ក្រុមហ៊ុន ជីប ម៉ុង រីថែល ថ្ងៃទី ៥ ខែកុម្ភះ ឆ្នាំ ២០២១ បានប្រកាសជាផ្លូវការ បើកឱកាសឲ្យដៃគូពាណិជ្ជកម្ម ម្ចាស់ម៉ាកផលិតផលល្បីៗ ភោជនីយដ្ឋាន ភេសជ្ជៈ សម្ភារប្រើប្រាស់ និងសេវាកម្មកម្សាន្តទាំងក្នុងនិងក្រៅស្រុក ចាប់ផ្តើមដាក់ពាក្យជួលយកទីតាំងក្នុងផ្សារទំនើបខ្នាតយក្ស ជីប ម៉ុង ២៧១ មេហ្គាម៉ល ឲ្យបានមុនផ្សារទំនើបដ៏ធំនេះបើកដំណើរការជាផ្លូវការនៅឆ្នាំ ២០២២ ខាងមុខនេះ ខណៈពេលដែលផ្សារទំនើប ជីប ម៉ុង សែនសុខនិងសម្ពោធជាផ្លូវការនៅខែមិថុនា ក្នុងឆ្នាំ ២០២១។
លោក អាណុល ឌុយហ្វ្រេស្នេ (Arnaud Dufresne) អគ្គនាយក ក្រុមហ៊ុនជីប ម៉ុង រីថែល មានប្រសាសន៍ក្នុងពិធីនេះថា៖ «ទីតាំងផ្សារទំនើប ២៧១ មេហ្គាម៉ល មានសក្តានុពលខ្លាំងសម្រាប់ពង្រីកអាជីវកម្មបែបទំនើប ដើម្បីឆ្លើយតបទៅនឹងតម្រូវការរបស់ប្រជាពលរដ្ឋក្នុងរាជធានីភ្នំពេញ ប្រមាណជិត ៣ លាននាក់ ក៏ដូចជាពលរដ្ឋដែលរស់នៅក្នុងតំបន់ជុំវិញទីតាំងមួយនេះផងដែរ ខណៈពេលដែលជីវភាពរបស់ពលរដ្ឋក្នុងតំបន់កាន់តែប្រសើរឡើងជាប្រចាំ»។
លោកបន្តថា បើពិនិត្យមើលទៅលើភូមិសាស្រ្ត និង គម្រោងអភិវឌ្ឍន៍របស់សាលារាជធានីភ្នំពេញ និងក្រុមហ៊ុនអភិវឌ្ឍន៍លំនៅឋានផ្សេងៗ ដែលរាប់បញ្ចូលទាំង ជីប ម៉ុងលែន ក្នុងតំបន់ផ្លូវ ៦០ម៉ែត្រ និងជុំវិញតំបន់នេះ ទីតាំងមជ្ឈមណ្ឌលផ្សារទំនើប ជីប ម៉ុង ២៧១ មេហ្គាម៉ល នឹងស្ថិតនៅកណ្តាលនៃទីប្រជុំជនតែម្តង និងមានចរាចរណ៍ធ្វើដំណើរឆ្លងកាត់យ៉ាងខ្វាត់ខ្វែងដោយប្រជាពលរដ្ឋដែលរស់នៅក្នុងតំបន់ជុំវិញទីនោះតាមច្រកសំខាន់ៗ ៣ គឺផ្លូវ ២៧១ ផ្លូវ ៦០ម៉ែត្រ និង ផ្លូវ ៣៧១។
លោកក៏បានបង្ហាញនូវជំនឿជាក់យ៉ាងខ្លាំងថា៖ «មជ្ឈមណ្ឌលផ្សារទំនើប ជីប ម៉ុង ២៧១ មេហ្គាម៉ល នេះនឹងទទួលបានអតិថិជនច្រើនដោយស្វ័យប្រវត្តិដោយសារអំណោយផលស្រាប់ពីចំនួនប្រជាជនដ៏លើសលប់នៅជុំវិញតំបន់នេះ បូករួមជាមួយយុទ្ធសាស្រ្តទីផ្សារឆ្លាតវៃ ការជ្រើសរើសនិងរៀបចំទីតាំងដៃគូពាណិជ្ចកម្មដ៏ត្រឹមត្រូវ និង កិច្ចសហការគ្នាដ៏រឹងមាំរវាងផ្សារទំនើប ជីបម៉ុង ម៉ល ជាមួយ ជីប ម៉ុង លែន ក៏ដូចជាពាណិជ្ជកម្មដទៃទៀតចំនួន ១៤ ទៀតក្នុងសម្ព័នជីប ម៉ុងគ្រុប»។
លោកក៏បានបន្ថែមទៀតថា ជាមួយបទពិសោធន៍ជោគជ័យដ៏សម្បើមរបស់ ជីប ម៉ុង គ្រុប កន្លងមក យើងជឿជាក់ថា ក្រុមហ៊ុន ជីប ម៉ុងរីថែល នឹងក្លាយជាក្រុមហ៊ុននាំមុខគេនៅក្នុងវិស័យរីថែល នាពេលអនាគតដ៏ខ្លីឆាប់ៗខាងមុខនេះ៕