សណ្ឋាគារអ៊ីមីអនភ្នំពេញ (Hotel Emion Phnom Penh) ដ៏ប្រណីតដែលមាន ១៩ ជាន់ស្មើនឹង ២៤០ បន្ទប់របស់សាជីវកម្ម Starts (ខេមបូឌា) ជប៉ុនត្រូវបានបើកសម្ពោធជាផ្លូវការក្រោមអធិបតីភាពលោក ថោង ខុន រដ្ឋមន្ត្រីក្រសួងទេសចរណ៍ និងលោក Hidehisa Horinouchi ឯកអគ្គរាជទូតជប៉ុនប្រចាំកម្ពុជាកាលពីថ្ងៃទី ៨ ខែវិច្ឆិកា ឆ្នាំ ២០១៨ ស្របពេលដែលប្រជាជនកម្ពុជាទាំងមូលកំពុងប្រារព្ធខួបអនុស្សាវរីយ៍លើកទី ៦៥ នៃទិវាបុណ្យឯករាជ្យជាតិ ៩ វិច្ឆិកាដ៏អធិកអធម ហើយក៏ស្របពេលដែលកម្ពុជា-ជប៉ុនកំពុងប្រារព្ធខួបអនុស្សាវរីយ៍លើកទី ៦៥ នៃចំណងការទូតមិត្តភាពកម្ពុជា-ជប៉ុនផងដែរ។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងថា សណ្ឋាគារអ៊ីមីអនភ្នំពេញដ៏ប្រណីតនេះត្រូវបានកសាងឡើងប្រកបដោយភាពច្នៃប្រឌិត និងការគិតគូរខ្ពស់ពីបរិស្ថាន ហើយជាគម្រោងមួយក្នុងចំណោមគម្រោងវិនិយោគវិស័យទេសចរណ៍ខ្នាតធំដោយវិនិយោគគិនជប៉ុនទាំង ៧ គម្រោង (៦ គម្រោងជាការវិនិយោគអាជីវកម្មសណ្ឋាគារ និង ១ គម្រោងជាការវិនិយោគរមណីយដ្ឋានទេសចរណ៍ (V-Pine Kirirom Resort) ដែលបានចុះបញ្ជីនៅក្រុមប្រឹក្សាអភិវឌ្ឍន៍កម្ពុជា (CDC)។
លោករដ្ឋមន្ត្រីបានបន្តថា ក្រៅអំពីការវិនិយោគធំៗលើអាជីវកម្មសណ្ឋាគារដោយវិនិយោគិនជប៉ុន កម្ពុជាក៏មានសណ្ឋាគារធំៗល្បីៗដូចជាសណ្ឋាគារ Park Hyatt, Sofitel, le Meridien, អាម៉ាន់សារា, Raffles, Marriots, Rosewood, Great Duke ។ល។ ហើយក៏មានគម្រោងវិនិយោគសណ្ឋាគារធំៗ ផ្សេងទៀតទាំងនៅភ្នំពេញ សៀមរាប និងក្រុងព្រះសីហនុកំពុងដំណើរការសាងសង់ផងដែរ។ ដោយឡែកនៅតំបន់កោះក៏មានរមណីយដ្ឋានទេសចរណ៍ល្អៗជាច្រើនដូចជា៖ កោះសង្សារ កោះក្របី កោះឫស្សី កោះស្តេច។ល។
ក្នុងចំណោមសេវាកម្មស្នាក់នៅ វិស័យសណ្ឋាគារមានការរីកចម្រើនយ៉ាងខ្លាំង។ បច្ចុប្បន្ននៅទូទាំងប្រទេសកម្ពុជាមានសណ្ឋាគារ ៨០១ កន្លែង (ស្មើនឹង ៤៦ ០៩៩ បន្ទប់) និងផ្ទះភ្ញៀវ ២ ២៦១ កន្លែងក្នុងនោះភ្នំពេញមានសណ្ឋាគារមានចំនួន ៣១៣ កន្លែង (១៩ ៣៣៧ បន្ទប់) ហើយសណ្ឋាគារវិនិយោគដោយវិនិយោគិនជប៉ុន មាន ៨ កន្លែង (៦១៤ បន្ទប់)។ ភោជនីយដ្ឋាន/អាហារដ្ឋានមាន ២ ២៨៦ កន្លែង (១៣៤ ៥៩៧ កៅអី) ក្នុងនោះភ្នំពេញមានភោជនីយដ្ឋាន/អាហារដ្ឋានប្រមាណជា ៥២៧ កន្លែង (៥៦ ៤៩០ កៅអី) ហើយភោជនីយដ្ឋាននិងអាហារដ្ឋានវិនិយោគដោយជប៉ុន ៤៧ កន្លែង។
គួរកត់សម្គាល់ដែរថានៅឆ្នាំ ២០១៧ កន្លងទៅក្នុងចំណោមភ្ញៀវទេសចរអន្តរជាតិប្រមាណ ៥,៦ លាននាក់ កម្ពុជាទទួលបានទេសចរជប៉ុនប្រមាណ ២០ ម៉ឺននាក់ (ទេសចរជប៉ុនមកភ្នំពេញមានចំនួនប្រមាណ ៨ ម៉ឺននាក់ កើន២៧%) និង ៨ ខែដើមឆ្នាំ ២០១៨ កម្ពុជាទទួលបានទេសចរអន្តរជាតិប្រមាណជាង ៣,៩ លាននាក់ក្នុងអត្រាកំណើនប្រមាណ ១១,៧% ក្នុងនោះទេសចរជប៉ុនមានប្រមាណជាង ១៣ ម៉ឺននាក់ (ទេសចរជប៉ុនមកភ្នំពេញមានចំនួន ជាង ៧ ម៉ឺននាក់ កើន ១៣,៤%)៕ រូបថត ហុង មិនា