​ស្រប​តាម​ការ​អំពាវនាវ​របស់​នាយក​រដ្ឋមន្ត្រី​កម្ពុជា អ្នក​ឧកញ៉ា ចេន ហ្ស៊ី បរិច្ចាគ​ថវិកា​ចំនួន ៣ លាន​ដុល្លារ​អាមេរិក សម្រាប់​ទិញ​វ៉ាក់សាំង​កូវីដ​១៩ មក​ចាក់​ជូន​ប្រជាពលរដ្ឋ​

នៅថ្ងៃទី ៧ ខែធ្នូ ឆ្នាំ២០២០ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានណែនាំឯកឧត្តមរដ្ឋមន្រ្តី ក្រសួងសុខាភិបាល ម៉ម ប៊ុនហេង និង ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និង ហិរញ្ញវត្ថុ អូន ព័ន្ធមុនីរ័ត្ន ត្រៀមថវិកាសម្រាប់ការទិញវ៉ាក់សាំងកូវីដ១៩ ចំនួន ១ លានដូស ដើម្បីចាក់ជូនចំពោះអ្នកដែលធ្វើការនៅកន្លែងដែលមានហានិភ័យខ្ពស់ និង អ្នកដែលមានហានិភ័យ។

ក្រុមហ៊ុនព្រីនស៍ ហូល ឌីង គ្រុប តែងតែចូលរួមយ៉ាងសកម្មក្នុងការងារសង្គម និងដោយគិតគូរដល់ប្រជាពលរដ្ឋទាំងអស់ អ្នកឧកញ៉ា ចេន ហ្ស៉ី ប្រធានក្រុមប្រឹក្សាភិបាល ក្រុមហ៊ុនព្រីនស៍ ហូល ឌីង គ្រុប បានធ្វើការឆ្លើយតបយ៉ាងរហ័ស ដោយបរិច្ចាគថវិកា ៣ លានដុល្លារអាមេរិក ជូនសម្តេចតេជោ ហ៊ុន សែន នាយករដ្ឋមន្ត្រីកម្ពុជា ដើម្បីផ្តល់ជំនួយក្នុងការទិញវ៉ាក់សាំងកូវីដ១៩ ចំនួន ១ លានដូស។

សម្តេចតេជោ ហ៊ុន សែន បានចេញលិខិតថ្លែងអំណរគុណនៅថ្ងៃដដែលនោះ ជូនអ្នកឧកញ៉ា ចេន ហ្ស៊ី ដើម្បីសម្ដែងអំណរគុណនិងការកោតសរសើរចំពោះទឹកចិត្តសប្បុរសធម៌របស់អ្នកឧកញ៉ា ចេន ហ្ស៊ី។

លិខិតថ្លែងអំណរគុណមានខ្លឹមសារដូចខាងក្រោម៖

សម្តេចអគ្គមហាសេនាបតីតេជោ ហ៊ុន សែន

នាយករដ្ឋមន្ត្រី នៃព្រះរាជាណាចក្រកម្ពុជា

លិខិតថ្លែងអំណរគុណ

ជូនចំពោះ

អ្នកឧកញ៉ា ចេន ហ្ស៊ី ប្រធានក្រុមប្រឹក្សាភិបាលក្រុមហ៊ុន ព្រីនស៍ ហូលឌីង គ្រុប

ក្នុងនាមរាជរដ្ឋាភិបាលកម្ពុជា ខ្ញុំសូមថ្លែងអំណរគុណយ៉ាងជ្រាលជ្រៅចំពោះអ្នកឧកញ៉ា ដែលបានចូលរួមចំណែកជាថវិកាចំនួន ៣.០០០.០០០ (បីលាន) ដុល្លារអាមេរិក ដល់រាជរដ្ឋាភិបាលសម្រាប់ការរកទិញវ៉ាក់សាំងទប់ស្កាត់ជំងឺ COVID-19 ដើម្បីការពារអាយុជីវិតប្រជាជនកម្ពុជា។

ខ្ញុំសូមកោតសរសើរយ៉ាងស្មោះចំពោះមនសិកាដ៏ឧត្តុង្គឧត្តមរបស់អ្នកឧកញ៉ា។

សូមអ្នកឧកញ៉ា និង ក្រុមគ្រួសារ ព្រមទាំងសហការី បានជួបប្រទះតែនឹងពុទ្ធពរទាំងប្រាំប្រការ គឺ អាយុ វណ្ណៈ សុខៈ ពលៈ និងបដិភាណៈ កុំបីឃ្លៀងឃ្លាតឡើយ។

ថ្ងៃចន្ទ ៧រោច ខែមិគសិរ ឆ្នាំជូត ទោស័ក ព.ស២៥៦៤

រាជធានីភ្នំពេញ ថ្ងៃទី៧ ខែធ្នូ ឆ្នាំ២០២០

ហ៊ុន សែន

ក្រុមហ៊ុនព្រីនស៍ ហូលឌីង គ្រុប មានអាជីវកម្មគ្របដណ្តប់លើវិស័យអចលនទ្រព្យ ធនាគារ ហិរញ្ញវត្ថុ អាកាសចរណ៍ ទេសចរណ៍ ឡូជីស្ទីក បច្ចេកវិទ្យា ភោជនីយដ្ឋាន ការកម្សាន្ត និងវិស័យផ្សេងៗជាច្រើនទៀត ព្រមទាំងជាសហគ្រាសចម្រុះខ្នាតធំលំដាប់កំពូលនៅកម្ពុជាផងដែរ។ បន្ថែមពីនេះ អង្គការមូលនិធិសប្បុរសធម៌ព្រីនស៍ រៀល អ៊ីស្ទេត ដែលបង្កើតឡើងដោយក្រុមហ៊ុនព្រីនស៍ រៀល អ៊ីស្ទេត (ខេមបូឌា) គ្រុប បានរៀបចំសកម្មភាពសប្បុរសធម៌នៅកម្ពុជា សរុបជាង ២៤៨ លើក ដែលបានបរិច្ចាគជាថវិកានិងសម្ភារសរុបជាង ១១.២៩៣.០០០ ដុល្លារអាមេរិក និងផ្តល់អត្ថប្រយោជន៍ដល់ប្រជាជនជាង ៣២ ម៉ឺននាក់។