គណៈគ្រប់គ្រង ព្រមទាំងបុគ្គលិកនៃក្រុមហ៊ុន លី ហួរ លីស៊ីង ភីអិលស៊ី (បុត្រសម្ព័ន្ធ លី ហួរ គ្រុប) កាលពីថ្ងៃទី ២៦ ខែមីនា ឆ្នាំ ២០២១ បានចូលរួមឧបត្ថម្ភម៉ាស់ ចំនួន ២០០,០០០ ម៉ាស់ជូនដល់ស្នងការដ្ឋាននគរបាលខេត្តកណ្តាល ក្នុងគោលបំណងចូលរួមចំណែកជាមួយរាជរដ្ឋាភិបាល និងប្រជាពលរដ្ឋកម្ពុជាក្នុងការទប់ស្កាត់ប្រយុទ្ធប្រឆាំងនឹងជំងឺកូវីដ១៩។
កញ្ញា ផាន់ សុនីតា នាយិកាប្រតិបត្តិ ប្រតិបត្តិការនៃក្រុមហ៊ុន លី ហួរ លីស៊ីង ភីអិលស៊ី និងជាតំណាងដ៏ខ្ពង់ខ្ពស់លោកឧកញ៉ា លី សុភ័ក្ភ ប្រធានក្រុមប្រឹក្សាភិបាលនៃក្រុមហ៊ុន លី ហួរ លីស៊ីង ភីអិលស៊ី និងជាអនុប្រធានសហភាពសហព័ន្ធយុវជនខេត្តព្រៃវែងមានប្រសាសន៍ថា៖ «ការឧបត្ថម្ភម៉ាស់ ចំនួន ២០០,០០០ ម៉ាស់នេះនឹងដើរតួនាទីសំខាន់ក្នុងការចូលរួមចំណែកជាមួយរាជរដ្ឋាភិបាល និងប្រជាពលរដ្ឋកម្ពុជាក្នុងការប្រយុទ្ធប្រឆាំង ការពារ និងទប់ស្កាត់ការរីករាលដាលនៃជំងឺកូវីដ១៩ នៅក្នុងប្រទេសកម្ពុជា និងជាពិសេសទៅទៀតនោះជាការចូលរួម អនុវត្តកាតព្វកិច្ចតាមសេចក្តីជូនដំណឹងរបស់ក្រសួងសុខាភិបាលស្ដីពីភូមិសាស្ត្រដែលត្រូវអនុវត្តកាតព្វកិច្ចពាក់ម៉ាស់ និងរក្សាគម្លាតសុវត្ថិភាព ដែលភូមិសាស្ត្រទាំងនោះរួមមាន៖ រាជធានីភ្នំពេញ ខេត្តព្រះសីហនុ ខេត្តកណ្តាល ខេត្តព្រៃវែង និងខេត្តសៀមរាប»។
សូមបន្តការពារខ្លួនរបស់អ្នកពីជំងឺកូវីដ១៩ ទាំងអស់គ្នាដោយធ្វើតាមការណែនាំរបស់ក្រសួងសុខាភិបាលតាមរយៈវិធានការការពារជំងឺកូវីដ១៩៖
៣ ការពារ៖
១៖ ពាក់ម៉ាស់
២៖ លាងដៃ
៣៖ គម្លាតសង្គម គម្លាតបុគ្គល (ចាប់ពី ១.៥ ម៉ែត្រឡើងទៅ)
៣ កុំ៖
១៖ កុំចូលទៅកន្លែងបិទជិត គ្មានខ្យល់ចេញចូល និង ម៉ាស៊ីនត្រជាក់ច្រើនពេក
២៖ កុំទៅកន្លែងមានមនុស្សច្រើន
៣៖ កុំប៉ះពាល់គ្នា កុំចាប់ដៃ កុំកៀកស្មា កុំឱបគ្នាជាដើម
២ ចូលរួម៖
១៖ ចូលរួមក្នុងយុទ្ធនាការទទួលការចាក់វ៉ាក់សាំងប្រឆាំងជំងឺកូវីដ១៩
២៖ ប្រើ QR Code Stop Covid-19 ទប់ស្កាត់ការរីករាលដាលនៃជំងឺកូវីដ១៩ ៕