ការសម្ដែងល្ខោនប្រពៃណីហ៊ីចិន ជាលើកដំបូងនៅមហោស្រពកោះពេជ្រ ដើម្បីអបអរខួប ៦០ ឆ្នាំនៃទំនាក់ទំនងមិត្តភាពកម្ពុជា-ចិនបានទទួលការចូលរួមទស្សនាយ៉ាងច្រើនកុះករ គួរអោយកត់សម្គាល់។
ល្ខោនប្រពៃណីហ៊ីចិន ដែលត្រូវបានប្រជាជនចិនបានចាត់ទុកថា ជាត្បូងដ៏មានតម្លៃក្នុងវប្បធម៌របស់ចិននោះបានសម្តែងជូនបងប្អូនប្រជាពលរដ្ឋខ្មែរ និងជនជាតិចិនទស្សនាដោយផ្ទាល់រយៈពេល ៣ ថ្ងៃដែលថ្ងៃទី ១ សម្តែងរឿង "ពស់សពស់ខៀវ" ថ្ងៃទី ២ និងទី ៣ សម្ដែងរឿង «ភ្នំថ្មខៀវ» «ពិធីលៀងសាយភោជន៍តូច» «សឺឈានលួចមាន់» «ស្នំឯកស្រវឹងព្រះចណ្ឌរស» ដោយប្រមូលម្តុំដោយក្រុមល្ខោនល្បីឈ្មោះនាទីក្រុងប៉េកាំងផ្ទាល់តែម្តង។
ប្រធានមន្ទីរល្ខោនប៉េកាំងលោក Lin En Jie បានបញ្ជាក់ថានៅក្នុងប្រទេសចិន ល្ខោនចិនត្រូវបានគេចាត់ទុកថាជាត្បូងពេជ្រដ៏មានតម្លៃក្នុងវប្បធម៌របស់ចិន ហើយការជ្រើសយកល្ខោនប្រពៃណីហ៊ីចិនមកសម្តែងនេះគឺដោយសារល្ខោននេះជាប្រភេទល្ខោនចំណាស់ជាងគេ ១ របស់ចិនដែលមានអាយុកាលជិត ២០០ ឆ្នាំមកហើយ ហើយល្ខោននេះក៏ត្រូវបានចុះបញ្ចូលជាបេតិកភណ្ឌវប្បធម៌អរូបីរបស់ពិភពលោកផងដែរ។
លោកបានបន្តថាវត្តមានរបស់តួសម្ដែងសំខាន់ៗដែលនឹងត្រូវចូលរួមក្នុងការសម្ដែងហ៊ីនេះក៏មានលោក Li Hong Tu សម្ដែងតួ Xu Xian នៅក្នុងរឿង ពស់ស (Bai She Zhuan) គឺជាតារាសម្តែងជួរមុខគេបង្អស់នៃមហោស្រពប៉េកាំង ហើយគាត់ជាប្រធានក្រុម Mei Lang Fang ដែលបានឈ្នះពានរង្វាន់ វិចិត្រករឆ្នើមបំផុតនៅអាស៊ីផងដែរ។
គួរបញ្ជាក់ថាសម្រាប់ការសម្ដែងល្ខោនប្រពៃណីហ៊ីចិន ជាលើកដំបូងនៅមហោស្រពកោះពេជ្រនេះត្រូវបានស្ថិតក្រោមកិច្ចសហការគ្នារវាងក្រុមហ៊ុន Awesome Global Investment Group និងក្រុមហ៊ុនល្ខោន Mei Lang Fang៕ រូបថត ហុង មិនា