ធនាគារប្រៃសណីយ៍កម្ពុជាបានប្រារព្ធពិធីអបអរសាទរខួបគម្រប់ ៧ ឆ្នាំ កាលពីសៅរ៍ ទី ២៦ ខែកញ្ញា នៅសណ្ឋាគារឈានមុខមួយក្នុងរាជធានីភ្នំពេញ ក្នុងគោលបំណងអបអរសាទរនូវការសម្រេចបានទ្រព្យសកម្ម ១ ០០០ លានដុល្លារអាមេរិកត្រឹមរយៈពេល ៧ ឆ្នាំនៃប្រតិបត្តិការរបស់ខ្លួន។ អ្នកឧកញ៉ាបណ្ឌិត ពុង ឃាវសែ ប្រធានក្រុមប្រឹក្សាភិបាលនៃធនាគារប្រៃសណីយ៍កម្ពុជាបានថ្លែងថា៖ «បើទោះបីមានផលប៉ះពាល់ដោយជំងឺរាតត្បាតជាសកលកូវីដ១៩ ក៏ដោយ ក៏ធនាគារនៅតែបន្តការរីកចម្រើនរបស់ខ្លួនមិនថមថយដែរ រួមទាំងមានការរីកចម្រើនទាំងបណ្តាញប្រតិបត្តិការ និងទ្រព្យសកម្ម»។ នៅក្នុងពិធីដ៏មហោឡារិកនោះក៏មានការប្រគល់វិញ្ញាបនបត្រ និងពានកិត្តិយសជូនដល់គណៈគ្រប់គ្រង និងបុគ្គលិកគ្រប់ជាន់ថ្នាក់របស់ធនាគារផងដែរ។ ធនាគារមានបុគ្គលិកបម្រើការងារជាង ១ ០០០ នាក់។ បច្ចុប្បន្នធនាគារដែលបង្កើតឡើងនៅក្នុងស្រុកមួយនេះមានចំនួន ៥៥ សាខានៅទូទាំងប្រទេស និងមានគណនីអតិថិជនសរុបចំនួនជាង ១០០ ពាន់គណនី៕ រូបថត ហេង ជីវ័ន