ធនាគារ ប្រៃសណីយ៍កម្ពុជាទទួលបានការប្រសិទ្ធនាមជា «ធនាគារឆ្នើមសម្រាប់សហគ្រិនស្ត្រី» ពីសាជីវកម្មហិរញ្ញវត្ថុអន្តរជាតិ (International Finance Corporation) ក្នុងវេទិកាហិរញ្ញវត្ថុសហគ្រាសខ្នាតតូច និងមធ្យមឆ្នាំ ២០២០ (SME Finance Forum 2020) ដែលបានធ្វើឡើងនៅថ្ងៃទី ២៧ ខែតុលា ឆ្នាំ ២០២០។
ធនាគារ ប្រៃសណីយ៍កម្ពុជាទទួលបានពានរង្វាន់នេះគឺកើតចេញពីការយកចិត្តទុកដាក់ក្នុងការផ្តល់សេវាហិរញ្ញវត្ថុដែលប្រកបដោយភាពច្នៃប្រឌិតបំផុតជូនអតិថិជន សាធារណជន សហគ្រិន ជាពិសេសសហគ្រិនស្ត្រីទាំងអស់នៅទូទាំងប្រទេស។ លោក តូច ចៅចេក ប្រធាននាយកប្រតិបត្តិនៃធនាគារ ប្រៃសណីយ៍កម្ពុជាបានមានប្រសាសន៍ថា៖ «ធនាគារ ប្រៃសណីយ៍កម្ពុជាទទួលបាននូវប្រសិទ្ធនាមជាធនាគារឆ្នើមនេះ ក្រោមការប្រកួតប្រជែងពីបណ្តាស្ថាប័នហិរញ្ញវត្ថុជាតិ និងអន្តរជាតិច្រើនជាង ២០០ ស្ថាប័នមកពី ១៤០ ប្រទេសទូទាំងពិភពលោក។
ពានរង្វាន់ឆ្នើមដែលផ្តល់ដោយសាជីវកម្មហិរញ្ញវត្ថុអន្តរជាតិ (IFC) ពុំមែនចេះតែទទួលបាននោះទេ បើសង្កេតមកមើលប្រទេសកម្ពុជាយើងវិញក្នុងឆ្នាំ ២០២០ នេះមានតែធនាគារ ប្រៃសណីយ៍កម្ពុជាតែមួយគត់ដែលអាចសម្រេចបាននូវពានរង្វាន់មួយនេះ»។ លោក Matthew Gamser នាយកប្រតិបត្តិវេទិកាហិរញ្ញវត្ថុសហគ្រាសខ្នាតតូច និងមធ្យមបានមានប្រសាសន៍ថា៖ «យើងសង្ឃឹមថា អ្នកឈ្នះពានរង្វាន់ហិរញ្ញវត្ថុខ្នាតតូច និងមធ្យមជាសកលនេះនឹងជំរុញឱ្យអ្នកផ្តល់ហិរញ្ញប្បទានខ្នាតតូច និងមធ្យមនៅទូទាំងពិភពលោកអាចស្វែងយល់ពីបទពិសោធដ៏ល្អរបស់ពួកគេដែលសម្រេចបាននូវសមិទ្ធផលឆ្នើមមួយនេះ»៕ រូបថត ហេង ជីវ័ន