Phnom Penh Post - ជប៉ុនផ្តល់ ២២៧ ៧៣៦ ដុល្លារអាមេរិក សម្រាប់ការធ្វើឱ្យប្រសើរទ្បើងនូវសមត្ថភាពពន្លត់អគ្គិភ័យ
រដ្ឋាភិបាលជប៉ុនបានឯកភាពផ្តល់ថវិកាសរុបចំនួន ២២៧ ៧៣៦ ដុល្លារអាមេរិកដល់អង្គភាពទទួលជំនួយចំនួនមួយក្រោមគ្រោងការណ៍ជំនួយឧបត្ថម្ភឥតសំណង សម្រាប់គម្រោងទ្រង់ទ្រាយតូចសន្តិសុខមនុស្សជាតិ (ជំនួយគូសាណូណិ) ។ កិច្ចសន្យាផ្តល់ជំនួយត្រូវបានចុះហត្ថលេខានៅថ្ងៃទី ១៨ ខែមករា ឆ្នាំ ២០២១ ដោយ ឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា និងអ្នកតំណាងអង្គភាពទទួលជំនួយសម្រាប់អនុវត្តគម្រោង។ នៅក្នុងគម្រោងនេះ រថយន្តពន្លត់អគ្គិភ័យដែលបំពាក់ដោយកាំជណ្ដើរកម្ពស់ ៤០ ម៉ែត្រ ចំនួន ១ គ្រឿងដែលជារថយន្តពន្លត់អគ្គិភ័យប្រភេទនេះលើកដំបូងសម្រាប់ដាក់ឱ្យប្រើប្រាស់នៅរាជធានីភ្នំពេញ ព្រមទាំងរថយន្តពន្លត់អគ្គិភ័យដែលបំពាក់ដោយសារធាតុគីមី ចំនួន ១ គ្រឿង និងឡានបូមទឹកពន្លត់អគ្គិភ័យ ចំនួន ២ គ្រឿងនឹងត្រូវបានដាក់ឱ្យប្រើប្រាស់នៅក្នុងរាជធានីភ្នំពេញ ដើម្បីបង្កើនសមត្ថភាពពន្លត់អគ្គិភ័យ។ ជាមួយគ្នានេះ កម្មវិធីបណ្តុះបណ្តាលស្តីពីប្រតិបត្តិការ និងការថែរក្សាឧបករណ៍ពន្លត់អគ្គិភ័យនេះក៏នឹងត្រូវបានរួមបញ្ជូលផងដែរ៕ រូបថត សហការី