.jpg)
ក្រោយពីបានទទួលការគាំទ្រយ៉ាងច្រើនពីសំណាក់ទស្សនិកជននៅប្រទេសកម្ពុជាក្នុងការទស្សនាខ្សែភាពយន្ដថៃ ស្ថានតំណាងពាណិជ្ជកម្មប្រចាំស្ថានទូតថៃនៅរាជធានីភ្នំពេញបានរៀបចំមហោស្រពភាពយន្តថៃលើកទី ៣ ឆ្នាំ ២០១៨ (Thai Film Festival 2018) នៅរោងភាពយន្ត Major Platinum Cineplex ស្ថិតនៅផ្សារទំនើប Aeon សែនសុខកាលពីថ្ងៃទី ១៣ ខែកញ្ញា ឆ្នាំ ២០១៨ កន្លងទៅ។
ក្នុងថ្ងៃបើកសម្ពោធកម្មវិធីមហោស្រពភាពយន្តថៃលើកទី ៣ នេះមានវត្តមានលោក សោម សុគន្ធ រដ្ឋលេខាធិការក្រសួងវប្បធម៌ និងវិចិត្រសិល្បៈនៃព្រះរាជាណាចក្រកម្ពុជា លោក ប៉ាន់យ៉ារ៉ាក់ ភូនសាប់ ឯកអគ្គរាជទូត ថៃប្រចាំព្រះរាជាណាចក្រកម្ពុជា និងសិល្បករ សិល្បការិនីខ្មែរ និងថៃជាច្រើនរូបចូលរួមជាភ្ញៀវកិត្តិយសផងដែរ។
លោក ជីរ៉ាវុឍ សុណ្ណាអាត អគ្គទីប្រឹក្សាពាណិជ្ជកម្មប្រចាំស្ថានទូតថៃនៅរាជធានីភ្នំពេញបានមានប្រសាសន៍ថា “កម្មវិធីមហោស្រពភាពយន្តថៃលើកទី ៣ ឆ្នាំ ២០១៨ នេះធ្វើឡើងក្នុងគោលបំណងដើម្បីជំរុញកិច្ចសហប្រតិបត្តិការរវាងអ្នកផលិតខ្សែភាពយន្ត និងបណ្តាក្រុមហ៊ុនដែលពាក់ព័ន្ធជាមួយវិស័យឧស្សាហកម្មភាពយន្តរបស់ប្រទេសកម្ពុជា និងថៃ”។
គួរបញ្ជាក់ថាខ្សែភាពយន្តថៃចំនួន ៤ រឿងដែលចាក់បញ្ចាំងជូនទស្សនាដោយឥតគិតថ្លៃនៅក្នុងរោងភាពយន្ត Major Platinum Cineplex ផ្សារទំនើប Aeon សែនសុខកន្លងទៅមានដូចជា: "Memories of New Year" (អនុស្សាវរីយ៍ថ្ងៃចូលឆ្នាំ) “Premika Parab” (ខារ៉ាអូខេមរណៈ) “Siam Square” (ខ្មោចស្រីចាំអគារ) និងរឿងទី ៤ “Som Pak Sian (E-Sarn Love Story)” (រដឺនខកស្នេហ៍) ដែលក្នុងមួយលើកៗអាចផ្ទុកទស្សនិកជនបានចំនួន ២៦៦ នាក់៕ រូបថត ហុង មិនា
