.jpg)
ខេត្តកំពង់ធំ៖ ក្នុងការបន្តចូលរួមជំរុញវប្បធម៌អានរបស់សិស្សានុសិស្ស និងអភិវឌ្ឍធនធានមនុស្សនៅកម្ពុជា អគារបណ្ណាល័យស្តង់ដារចំនួន ៤ ខ្នង ដែលបានសាងសង់ និងបំពាក់សៀវភៅ និងបរិក្ខាររួចរាល់ដោយប្រើមូលនិធិនៃគ្រឹះស្ថានមីក្រូហិរញ្ញវត្ថុ ប្រាសាក់ ត្រូវបានដាក់សម្ពោធឱ្យប្រើប្រាស់ជាផ្លូវការកាលពីរសៀលថ្ងៃទី ១៣ ខែធ្នូ ឆ្នាំ ២០១៩ ក្រោមអធិបតីភាពដ៏ខ្ពង់ខ្ពស់ ឯកឧត្តម ជា ចាន់តូ អគ្គទេសាភិបាលធនាគារជាតិនៃកម្ពុជា។
ពិធីសម្ពោធនេះប្រារព្ធធ្វើឡើងនៅក្នុងបរិវេណវិទ្យាល័យកំពង់ថ្ម ស្រុកសន្ទុក ខេត្តកំពង់ធំ ដើម្បីជានិមិត្តរូបនៃការដាក់ឱ្យប្រើប្រាស់ជាផ្លូវការអគារបណ្ណាល័យទាំង ៤ ខ្នងដែលស្ថិតនៅទីតាំងសាលាផ្សេងគ្នារួមមាន បណ្ណាល័យនៅវិទ្យាល័យកំពង់ថ្ម, វិទ្យាល័យ ហ៊ុន សែន សណ្តាន់វិទ្យាល័យ ហ៊ុន សែន រុងរឿង និងវិទ្យាល័យ ជា ស៊ីម ប្រឡាយ ដែលស្ថិតនៅទឹកដីខេត្តកំពង់ធំជាមួយនឹងសម្ភារបរិក្ខារបណ្ណាល័យយ៉ាងច្រើន និងសៀវភៅអានប្រមាណជា ១២០០០ ក្បាល។
ចូលរួមជាគណៈអធិបតីក្នុងពិធីនេះផងដែររួមមាន ឯកឧត្ដម ព្រឹម រដ្ឋាអភិបាលរងនៃគណៈអភិបាលខេត្តកំពង់ធំលោក ឃឹម សារិន តំណាងក្រសួងអប់រំ យុវជន និងកីឡាលោក តាន់ ប៊ុនហុង ប្រធានមន្ទីរអប់រំ យុវជន និងកីឡាខេត្តកំពង់ធំលោក ទឹម រតនា នាយកសាខាធនាគារជាតិនៃកម្ពុជាប្រចាំខេត្តកំពង់ធំ និងលោក ស៊ីម សេនាជាតិ ប្រធាននាយកប្រតិបត្តិនៃគ្រឹះស្ថានមីក្រូហិរញ្ញវត្ថុ ប្រាសាក់ ព្រមទាំងលោកអភិបាលនៃគណៈអភិបាលស្រុកសន្ទុក ស្រុកស្ទោង និងស្រុកសណ្ដាន់ អាជ្ញាធរដែនដីលោកគ្រូ អ្នកគ្រូសិស្សានុសិស្ស និងប្រជាជនប្រមាណជា ១៥០០ នាក់។
លោក ឃឹម សារិន តំណាងក្រសួងអប់រំ យុវជន និងកីឡាបានកោតសរសើរ និងថ្លែងអំណរគុណយ៉ាងជ្រាលជ្រៅចំពោះប្រាសាក់ដែលបានកសាងអគារបណ្ណាល័យជាច្រើនដល់រហូតដល់ ៤១ ខ្នងនៅទូទាំងប្រទេស ដើម្បីរួមចំណែកលើកស្ទួយវិស័យអប់រំ និងធនធានមនុស្សនៅកម្ពុជា។ ប្រាសាក់ បានឆ្លើយតបត្រូវនឹងតម្រូវការរបស់ក្រសួងដែលត្រូវការអគារបណ្ណាល័យស្ដង់ដារដាច់ដោយឡែកនៅតាមសាលារៀននានា ដែលបំពាក់ដោយសៀវភៅ និងសម្ភារបរិក្ខារគ្រប់គ្រាន់ ដែលកាលពីមុនសាលារៀនត្រូវយកបន្ទប់នៃអគារសិក្សា ឬអគារទីចាត់ការមួយផ្នែកមកធ្វើជាបណ្ណាល័យ ដែលមានលក្ខណៈតូចចង្អៀតមិនអំណោយផលដល់ការអាន។
ស្របតាមទស្សនវិស័យ និងបេសកកម្មរបស់ខ្លួនក៏ដូចជាដើម្បីថ្លែងអំណរគុណចំពោះអតិថិជនដែលបានគាំទ្រ និងប្រើប្រាស់ផលិតផល និងសេវារបស់ប្រាសាក់នាពេលកន្លងមក ប្រាសាក់បានបង្កើត និងចូលរួមកម្មវិធីសង្គមជាច្រើន ដូចជា កម្មវិធីជំនួយសង្គ្រោះបន្ទាន់សម្រាប់គាំពារអតិថិជនដែលទទួលរងផលប៉ះពាល់ពីគ្រោះមហន្តរាយធម្មជាតិ និងគ្រោះថ្នាក់ផ្សេងៗ កម្មវិធីមនុស្សធម៌ និងការឧបត្ថម្ភសកម្មភាពសង្គមនានា ជាពិសេសគឺការចូលរួមចំណែកបណ្ដុះវប្បធម៌អានតាមរយៈ «គម្រោងបណ្ណាល័យប្រាសាក់»។
សម្រាប់អគារបណ្ណាល័យនៅវិទ្យាល័យទាំង ៤ នេះស្ថិតក្នុងចំណោមអគារបណ្ណាល័យទាំងអស់ ៤១ ខ្នងដែលប្រាសាក់បានសាងសង់ជូនបណ្ដាសាលារៀននានានៅទូទាំងកម្ពុជា។ ប្រាសាក់មិនត្រឹមតែផ្ដល់តួអគារបណ្ណាល័យប៉ុណ្ណោះទេ ប៉ុន្តែថែមទាំងឧបត្ថម្ភការបំពាក់ធនធានសម្ភារៈឯកសារ និងការបណ្ដុះបណ្ដាលបណ្ណារក្សថែមទៀតផង ដើម្បីឱ្យបណ្ណាល័យនេះដំណើរការបានដោយរលូន ក្រោមកិច្ចសហការពីនាយកដ្ឋានអភិវឌ្ឍកម្មវិធីសិក្សានៃក្រសួងអប់រំ យុវជន និងកីឡា។
អគារបណ្ណាល័យនេះជានិមិត្តរូបមិនចេះរីងស្ងួត និងមិនចេះសាបសូន្យនៃទំនាក់ទំនង និងការយកចិត្តទុកដាក់ចំពោះគ្នាទៅវិញទៅមក រវាងគ្រឹះស្ថានមីក្រូហិរញ្ញវត្ថុ ប្រាសាក់ និងអតិថិជន ក៏ដូចជាប្រជាជនក្នុងសហគមន៍ទាំងមូល ហើយបណ្ណាល័យនេះក៏ជាកេរមរតករបស់ប្រាសាក់សម្រាប់ទុកជូនសិស្សានុសិស្សដែលជាកូនចៅរបស់ប្រជាពលរដ្ឋក្នុងសហគមន៍ទាំងបច្ចុប្បន្ន និងអនាគត៕
