The Phnom Penh Post Search

Search form




Logo of Phnom Penh Post newspaper Phnom Penh Post - សម្តេច ហេង សំរិន ផ្ដល់​លិខិត​ថ្លែងអំណរគុណ​ដល់​ឯកឧត្តម​អ្នកឧកញ៉ា ចេន ហ្ស៊ី ចំពោះ​ការផ្ដល់​ជា​ជំនួយ​ដល់​ប្រជាជន​រងគ្រោះ​ដោយ​ជំនន់​ទឹកភ្លៀង




សម្តេច ហេង សំរិន ផ្ដល់​លិខិត​ថ្លែងអំណរគុណ​ដល់​ឯកឧត្តម​អ្នកឧកញ៉ា ចេន ហ្ស៊ី ចំពោះ​ការផ្ដល់​ជា​ជំនួយ​ដល់​ប្រជាជន​រងគ្រោះ​ដោយ​ជំនន់​ទឹកភ្លៀង

ភ្នំពេញ៖ សម្តេច​អគ្គមហាពញាចក្រី ហេង សំរិន ផ្ដល់ជូន​លិខិត​ថ្លែង​អំណរគុណ​ដល់​ឯកឧត្តម​អ្នកឧកញ៉ា ចេន ហ្ស៊ី ចំពោះ​ការផ្ដល់​ជា​ជំនួយ​ដល់​ប្រជាជន​រងគ្រោះ​ដោយ​ជំនន់​ទឹកភ្លៀង​ជា​បន្តបន្ទាប់​។

ជាមួយ​នឹង​ពាក្យ​ថា «​ទឹកជំនន់​គឺ​គ្មាន​មេត្តា តែ​មនុស្ស​មាន​ក្ដី​ស្រលាញ់​» ឯកឧត្តម​អ្នកឧកញ៉ា ចេន ហ្ស៊ី ប្រធាន​ក្រុមប្រឹក្សាភិបាល​នៃ​ក្រុមហ៊ុន​ ព្រីនស៍ ហូលឌីង គ្រុប បាន​បំពេញ​ទំនួល​ខុសត្រូវ​សង្គម​របស់ខ្លួន​យ៉ាងសកម្ម ដោយ​បាន​ផ្ដល់ជំនួយ​ជា​អង្ករ​ចំនួន ១០០ តោន មី​ ចំនួន ៣០០ កេស​ធំ និង​ទឹកបរិសុទ្ធ​ចំនួន ១០០០ កេស គិត​ជា​ទឹកប្រាក់​សរុប ៧៥០០០ ដុល្លារ​អាមេរិក​ដល់​សម្តេច​អគ្គមហាពញាចក្រី ហេង សំរិន ដើម្បី​ជួយ​ដល់​ប្រជាជន​ដែល​កំពុង​រងគ្រោះ​ដោយ​បាតុភូត​ធម្មជាតិ​ទឹកជំនន់​។

សម្តេច​អគ្គមហាពញាចក្រី ហេង សំរិន បាន​ចុះហត្ថលេខា​លើ​លិខិត​ថ្លែងអំណរគុណ​ដោយ​ផ្ទាល់​ជូន​ឯកឧត្តម​អ្នកឧកញ៉ា ចេន ហ្ស៊ី ដើម្បី​ថ្លែងអំណរគុណ​ចំពោះ​ទឹកចិត្ត​សប្បុរសធម៌​របស់​ឯកឧត្តម​អ្នកឧកញ៉ា ចេន ហ្ស៊ី​។

យោង​តាម​ព័ត៌មាន​ដែល​ចេញផ្សាយ​ដោយ​គណៈកម្មាធិការ​ជាតិ​គ្រប់គ្រង​គ្រោះមហន្តរាយ​កម្ពុជា​នៅ​ថ្ងៃទី ១៥ ខែ​តុលា​នេះ ខេត្ត​ក្រុង​ចំនួន ១៩ នៅ​ទូទាំង​ប្រទេស​ត្រូវ​បាន​រងគ្រោះ​ដោយ​ទឹកជំនន់​ដែល​បណ្តាល​ឱ្យ​មាន​មនុស្ស​ស្លាប់ ១៣ នាក់​ក្នុង​នោះ​មាន​កុមារ ៥ នាក់​។ ប្រជាជន​ចំនួន ១២.៣៧៦ នាក់​ត្រូវបាន​ជម្លៀសចេញ​ហើយ ១៩៣.២៦៨ នាក់​បាន​រង​ផលប៉ះពាល់​។

គួរ​បញ្ជាក់ថា ក្រុមហ៊ុន​ ព្រីនស៍ ហូលឌីង គ្រុប មាន​អាជីវកម្ម​គ្របដណ្តប់​លើ​វិស័យ​អចលនទ្រព្យ ធនាគារ ហិរញ្ញវត្ថុ អាកាសចរណ៍ ទេសចរណ៍ ឡូជីស្ទីក បច្ចេកវិទ្យា ភោជនីយដ្ឋាន ការកម្សាន្ត និង​វិស័យ​ផ្សេងៗ​ជាច្រើន​ទៀត ព្រមទាំង​ជា​សហគ្រាស​ចម្រុះ​ខ្នាត​ធំ​លំដាប់​កំពូល​នៅ​កម្ពុជា​ផងដែរ​។ បន្ថែម​ពីនេះ​អង្គការ​មូលនិធិ​សប្បុរសធម៌ ព្រីនស៍ រៀល អ៊ីស្ទេត ដែល​បង្កើតឡើង​ដោយ​ក្រុមហ៊ុន ព្រីនស៍ រៀល អ៊ីស្ទេត (​ខេមបូឌា​) គ្រុប បាន​រៀបចំ​សកម្មភាព​សប្បុរសធម៌​នៅ​កម្ពុជា​សរុប​ជាង ២៤០ លើក​ដែល​បាន​បរិច្ចាគ​ថវិកា​ និង​សម្ភារៈ​ជាង ៧,៧២ លាន​ដុល្លារ​អាមេរិក និង​ផ្តល់​អត្ថប្រយោជន៍​ដល់​ប្រជាជន​ជាង ៣២ ម៉ឺន​នាក់​៕