Phnom Penh Post - ក្រសួងអប់រំ និងក្រុមហ៊ុនផូសមេឌាចុះអនុស្សរណៈ ដើម្បីលើកស្ទួយវិស័យអប់រំនៅកម្ពុជា
ក្រសួងអប់រំ យុវជន និងកីឡា និងក្រុមហ៊ុន ផូស មេឌា ខូអិលធីឌី កាលពីថ្ងៃអង្គារសប្តាហ៍មុន បានចុះអនុស្សរណៈនៃការយោគយល់គ្នា ដើម្បីលើកស្ទួយវិស័យអប់រំនៅកម្ពុជា។ ក្រុមហ៊ុន ផូស មេឌា គឺជាម្ចាស់កាសែតភ្នំពេញ ប៉ុស្តិ៍ ដែលបោះពុម្ពផ្សាយអត្ថបទទាំងភាសាអង់គ្លេស និងខេមរភាសា។
ពិធីចុះអនុស្សរណៈនៃការយោគយល់គ្នានេះធ្វើឡើងក្រោមអធិបតីភាព ឯកឧត្តម ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងចុះហត្ថលេខាដោយលោកស្រី សេង ហ្សានីន ប្រធាននាយកដ្ឋានព័ត៌មាន និងកិច្ចការអាស៊ានជាមួយលោក លី តៃសេង ចាងហ្វាង និងអគ្គនាយកកាសែតភ្នំពេញ ប៉ុស្តិ៍ នៃក្រុមហ៊ុនផូសមេឌា ខូអិលធីឌី។ យោងតាមអនុស្សរណៈនេះ ក្រុមហ៊ុនផូស មេឌា បានឯកភាពបោះពុម្ពផ្សាយលើកាសែតភ្នំពេញ ប៉ុស្តិ៍ ជាភាសាអង់គ្លេស និងខេមរភាសាដែលនឹងផ្តល់ ១ ទំព័រពេញទៅឲ្យក្រសួងអប់រំ សម្រាប់ការបោះពុម្ពផ្សាយមាតិកាអត្ថបទរបស់ខ្លួននៅរៀងរាល់ថ្ងៃពុធក្នុងសប្តាហ៍ទី ១ នៃខែនីមួយៗ ឬ ២ សប្តាហ៍ម្តង អាស្រ័យលើតម្រូវការរបស់ក្រសួងអប់រំ យុវជន និងកីឡា៕ រូបថត ហ៊ាន រង្សី