The Phnom Penh Post Search

Search form




Logo of Phnom Penh Post newspaper Phnom Penh Post - ភីភីស៊ីប៊ែង ចូលរួម​អបអរ​ដល់​គ្រួសារ​ដែល​បាន​វិល​ទៅ​រស់នៅ​លើដី​របស់គាត់ ក្រោយ​បោសសម្អាត​មីន​មិនទាន់​ផ្ទុះ

ភីភីស៊ីប៊ែង ចូលរួម​អបអរ​ដល់​គ្រួសារ​ដែល​បាន​វិល​ទៅ​រស់នៅ​លើដី​របស់គាត់ ក្រោយ​បោសសម្អាត​មីន​មិនទាន់​ផ្ទុះ

ធនាគារ ភីភីស៊ីប៊ែង មាន​សេចក្ដី​សោមនស្ស​រីករាយ​ដែល​បានឃើញ​ប្រជាពលរដ្ឋ​ចំនួន ១១ ​គ្រួសារ​បាន​វិលត្រឡប់​ទៅ​រស់នៅ​លើដី​របស់​ពួកគាត់​វិញ ក្រោយ​អង្គការ​កណ្ដុរ​ហិត​មីន អាប៉ូប៉ូ បាន​រកឃើញ និង​បោសសម្អាត​គ្រាប់​យុទ្ធភណ្ឌ​មិនទាន់​ផ្ទុះ​។

ពិធី​ប្រគល់​ដី​ទៅ​ឱ្យ​ប្រជាពលរដ្ឋ​ត្រូវបាន​ធ្វើឡើង​នៅ​ទីតាំង​ដែល​បាន​បោសសម្អាត​មីន​ផ្ទាល់​តែម្ដង​កាលពី​ថ្ងៃទី​ ១៤ ខែ មករា ឆ្នាំ​ ២០២១ ដែល​ស្ថិតនៅ​ភូមិ​ត្រពាំង​ក្រសាំង ឃុំ​ស្រែណូយ ស្រុក​វ៉ារិន ខេត្តសៀមរាប​។

អង្គការ អាប៉ូប៉ូ បាន​រកឃើញ​ និង​បោសសម្អាត​មីន និង​គ្រាប់​យុទ្ធភណ្ឌ​មិនទាន់​ផ្ទុះ​ចំនួន​ ១៧ ដោយ​ប្រើ​កណ្ដុរ​ហិត​មីន​ចំនួន ១២ ​ក្បាល និង​អ្នក​មើលថែ​កណ្ដុរ​ហិត​មីន​ចំនួន​ ១៥ ​នាក់​។

នាយករង​ប្រតិបត្តិ​ជាន់ខ្ពស់​នៃ​ធនាគារ ភីភីស៊ីប៊ែង​, លោក ញ៉ក់ គឹមស្រូយ មានប្រសាសន៍ថា​៖ “​ឃើញ​ស្នាមញញឹម​របស់​ក្រុមគ្រួសារ​ និង​កូនៗ​របស់​ពួកគាត់​ពិតជា​ធ្វើឱ្យ​យើង​មាន​ការរំភើប​ដែល​ការសហការ​នេះ​អាចជួយ​ជ្រោមជ្រែង និង​ផ្លាស់ប្ដូរ​ជីវភាព​រស់នៅ​របស់​ពួកគាត់​មួយ​ចំណែក​ធំ​”​។ លោក គឹមស្រូយ ​បាន​បន្ថែមថា​៖ “​ដើម្បី​សម្រេច​គោលដៅ​នៅ​ឆ្នាំ​ 2025 ក្នុង​ការធ្វើឱ្យ​កម្ពុជា​ក្លាយ​ជា​ប្រទេស​គ្មាន​មីន និង​គ្រាប់​យុទ្ធភណ្ឌ​មិនទាន់​ផ្ទុះ​យើង​នៅមាន​ផ្លូវ​ដ៏វែងឆ្ងាយ​ទៀត ហើយ​ធនាគារ​ ភីភីស៊ីប៊ែង នឹង​បន្ត​សហការ​ឧបត្ថម្ភ​ដល់​អង្គការ​អាប៉ូប៉ូ ក្នុង​បេសកកម្ម​ជួយសង្គ្រោះ​ជីវិត​ប្រជាជន​កម្ពុជា​ទាំងមូល​”​។

លោកពូ ប្រយ ក្នុងចំណោម ១១ ​គ្រួសារ​បាន​ថ្លែងអំណរគុណ​យ៉ាង​ជ្រាលជ្រៅ​ដល់​ក្រុមការងារ​អាប៉ូប៉ូ និង​ធនាគារ ភីភីស៊ីប៊ែង ដែល​បាន​ឧបត្ថម្ភ​ដល់​ប្រតិបត្តិការ​មួយ​នេះ​ឱ្យ​ប្រព្រឹត្ត​ទៅ​ដោយ​ជោគជ័យ ដែល​អនុញ្ញាត​ឱ្យ​គាត់​អាច​ប្រកបរបរ​កសិកម្ម​ដាំដំឡូង ស្រូវ និង​រស់នៅ​លើដី​នេះ​ដោយ​ពុំមាន​ក្ដីបារម្ភ​ទៀតឡើយ​។

ធនាគារ ភីភីស៊ីប៊ែង សង្ឃឹមថា​ការសហការ​របស់​ខ្លួន​នាពេលនេះ​នឹង​ជំរុញឱ្យ​មាន​ការចូលរួម​បន្ថែម​ពី​សំណាក់​ក្រុមហ៊ុន​នានា​ក្នុង​ការជួយ​គាំទ្រ​អង្គការ​អាប៉ូប៉ូ ក្នុង​បេសកកម្ម​បោសសម្អាត​គ្រាប់មីន និង​គ្រាប់​យុទ្ធភណ្ឌ​មិនទាន់​ផ្ទុះ​៕ រូបថត សហការី