The Phnom Penh Post Search

Search form




Logo of Phnom Penh Post newspaper Phnom Penh Post - នីបផន អិចប្រេស សម្ពោធ​ផែស្ងួត មជ្ឈមណ្ឌល​ភ័ស្តុភារកម្ម​នៅ​តំបន់​សេដ្ឋកិច្ច​ពិសេស​ភ្នំពេញ

នីបផន អិចប្រេស សម្ពោធ​ផែស្ងួត មជ្ឈមណ្ឌល​ភ័ស្តុភារកម្ម​នៅ​តំបន់​សេដ្ឋកិច្ច​ពិសេស​ភ្នំពេញ

ក្រុមហ៊ុន​ប្រតិបត្តិករ​ភ័ស្តុភារ​របស់​ជប៉ុន នីបផន អិចប្រេស (​ខេមបូឌា​) ខូអិលធីឌី បាន​បើកសម្ពោធ​ផែស្ងួត​/​មជ្ឈមណ្ឌល​ភ័ស្តុភារ​ភ្នំពេញ ពហុ​មុខងារ​នៅ​តំបន់​សេដ្ឋកិច្ច​ពិសេស​ភ្នំពេញ​កាលពី​ថ្ងៃ​ចន្ទ ដើម្បី​បម្រើ​ដល់​អតិថិជន​របស់ខ្លួន​ដែល​កំពុង​កើនឡើង​។

មជ្ឈមណ្ឌល​ភ័ស្តុភារ​ពហុមុខ​ងារ​នេះ​មាន​ទំហំ ៤០ ០០០ ម៉ែត្រការ៉េ​ក្នុង​នោះ​រួមមាន​មុខងារ​គ្រប់គ្រង​សីតុណ្ហភាព ឧបករណ៍​រក្សា​សីតុណ្ហភាព ក្លាស្សេ​/​បង្កក និង​មុខងារ​ជាច្រើន​ទៀត​ដែល​ជួយ​ឱ្យ​ក្រុមហ៊ុន​អាច​បម្រើរ​ដល់​សេចក្តី​ត្រូវការ​ទីផ្សារ​ចម្រុះ ខណៈ​សេដ្ឋកិច្ច​របស់​កម្ពុជា​នៅតែ​បន្ត​មាន​កំណើន​គួរឱ្យកត់សម្គាល់​ក្នុង​រយៈពេល​ប៉ុន្មាន​ទសវត្សរ៍​ចុងក្រោយ​នេះ​។

អគ្គនាយក​ក្រុមហ៊ុន​នីបផន អិចប្រេស អូអិល ធីឌី លោក Mitsuru Saito ថ្លែងថា​៖ «​ក្រុមហ៊ុន​យើង​កំពុង​បន្ត​គោលដៅ​ក្លាយ​ជា​ក្រុមហ៊ុន​ភ័ស្តុភារ​មួយ​ដែល​មាន​គ្រឹះ​យ៉ាងរឹងមាំ​នៅក្នុង​ទីផ្សារ​ពិភពលោក​ដែល​ជា​ចក្ខុវិស័យ​រយៈពេល​វែង​សម្រាប់​ឆ្នាំ​ ២០៣៧ ដើម្បី​ប្រារព្ធ​ខួប​ ១០០ ​ឆ្នាំ​នៃ​ការបង្កើត​ក្រុមហ៊ុន​នេះ ហើយ​ដើម្បី​ឆ្ពោះ​ទៅ​រក​សមិទ្ធផល​នេះ យើង​កំពុង​ខិតខំ​ពន្លឿន​វឌ្ឍនភាព និង​កែលម្អ​តម្លៃ​សាជីវកម្ម​ផ្តោតលើ​ទីផ្សារ​ពិភពលោក ជាពិសេស​នៅ​តំបន់​អាស៊ី​»​។

លោក​បន្តថា​៖ «​នៅក្នុង​ប្រទេស​កម្ពុជា និង​តំបន់​មេគង្គ យើង​ជឿជាក់​យ៉ាង​មុតមាំ​ថា យើង​អាច​ចូលរួមចំណែក​បន្ថែមទៀត​ដល់​សកម្មភាព​អាជីវកម្ម​របស់​អតិថិជន​។ លើសពីនេះ​ទៀត​យើង​នឹង​ខិតខំ​ប្រឹងប្រែង​ដើម្បី​ក្លាយជា​កម្លាំងចលករ​សំខាន់​នៃ​ការអភិវឌ្ឍ​សង្គម​នៅក្នុង​ប្រទេស​កម្ពុជា​តាមរយៈ​សេវា​ភ័ស្តុភារ​នេះ​»​។

ឯកឧត្តម Mikami Masahiro ឯកអគ្គរាជទូត​ជប៉ុន​ប្រចាំ​កម្ពុជា ឯកឧត្តម គុណ ញឹម អគ្គនាយក​នៃ​អគ្គនាយកដ្ឋាន​គយ និង​រដ្ឋាករ​កម្ពុជា​រួម​នឹង​ថ្នាក់ដឹកនាំ​ក្រុមហ៊ុន​ជប៉ុន​ជាច្រើនរូប​ទៀត​ក៏មាន​វត្តមាន​នៅក្នុង​ពិធី​សម្ពោធ​នោះដែរ​៕ រូបថត​ ហ៊ាន រង្សី