ស្ថានទូតតំណាងពាណិជ្ជកម្មប្រចាំស្ថានឯកអគ្គរាជទូតថៃនៅរាជធានីភ្នំពេញនឹងរៀបចំមហោស្រពភាពយន្តថៃលើកទី ៣ ឆ្នាំ ២០១៨ (Thai Film Festival 2018) នៅកម្ពុជា ក្រោយពីទទួលបានការគាំទ្រយ៉ាងច្រើនពីសំណាក់ទស្សនិកជនក្នុងការទស្សនាខ្សែភាពយន្តថៃ។
លោក ជីរ៉ាវុឍ សុវណ្ណាអាត អគ្គទីប្រឹក្សាពាណិជ្ជកម្មប្រចាំស្ថានឯកអគ្គរាជទូតថៃនៅរាជធានីភ្នំពេញបានថ្លែងក្នុងសន្និសីទសារព័ត៌មាននៅរសៀលថ្ងៃទី ៦ ខែកញ្ញា ឆ្នាំ ២០១៨ ថា កម្មវិធី Thai Film Festival 2018 ធ្វើឡើងក្នុងគោលបំណងដើម្បីជំរុញកិច្ចសហប្រតិបត្តិការរវាងអ្នកផលិតខ្សែភាពយន្ត និងបណ្តាក្រុមហ៊ុនដែលពាក់ព័ន្ធជាមួយវិស័យឧស្សាហកម្មភាពយន្តនៃប្រទេសទាំង ២ ដើម្បីទទួលបាននូវការចែករំលែកបទពិសោធគ្នាទៅវិញទៅមក និងបច្ចេកទេសនៃការថត និងការកាត់តភាពយន្តពីអ្នកជំនាញជាដើម។
លោកបន្ថែមថាខ្សែភាពយន្តថៃចំនួន ៤ រឿងនឹងយកមកចាក់បញ្ចាំងជូនទស្សនាដោយឥតគិតថ្លៃនៅក្នុងរោងភាពយន្ត Major Platinum Cineplex ផ្សារទំនើប Aeon សែនសុខ ចាប់ពីថ្ងៃទី ១៣ ដល់ ១៦ ខែកញ្ញា ឆ្នាំ ២០១៨ ខាងមុខ។ សន្និសីទនេះក៏មានវត្តមានតារាកិត្តិយសថៃគឺលោក Charkrit Yaemnam និងកញ្ញា Kaimook ព្រមទាំងមានសិល្បករ សិល្បការិនីប្រចាំប្រទេសកម្ពុជាជាច្រើនរូបផងដែរ៕ រូបថត ហុង មិនា