.jpg)
ក្រុមហ៊ុនធានារ៉ាប់រងហ្វតតេ (FORTE) កាលពីល្ងាចថ្ងៃអង្គារទី ២២ ខែកញ្ញាបានបង្កើតវេទិកាប្រមូលផ្ដុំអ្នកជំនាញវ័យក្មេងមកពីសហគមន៍ និងអាជីវកម្មឯកជនជាច្រើន ដើម្បីបង្កឱកាសឲ្យពួកគេបានជួប និងភ្ជាប់ទំនាក់ទំនងជាមួយអ្នកធ្វើគោលនយោបាយសំខាន់ៗ និងអ្នកដឹកនាំក្នុងតំបន់ ដើម្បីធ្វើកិច្ចពិភាក្សាអំពីបញ្ហាដែលទាក់ទងនឹងសេដ្ឋកិច្ច និងអាជីវកម្មនៅកម្ពុជាបច្ចុប្បន្ន។
វេទិកាហ្វតតេនេះមានការចូលរួមដ៏ខ្ពង់ខ្ពស់ពីសំណាក់លោកជំទាវ ជា សិរី ប្រធានសមាគមសេដ្ឋកិច្ចកម្ពុជាឧបការីទេសាភិបាល និងជាអគ្គនាយកបច្ចេកទេសនៃធនាគារជាតិនៃកម្ពុជា, ឯកឧត្តមបណ្ឌិត ចែមវីឌ្យ៉ា រដ្ឋលេខាធិការនៃក្រសួងការបរទេសថ្នាក់ដឹកនាំក្រុមហ៊ុនហ្វតតេព្រមទាំងភ្ញៀវកិត្តយសជាច្រើនរូបទៀតដែលញ៉ាំងឲ្យកម្មវិធីទាំងមូលមានភាពអធិកអធម និងកាន់តែពិសេស។
លោកជំទាវ ជាសិរី បានថ្លែងសុន្ទរកថាជុំវិញប្រធានបទអំពីវិស័យហិរញ្ញវត្ថុនៅកម្ពុជាព្រមទាំងផ្ដល់អនុសាសន៍ល្អៗជុំវិញការប្រើប្រាស់ប្រព័ន្ធឌីជីថលក្នុងវិស័យហិរញ្ញវត្ថុដែលអាចនឹងត្រូវមានការកើនឡើងកាន់តែច្រើនដើម្បីឆ្លើយតបនឹងការរីករាលដាលសកលនៃជំងឺកូវីដ១៩។ លោកជំទាវក៏បានកត់សម្គាល់ផងដែរថាលោកជំទាវមាន «សុទិដ្ឋិនិយម» ចំពោះការទទួលយកការប្រើប្រាស់សេវាហិរញ្ញវត្ថុតាមប្រព័ន្ធឌីជីថលដោយសារយុវជនកម្ពុជាគឺជាប្រជាជនដែលមាន «បទពិសោធខ្ពស់ក្នុងប្រព័ន្ធបច្ចេកវិទ្យា»។
លោកជំទាវបានបន្តថា៖ «អាយុរបស់ប្រជាជនកម្ពុជាជាមធ្យមគឺ ២៥ ដូច្នេះហើយបច្ចេកវិទ្យានឹងទាក់ទាញពួកគេ។ អ្វីក៏ដោយឱ្យតែងាយស្រួលសម្រាប់អ្នកប្រើប្រាស់គឺនឹងទាក់ទាញពួកគេហើយក្នុងរយៈពេលដ៏ខ្លីនេះអ្វីៗល្អៗក៏អាចកើតមានឡើងដែរនៅក្នុងព្រះរាជាណាចក្រអច្ឆរិយៈនេះ។ ក្នុងរយៈពេល ១០ ឆ្នាំទៅមុខទៀតហេតុអ្វីបានជាយើងមិនព្រមសង្ឃឹមថានឹងមានក្រុមហ៊ុនបច្ចេកវិទ្យារបស់កម្ពុជាត្រូវបានចុះបញ្ជីក្នុងទីផ្សារភាគហ៊ុនរបស់ប្រទេសសិង្ហបុរីទៅ?»។
លោកជំទាវក៏បានផ្តល់ដំបូន្មានដល់យុវជនកម្ពុជាផងដែរថា «កុំរៀនផ្នែកធនាគារ។ យើងមានអ្នកជំនាញផ្នែកធនាគារ និងគណនេយ្យច្រើនពេកហើយ។ ខ្ញុំក៏ធ្លាប់រៀនមុខវិជ្ជាគណនេយ្យដែរ។ ប៉ុន្តែខ្ញុំគិតថាអ្នកជំនាញផ្នែកព័ត៌មានវិទ្យា (IT) ការសរសេរ Program (Programming) សន្តិសុខតាមប្រព័ន្ធអ៊ីនធឺណិត (Cybersecurity) និងវិទ្យាសាស្ត្រទិន្នន័យ (Data Science) នៅមានការខ្វះខាតនៅឡើយ។ អ្នកជំនាញផ្នែកសន្តិសុខតាមប្រព័ន្ធអ៊ីនធឺណិត និងវិទ្យាសាស្ត្រទិន្នន័យមានតម្រូវការយ៉ាងខ្លាំងនៅក្នុងវិស័យឌីជីថល។ ខ្ញុំនឹងប្រាប់ក្មេងជំនាន់ក្រោយឱ្យរៀនមុខវិជ្ជាទាំងនោះ។ យុវជនកម្ពុជាគួរតែផ្តោតលើវិស័យកសិកម្ម ប៉ុន្តែមិនមែនទាក់ទងនឹងកម្លាំងពលកម្មដោយដៃទេ។ ខ្ញុំចង់សំដៅលើការប្រើប្រាស់បច្ចេកវិទ្យា និងវិទ្យាសាស្ត្រដើម្បីបង្កើនទិន្នផលកសិកម្ម»។
នៅក្នុងវេទិកានោះដែរលោក យក់ ចំរើនឬទ្ធិ ប្រធានអគ្គនាយកប្រតិបត្តិនៃក្រុមហ៊ុនធានារ៉ាប់រងហ្វតតេបានថ្លែងបើកកម្មវិធីលើប្រធានបទទាក់ទងនឹងប្រព័ន្ធឌីជីថលព្រមទាំងផលិតផលថ្មីរបស់ក្រុមហ៊ុន ដើម្បីឆ្លើយតបនឹងការផ្ទុះរាលដាលនៃជំងឺកូវីដ១៩ថា៖ «ក្នុងនាមជាក្រុមហ៊ុនធានារ៉ាប់រងចំណាស់មួយនៅកម្ពុជា FORTE តែងបន្តផ្តល់ជូននូវផលិតផលឲ្យទាន់សម័យកាល។ ជាក់ស្តែងនៅដើមខែសីហាឆ្នាំ ២០២០ នេះក្រុមហ៊ុនយើងបានដឹកនាំសម្ព័ន្ធក្រុមហ៊ុនធានារ៉ាប់រងដើម្បីបើកដំណើរការផលិតផលធានារ៉ាប់រងសម្រាប់ការព្យាបាលជំងឺកូវីដ១៩សម្រាប់ជនបរទេសដែលផលិតផលនេះអាចរកទិញបានតាមប្រព័ន្ធអ៊ីនធឺណិតបានយ៉ាងងាយស្រួល»។
លោក យក់ ចំរើនឬទ្ធិ ប្រធានអគ្គនាយកប្រតិបត្តិរបស់ក្រុមហ៊ុនធានារ៉ាប់រងហ្វតតេបានបន្ថែមថា៖ «ផលិតផលថ្មីនេះគឺធ្វើឡើងដើម្បីតម្រូវអ្នកវិនិយោគបរទេសដែលមានគោលបំណងមកប្រទេសកម្ពុជាយើងដោយពួកគេអាចទិញផលិតផលថ្មីនេះបានតាមប្រព័ន្ធឌីជីថលបានយ៉ាងងាយស្រួលហើយ FORTE កំពុងដំណើរការផលិតផលថ្មីមួយទៀតគឺបណ្ណសន្យារ៉ាប់រងការធ្វើដំណើរកម្សាន្តក្នុងស្រុកតាមផ្លូវគោក»។
នៅក្នុងសុន្ទរកថាបើកវេទិកានោះលោក Charles Cheo ប្រធានក្រុមប្រឹក្សាភិបាលនៃក្រុមហ៊ុនធានារ៉ាប់រងហ្វតតេបានថ្លែងថាក្រុមហ៊ុនធានារ៉ាប់រង FORTE ទោះបីស្ថិតនៅក្នុងចំណោមភ្នាក់ងារដែលមានវ័យចំណាស់ជាងគេនៅកម្ពុជាក៏ដោយក៏នៅតែប្រកាន់ខ្ជាប់នូវបច្ចេកវិជ្ជាថ្មីៗដើម្បីផ្តល់ជូននូវផលិតផលងាយស្រួលដែលផ្តល់អាទិភាពដល់សុខភាពអតិថិជន។
លោកបន្ថែមថាក្រុមហ៊ុនហ្វតតេត្រូវបានលើកទឹកចិត្តដោយការឆ្លើយតបពីអ្នកដែលចូលរួមក្នុងវេទិកានេះហើយមានគោលបំណងរៀបចំព្រឹត្តិការណ៍ស្រដៀងនេះដោយផ្តោតលើប្រធានបទពាក់ព័ន្ធបញ្ហាដែលកើតមានឡើងនាពេលបច្ចុប្បន្ន និងពេលអនាគត។
អ្នកចូលរួមម្នាក់ក្នុងវេទិការហ្វតតេនេះកញ្ញា ចែម រស់សាន្ត ដែលជានិស្សិតមកពីបរទេសសិក្សាផ្នែកការគ្រប់គ្រងអាជីវកម្មបានបំពេញការចុះកម្មសិក្សានៅក្រុមហ៊ុនហ្វតតេថ្មីៗនេះបានឲ្យដឹងថា៖ «ខ្ញុំពិតជារំភើប និងរីករាយណាស់ដែលបានចូលរួមក្នុងវេទិការហ្វតតេថ្ងៃនេះ និងបានចុះកម្មសិក្សាក្នុងក្រុមហ៊ុនហ្វតតេដែលជាក្រុមហ៊ុនធានារ៉ាបរងដ៏ធំមួយនៅកម្ពុជា។ ក្នុងរយៈពេលទើបតែ ១ ខែប៉ុណ្ណោះខ្ញុំទទួលបានចំណេះដឹងយ៉ាងច្រើនលើកជំនាញអាជីវកម្មហិរញ្ញវត្ថុ (Business finance) , ការវិនិយោគ (Investment), និងទីផ្សារ (Marketing) ។ ក្នុងអំឡុងរយៈកាលកូវីដ១៩នេះ ខណៈមនុស្សភាគច្រើនមើលឃើញថានេះជាពេលវេលាដ៏លំបាកមួយខ្ញុំសម្រេចចិត្តធ្វើឲ្យវាប្រែក្លាយជាឱកាសមួយដែលខ្ញុំជឿជាក់ថានេះជាទុនដ៏សំខាន់មួយសម្រាប់ខ្ញុំទៅថ្ងៃអនាគត» ៕ រូបថត Forte
