កាលពីថ្ងៃទី ២០ ខែតុលា ឆ្នាំ ២០១៨ ក្រុមហ៊ុន យូ ភី ជី ផាយន៍ ឯ.ក (UPG Pipe Co., Ltd) បានផ្តល់រង្វាន់ជយលាភីដល់យុវជនឆ្នើមក្នុងកម្មវិធីប្រកួតស្នាដៃអ្នកមានទេពកោសល្យ និងគំនិតច្នៃប្រឌិតបង្កើតជាវត្ថុសិល្បៈពីសម្ភារ និងបរិក្ខារបំពង់ទីបជ័រសញ្ញាឥន្ទ្រីរដូវកាលទី ២។
លោកឧកញ៉ា ឈុន ចេតនា អគ្គនាយក ក្រុមហ៊ុន យូ ភី ជី ផាយន៍ ឯ.ក បានមានប្រសាសន៍ថាក្រុមហ៊ុនមានមោទនភាពយ៉ាងខ្លាំងដែលបានផ្តល់ឱកាសឲ្យយុវជន យុវតីជំនាន់ក្រោយបញ្ចេញសមត្ថភាព និងគំនិតច្នៃប្រឌិតរបស់ខ្លួន តាមរយៈកម្មវិធីនេះ។ លោកបន្តថាបំពង់ទីបជ័រសញ្ញាឥន្ទ្រីមានលក្ខណៈងាយស្រួលសម្រាប់បេក្ខជនក្នុងការច្នៃប្រឌិតដែលជាកត្តាលើកទឹកចិត្តឲ្យបេក្ខជនអាចបង្កើតវត្ថុសិល្បៈផ្សេងៗគ្នាជាច្រើនទៅតាមគំនិត និងទេពកោសល្យរបស់ខ្លួនឯងផ្ទាល់។ លោកបន្តថាលទ្ធផលដែលទទួលបានពីគំនិតរបស់គាត់បានក្លាយជាវត្ថុជយលាភីក្នុងកម្មវិធីប្រកួតប្រជែងនាថ្ងៃនេះ ក្នុងនាមជាយុវជនវ័យក្មេងរបស់បំពង់ទីបជ័រសញ្ញាឥន្ទ្រី ឬក៏អាចហៅបានថា យុវជនឥន្ទ្រី។
គួរបញ្ជាក់ថាកម្មវិធីប្រកួតស្នាដៃអ្នកមានទេពកោសល្យ និងគំនិតច្នៃប្រឌិតបង្កើតជាវត្ថុសិល្បៈពីសម្ភារ និងបរិក្ខារបំពង់ទីបជ័រសញ្ញាឥន្ទ្រីរដូវកាលទី ២ នេះគឺលេខ ១ បានទៅលើកញ្ញា ឡុង គឹមហ៊ាង ស្នាដៃរបស់គាត់គឺ ផែនទីប្រទេសកម្ពុជា លេខ ២ បានទៅលើលោក ស៊ុន ចាន់សំរិត ស្នាដៃរបស់គាត់គឺ ចានស្រាក់ និងលេខ ៣ បានទៅលើលោក អ៊ឹង គីមឆាយ ស្នាដៃរបស់គាត់គឺ រនាតឯកដែលពួកគាត់ទាំងអស់គ្នាមកពីសាកលវិទ្យាល័យភូមិន្ទវិចិត្រសិល្បៈភ្នំពេញ។
រូបថត ហុង មិនា