ថ្ងៃទី ៣១ ខែសីហា គឺជាទិវាបុណ្យជាតិម៉ាឡេស៊ីខួបលើកទី ៦៣, ស្ថានទូតម៉ាឡេស៊ីប្រចាំរាជធានីភ្នំពេញបានរៀបចំពិធីជួបជុំតូចមួយនៅលើដំបូលនៃសណ្ឋាគារ Courtyard by Marriott ភ្នំពេញ ក្រោមប្រធានបទ «Raikan Kemerdekaan Malaysia»,«អបអរបុណ្យឯករាជ្យជាតិម៉ាឡេស៊ី»។ នៅក្នុងពិធីនោះ ឯកអគ្គរាជទូតម៉ាឡេស៊ីប្រចាំព្រះរាជាណាចក្រកម្ពុជា ឯកឧត្ដម Eldeen Husaini Mohd Hashim បានចូលរួមជាមួយប្រជាជនម៉ាឡេស៊ីចំនួន ៦៣ នាក់ ដែលជានិមិត្តរូបខួបលើកទី ៦៣ ឆ្នាំនៃទិវាបុណ្យឯករាជ្យជាតិរបស់ប្រទេសម៉ាឡេស៊ី។ វត្តមាននៅក្នុងពិធីនោះ មានមន្ត្រី និងបុគ្គលិកស្ថានទូតក៏ដូចជាអ្នកតំណាងជនជាតិម៉ាឡេស៊ីដែលត្រូវបានជ្រើសរើស រួមមានទាំងអ្នកដែលបានចូលរួមក្នុងព្រឹត្តិការណ៍ជិះកង់ និងម៉ូតូ «Merdeka Ride» ផងដែរ។ ឯកឧត្តមឯកអគ្គរាជទូតបានសង្កត់ធ្ងន់នៅក្នុងសុន្ទរកថារបស់ឯកឧត្តមអំពីការបោះជំហានដ៏ធំរបស់ប្រទេសម៉ាឡេស៊ីក្នុងរយៈពេល ៦៣ ឆ្នាំកន្លងមកនេះ ខណៈឯកឧត្តមក៏បានគូសបញ្ជាក់ថា ឆ្នាំនេះក៏ជាខួបលើកទី ៦៣ នៃការបង្កើតទំនាក់ទំនងការទូតរវាងប្រទេសម៉ាឡេស៊ី និងព្រះរាជាណាចក្រកម្ពុជាផងដែរ៕ រូបថត ហុង មិនា
