វិស័យ​រថយន្ត​ប្រណីត​នៅ​កម្ពុជា កំពុង​តែ​មាន​ភាពល្អប្រសើរ​ឡើង នៅពេល​ដែល​រថយន្ត​ម៉ាក​អ៊ីតាលី​ដ៏ល្បី​ឈ្មោះ Maserati កាលពី​ថ្ងៃ​សុក្រ​សប្តាហ៍​មុន បាន​ចូលក្នុង​ទីផ្សារ​កម្ពុជា​ជាមួយ​នឹង​ការដាក់​បង្ហាញ​រថយន្ត​របស់ខ្លួន​។ Maserati បាន​បង្ហាញ​រថយន្ត​ប្រណីត​ ២ ​ប្រភេទ គឺ​រថយន្ត Levante SUV និង​រថយន្ត​ស្ព័រ Ghibli ។ នៅឯ​ពិធី​បើកសម្ពោធ​អមដោយ​ភ្លើងពណ៌​ដ៏ស្រស់ស្អាត​នៅ​សាល​តាំង​បង្ហាញ​របស់ខ្លួន​នៅ​រាជធានី​ភ្នំពេញ​។ ប្រធាន​ផ្នែក​ពាណិជ្ជកម្ម Maserati លោក Bernard Loire បាន​មានប្រសាសន៍ តាមរយៈ​វីដេអូ​ចាក់ផ្សាយ​ថា លោក​ពិតជា​រំភើប​ដែល​ក្រុមហ៊ុន​ផលិត​រថយន្ត​របស់ខ្លួន​ទទួល​សិទ្ធិ​លក់​ផ្តាច់មុខ​នៅ​កម្ពុជា​។ អនុប្រធាន​ក្រុមហ៊ុន HGB Group, Roberto Da Silva តំណាង​ឱ្យ Maserati នៅ​កម្ពុជា​បាន​មាន​ប្រសាសន៍​ថា​៖ “HGB Group ពិត​ជាមាន​មោទនភាព និង​រំភើប​យ៉ាងខ្លាំង​ដែល​បាន​បើក​ដំណើរការ​ម៉ាក​យីហោ Maserati នៅ​ប្រទេស​កម្ពុជា​។ Maserati បាន​ចាប់កំណើត​នៅលើ​ផ្លូវ​ប្រណាំង​មាន​ប្រវត្តិ​យ៉ាង​ល្បីល្បាញ​រយៈពេល​ជាង 100 ឆ្នាំ​មកហើយ​។ DNA ជា​រថយន្ដ​ប្រណាំង​ដ៏អស្ចារ្យ​របស់ខ្លួន​គឺអាច​មើលឃើញ​យ៉ាងច្បាស់​នៅក្នុង​ប្រវត្តិ​ជោគជ័យ​របស់ Maserati ក្នុង​ការប្រណាំង​នៅលើ​ប្រភេទ​ផ្លូវ​ជាច្រើន​នៅ​ទូទាំង​ពិភពលោក ដោយ​មាន​ចាប់ពី Indianapolis 500 ដល់ Formula 1​។ “​គ្រប់​គ្នា​ដែល​បើកបរ Maserati នឹង​យល់បាន​ភ្លាមៗ​អំពី​ថាមពល សមត្ថភាព និង​ប្រណីតភាព​ដែល​ជា​និមិត្តរូប​នៃ​ភាពឥតខ្ចោះ​របស់​អ៊ីតាលី​។ យើងខ្ញុំ​នាំមក​ជូន​ប្រទេស​កម្ពុជា​នូវ​ប្រភេទ​រថយន្ត Maserati ប្រណីត​ដែល​នឹង​ផ្ដល់នូវ​ឧត្តមភាព និង​ភាពរីករាយ​ដល់​អតិថិជន​របស់​យើងខ្ញុំ​”​។ រូបថត ហេង ជីវ័ន