Phnom Penh Post - សណ្ឋាគារ ហៃយ៉ាត់ រីជិនស៊ី ភ្នំពេញ លំដាប់ផ្កាយ ៥ ផ្តល់ជូននូវបទពិសោធដ៏សម្បូរបែប
សណ្ឋាគារ ហៃយ៉ាត់ រីជិនស៊ី ភ្នំពេញ Hyatt Regency ដែលស្ថិតនៅកណ្តាលរាជធានីភ្នំពេញ ជាមួយរចនាប័ទ្មសម័យអាណានិគមនិយមបារាំងស្ថិតនៅលើផ្លូវលេខ ១៧៨ បើកទ្វារជាថ្មីម្តងទៀតនៅថ្ងៃពុធនេះ ដែលផ្តោតសំខាន់ទៅលើខ្សែចង្វាក់សណ្ឋាគារប្រណីតនៅភ្នំពេញ។ លោក Herman Kemp អ្នកគ្រប់គ្រងទូទៅបានមានប្រសាសន៍ថា៖ «ចាប់តាំងពីឆ្នាំ ១៩០០ ធ្លាប់ជាផ្ទះលក្ខណៈគ្រួសារមួយ ហើយធ្លាប់បម្រើជាហាងកាហ្វេមួយ ផ្ទះចាស់ដ៏ស្រស់ស្អាតនេះតែងតែជាកន្លែងសម្រាប់មនុស្សជួបជុំគ្នា ហើយសណ្ឋាគារ ហៃយ៉ាត់ ធានាថាខ្លួននឹងនៅតែបន្តស្វាគមន៍ភ្ញៀវគ្រប់រូប។ ការច្របាច់បញ្ចូលគ្នានៃស្ថាបត្យកម្មសម័យបុរាណ និងទំនើប លក្ខណៈអន្តរជាតិគួបផ្សំជាមួយវប្បធម៌ខ្មែរធ្វើឱ្យអគារដ៏ប្រណីតមួយនេះក្លាយទៅជាមជ្ឈមណ្ឌលដ៏ទំនើប និងផ្តល់នូវបទពិសោធដ៏អស្ចារ្យ ហើយយើងបង្កើតវាឡើងដើម្បីផ្តល់ជូននូវអ្វីដែលប្លែកជាមួយនឹងគំនិតថ្មីសម្រាប់ទីផ្សារបច្ចុប្បន្ន»។ មានទីតាំងស្ថិតនៅចំកណ្តាលសង្កាត់ពាណិជ្ជកម្ម និងក្បែរកន្លែងវប្បធម៌នៃទីក្រុងភ្នំពេញ សណ្ឋាគារផ្កាយ ៥ លំដាប់អន្តរជាតិ ហៃយ៉ាត់ ក៏មានហាងធំៗចំនួន ៤ ដែលរចនាឡើងយ៉ាងអស្ចារ្យ ដើម្បីផ្តល់នូវបទពិសោធនៃម្ហូបអាហារដ៏ឈ្ងុយឆ្ងាញ់។ ភោជនីយដ្ឋាន FiveFive Rooftop & Bar ដែលស្ថិតនៅជាន់ទី ១៤ មានលក្ខណៈទំនើបដែលអាចគយគន់ទេសភាពដ៏ស្រស់ត្រកាលនៃដងទន្លេ ខណៈដែល Metropole Underground នឹងក្លាយជាបារ៍ដែលស្ថិតនៅជាន់ក្រោមដីដំបូងគេនៅទីក្រុងភ្នំពេញ៕ រូបថត ហ៊ាន រង្សី