុងភៅ Salt Bae ដែល​ចូល​ចិ​ត្ដ​លេង​រោយ​អំបិល​លើ​សាច់​។

​អូ​ម៉ា​កា​សេ ទំនងជា​មានន័យថា «​ទុក​វា​ឱ្យ​អ្នក​» ​ដែល​វា​ច្បាស់​ជាការ​​ទុក​បន្ទុក​ឱ្យ​ភ្ញៀវ​ជា​អ្នកសម្រេច​មែន​។ លោក ឃេ​នតា​រ៉ុ បាន​សួរថា តើ​ជា «​បាយ​ដុំ​តូចៗ​?» ដោយ​បង្ហាញ​អា​​ហារ​សម្បូរ​ប្រូ​តេ​អ៊ី​ន​។ មកដល់​ឈុត​ពិសេស មេ​ចុងភៅ​ផ្លាស់ប្ដូរ​ជើងសា​ច់​ហេម ដើម្បី​មើល​ពេញភ្នែក និង​គ្រវីដាវ ដោយ​ចិត​ជា​ចំណិត​ស្ដើងៗ​ទៅតាម​ចង្វាក់​ចលនា​ដ៏​ប៉ិនប្រសប់ មិន​ខុសពី​ការប្រើ​ក្បាច់​ដាវ​សាមូរ៉ៃ​។

​ភ្ញៀវ​ត្រូវបាន​ស្នើឱ្យ​មូរ និង​ខ្ចប់​សាច់​កាំប្រមា​សមុទ្រ ដែល​លាត​ដាក់​លើ​ចំណិត​សាច់​ហេម Pata Negra​។ អាហារ​ដ៏​ប្រណីត​នេះ ត្រូវបាន​ដាក់ចូល​ក្នុង​មាត់​រួច​ទំពា​យក​រសជាតិ​។

​ចំហាយ​ផ្សែង​ត្រជាក់ ដែល​បង្កើត​ពី​ម៉ាស៊ីន​ផលិត​ការ៉េម បាន​ភាយ​ចេញពី​បង្អែម​រសជាតិ​ឈ្ងុយឆ្ងាញ់ រួមទាំង​ស្ដ្រូ​ប៊ឺ​រី ខ្ចប់​ម៉ូ​ឈិ និង​បន្ដក់​ការ៉េម​ផ្សិត​ត្រា​ហ្វ​ហ្វ​ល​។

​ព័ត៌មាន​បន្ថែម​មាននៅ​ទំព័រ​ហ្វេ​ស​ប៊ុ​ក @kyoomakase៕ HR

Ashley Hui Yin Tan

អត្ថបទគួរចាប់អារម្មណ៍