នៅក្នុងពិធីសម្ពោធដ៏រុងរឿងគ្រឿងអលង្ការដ៏ល្បីលំដាប់ពិភពលោក Pandora និងនាឡិកាដៃម៉ាក Bering បានបន្ថែមហាងថ្មីចំនួន ២ ទៀតនៅភ្នំពេញ ដែលជាការទាក់ទាញយ៉ាងខ្លាំងទៅលើម៉ាកទំនិញលំដាប់ពិភពលោក។
ក្រុមហ៊ុន សានដារ៉ា (Sandara) ដែលជាភ្នាក់ងារចែកចាយគ្រឿងអលង្ការម៉ាក Pandora និងនាឡិកាដៃម៉ាក Bering ចាប់ពីខែសីហាឆ្នាំនេះមានគម្រោងនាំមកសម្ភារប្រណីតដែលមានតម្លៃសមរម្យចែកជូនដល់ប្រជាជនជីវភាពថ្នាក់កណ្ដាលដែលកំពុងតែមានចំនួនកើនឡើងរាល់ថ្ងៃ។
សានដារ៉ា ជាក្រុមហ៊ុនដែលបង្កើតឡើងដោយការវិនិយោគថ្មីរវាងសម្ព័ន្ធសហគ្រាសចម្រុះកាណាឌីយ៉ាជាមួយ និងក្រុមហ៊ុន Negocia ដែលទទួលសិទ្ធិនាំយកគ្រឿងអលង្ការទាំង ២ ម៉ាកនេះមកចែកចាយនៅកម្ពុជា។
លោក John Lim ប្រធានគ្រប់គ្រងម៉ាកមានប្រសាសន៍ថា៖ «ទីផ្សារលក់រាយនៅប្រទេសកម្ពុជាមានការប្រកួតប្រជែងខ្ពស់ វាហាក់ដូចជាផ្ដល់ឱកាសតិចតួចបំផុតសម្រាប់ផលិតផលម៉ាកល្បីៗដែលកំពុងស្វែងរកទីផ្សារ។ ប្រជាជនកម្ពុជាមួយចំនួននិយមទិញផលិតផលម៉ាកល្បីៗក្នុងអំឡុងពេលដំណើរកម្សាន្ត ជាពិសេសតាមប្រទេសក្នុងតំបន់អាស៊ី» ៕