.jpg)
កាលពីថ្ងៃទី ២៨ ខែវិច្ឆិកា ឆ្នាំ ២០១៨ នៅឯគេហដ្ឋាន ឯកអគ្គរាជទូតជប៉ុន ប្រចាំព្រះរាជាណាចក្រកម្ពុជាបានប្រារព្ធព្រះរាជពិធីបុណ្យចម្រើនព្រះជន្ម ព្រះករុណា ព្រះចៅអធិរាជជប៉ុន អាគីហ៊ីតូ ដែលនឹងឈានចូលព្រះជន្មាយុ ៨៥ ព្រះវស្សានៅថ្ងៃទី ២៣ ខែធ្នូខាងមុខនេះដោយមានការអញ្ជើញចូលរួមពីលោកកិត្តិនីតិកោសល្យបណ្ឌិត ប៊ិន ឈិន ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងភ្ញៀវកិត្តិយសជាតិ និងអន្តរជាតិយ៉ាងច្រើនកុះករ។
ក្នុងពិធីនេះលោក ហូរីណូអ៊ុជិ ហ៊ីដេហ៊ីសា ឯកអគ្គរាជទូតជប៉ុនបានមានប្រសាសន៍ថា ពិធីថ្ងៃនេះមានអត្ថន័យពិសេស ដោយសារឆ្នាំនេះគឺជាខួបអនុស្សាវរីយ៍ ៣០ ឆ្នាំនៃការឡើងគ្រងរាជ្យរបស់ព្រះចៅអធិរាជជប៉ុន ហើយក៏ជាឱកាសចុងក្រោយនៃការប្រារព្ធព្រះរាជពិធីចម្រើនព្រះជន្ម ព្រះករុណា អាគីហ៊ីតូ ក្នុងព្រះរាជតួនាទីជាព្រះចៅអធិរាជជប៉ុនផងដែរ។ លោកបន្តថា ព្រះករុណា ព្រះចៅអធិរាជជប៉ុននឹងដាក់រាជ្យនៅថ្ងៃទី ៣០ ខែមេសា ឆ្នាំក្រោយ ហើយព្រះអង្គម្ចាស់ ណារុហ៊ីតូ ព្រះរាជទាយាទនឹងបន្តគ្រងរាជ្យនៅថ្ងៃទី ១ ខែឧសភា ឆ្នាំ ២០១៩ ខាងមុខនេះ៕ រូបថត ហុង មិនា
