កុកទេព ជាប្រភេទបក្សីដែលមានមាឌធំជាងគេលើសបក្សីនានានៅលើភពផែនដី។ វាមានកម្ពស់រហូតដល់ ១,៨៣ ម៉ែត្រនិងពេលត្រដាងស្លាបហើរ ពីចុងស្លាបម្ខាង ដល់ចុងស្លាបម្ខាងទៀតមានប្រវែងជាង ២ ម៉ែត្រ។ កុកទេពបានរស់នៅ និងកំពុងបន្តពូជពង្សនៅលើទឹកដីកម្ពុជា តាំងពីរាប់ពាន់ឆ្នាំរហូតមកទល់បច្ចុប្បន្ន។
យោងតាមស្ថិតិជំរឿនសត្វក្រៀលកាលពីចុងខែមករា ឆ្នាំ២០១៥ ថ្មីៗនេះ នៅតាម ៥តំបន់សំខាន់ៗនៃប្រទេស កម្ពុជា ដូចជា តំបន់ព្រែកល្ពៅ ក្នុងខេត្តតាកែវ អន្លង់ព្រីង ក្នុងខេត្តកំពត តំបន់ជុំវិញមាត់បឹងទន្លេសាប តំបន់អាងត្រពាំងថ្ម ខេត្តបន្ទាយមានជ័យ និងខេត្តព្រះវិហារ មានសត្វក្រៀលសរុបប្រមាណ ៥៥៥ ក្បាល ដែលនេះគឺជាតួលេខគួរជាទីមោទនៈសម្រាប់កម្ពុជា ខណៈដែលប្រទេសជិតខាងរបស់កម្ពុជាភាគច្រើនអត់មានវត្តមានវាទេ (គឺមាននៅវៀតណាមខាងត្បូង ឬដែនដីខ្មែរកម្ពុជាក្រោម ប្រមាណ១០-២០ ក្បាលប៉ុណ្ណោះ)។
ចំណែកតួលេខនៅទូទាំងពិភពលោក គឺមានប្រមាណ២ម៉ឺនក្បាលប៉ុណ្ណោះ កាលពីឆ្នាំ ២០១០។
ការនៅគង់វង្សនៃសត្វកុកទេពនេះ គឺដោយសារតែមានការយកចិត្តទុកដាក់ក្នុងការអភិរក្ស ពីសំណាក់រដ្ឋាភិបាលកម្ពុជា និងអង្គការក្រៅរដ្ឋាភិបាលមួយចំនួនដូចជា WCS, BirdLife, WWF, SVC។ ខ្លឹមសារ និងរូបថត ដោយ មឿន ញាណ