កាលពីថ្ងៃទី ១៣ ខែកក្កដា ២០១៨ ផ្សារទំនើប អ៊ីអនម៉លទី ១ បានចាប់ផ្តើមដំបូងនៃព្រឹត្តិការណ៍តាំងពិព័រណ៍ទូរស័ព្ទលើកទី ១ នៅកម្ពុជាដោយមានក្រុមហ៊ុនទូរស័ព្ទដៃ និងក្រុមហ៊ុនដែលមានបច្ចេកវិទ្យា (Mobile App) នៅលើទូរស័ព្ទដៃដើម្បីផ្តល់សេវាកម្មងាយៗជូនដល់អតិថិជនបានមកជុំគ្នានៅផ្សារទំនើប អ៊ីអនម៉លទី ១ ក្នុងគោលបំណងពន្យល់អ្នកប្រើប្រាស់ឲ្យបានយល់ដឹងពីអត្ថប្រយោជន៍នៃទូរស័ព្ទដៃដែលអ្នកកំពុងប្រើប្រាស់សព្វថ្ងៃនេះ។
នៅក្នុងព្រឹត្តិការណ៍ដ៏កម្រនេះដែរក៏មានមហាជនជាច្រើនចូលរួម ដើម្បីយល់ដឹងពីបច្ចេកវិទ្យាដ៏ទំនើប និងដើរឲ្យទាន់សម័យកាល។
ជាមួយគ្នានេះដែរ អ្នកចូលរួមទាំងអស់អាចមកធ្វើប្រើប្រាស់សាកល្បងទូរស័ព្ទដៃ និងសេវាកម្មផ្សេងៗដោយមានអ្នកជំនាញរង់ចាំពន្យល់យ៉ាងក្បោះក្បាយពីបច្ចេកវិទ្យា ដែលធ្វើឲ្យយើងមានភាពងាយស្រួលជាងមុន មិនថាពេលទៅផ្សារ ការទូទាត់សាច់ប្រាក់ផ្សេងៗហៅតាក់ស៊ី ការវេរប្រាក់តាមប្រព័ន្ធអេឡិចត្រូនិកផ្សេងៗជាច្រើនទៀត៕ រូបថត ហេង ជីវ័ន