Phnom Penh Post - ធនាគារ ហត្ថា ប្រកាសគម្រោងអគារការិយាល័យកណ្តាលថ្មី
ធនាគារ ហត្ថា បានប្រកាសពីគម្រោងសាងសង់អគារការិយាល័យកណ្តាលថ្មីដ៏ធំស្កឹមស្កៃ និងដ៏ទំនើប ដើម្បីគាំទ្រដល់ប្រតិបត្តិការអាជីវកម្មដែលមានសម្ទុះខ្លាំងនៅក្នុងទីផ្សារហិរញ្ញវត្ថុ។ ផែនការសាងសង់អគារការិយាល័យកណ្តាលថ្មីនេះត្រូវបានប្រកាសជាសាធារណៈក្នុងពិធីចុះហត្ថលេខាលើកិច្ចសន្យាសាងសង់អគារការិយាល័យកណ្តាលថ្មីរបស់ខ្លួនជាមួយក្រុមហ៊ុន ស៊ីអឹមអ៊ីឌី ខនស្ត្រាក់សិន កាលពីថ្ងៃ ទី ២៧ ខែមករា ឆ្នាំ ២០២០ កន្លងទៅ។ គម្រោងសាងសង់អគារការិយាល័យកណ្តាលថ្មីនេះមានទំហំសំណង់សរុបប្រមាណជាង ៤០០០០ ម៉ែត្រក្រឡា និងមានកម្ពស់ ២២ ជាន់ដែលស្ថិតនៅលើផ្ទៃដីប្រមាណជិត ១៥០០០ ម៉ែត្រក្រឡាតាមបណ្តោយមហាវិថីសម្តេចតេជោសែន (ឬផ្លូវ ៦០ ម៉ែត្រ)។ គិតត្រឹមដំណាច់ឆ្នាំ ២០២០ ធនាគារ ហត្ថា មានការិយាល័យសរុបចំនួន ១៧៧ និងបណ្តាញអេធីអឹមចំនួន ១៣៧ នៅទូទាំងប្រទេស៕ រូបថត សហការី