.jpg)
សាលាអន្តរជាតិ វេសវីយូ កម្ពុជាបានរៀបចំពិព័រណ៍ស្ទែមជាលើកដំបូងរបស់ខ្លួន ចំពោះកម្មវិធីសិក្សាលើមុខវិជ្ជា វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា) ដើម្បីលើកកម្ពស់ការយល់ដឹងអំពីសារៈសំខាន់នៃមុខវិជ្ជាទាំងនោះក្នុងចំណោមសិស្សានុសិស្សវ័យក្មេង។
សាលាមានបំណងលើកទឹកចិត្តដល់សិស្សានុសិស្សឱ្យផ្តោតលើមុខវិជ្ជាមួយចំនួនដូចជាគណិតវិទ្យា រូបវិទ្យា គីមីវិទ្យា និង ជីវវិទ្យា ដែលផ្តល់អត្ថប្រយោជន៍សម្រាប់អាជីពការងារនាពេលអនាគតរបស់ពួកគេ។
ឪពុកម្តាយក៏មានឱកាសបានចូលរួមសិក្ខាសាលា ក្រោមប្រធានបទ៖"វិធីសាស្ត្រជួយកូនៗឲ្យទទួលភាពជោគជ័យក្នុងការសិក្សា" ដែលរៀបចំ និងធ្វើបទបង្ហាញដោយលោកស្រី Melissa Ream ដែលជានាយិកាកម្មវិធីសិក្សា និងជាគ្រូដែលមានអាជ្ញាប័ណ្ណ និងបទពិសោធបង្រៀនរយៈពេល ១៥ ឆ្នាំមកពីសហរដ្ឋអាមេរិក។
ព្រឹត្តិការណ៍នោះត្រូវបានប្រារព្ធឡើងនៅឯបរិវេណសាលាដ៏ទំនើបដែលមានទីតាំងនៅជិតបរិវេណសាលាអន្តរជាតិ លើននីង ចាំងហ្គល (សាខាបឋមសិក្សា) កាលពីថ្ងៃទី ៤ ខែឧសភា ឆ្នាំ ២០១៩។ សាលាអន្តរជាតិ វេសវីយូ កម្ពុជា ត្រូវបានបង្កើតឡើងបន្តពីសាលាអន្តរជាតិ លើននីង ចាំងហ្គល ដែលបាននិងកំពុងផ្តល់នូវសេវាកម្មអប់រំប្រកបដោយគុណភាព និងទំនុកចិត្តនៅកម្រិតមត្តេយ្យសិក្សា និងបឋមសិក្សាអស់រយៈពេលប្រមាណ ៥ ឆ្នាំមកហើយ។
សាលាអន្តរជាតិនេះត្រូវបានស្ថាបនាឡើងដើម្បីផ្តល់កម្មវិធីសិក្សាពីកម្រិតថ្នាក់ទី ៧ ដល់ថ្នាក់ទី ១២ ដែលត្រូវបានបង្កើតឡើងដោយរួមបញ្ចូលគ្នារវាងកម្មវិធីស្តង់ដាអាមេរិក និងកម្មវិធីសិក្សាខ្មែរដែលត្រូវបានទទួលស្គាល់ និងទទួលបានអាជ្ញាប័ណ្ណពេញលេញពីក្រសួងអប់រំ យុវជន និងកីឡា៕ រូបថត ហេង ជីវ័ន
