ចាប់បើកហើយ! ហាងលក់ទំនិញ 7-Eleven សាខាដំបូងគេបង្អស់ត្រូវបានបើកដំណើរការជាផ្លូវការនៅក្នុងព្រះរាជាណាចក្រកម្ពុជាហើយ។ ការបើកហាងលក់ទំនិញ 7-Eleven នេះឡើងគឺដើម្បីចូលរួមចំណែកលើកកម្ពស់បរិស្ថាន និងគាំទ្រដល់សហគមន៍ និងសង្គម ដោយផ្គត់ផ្គង់នូវផលិតផល និងសេវាកម្មដែលមានគុណភាពតាមកម្រិតស្តង់ដារ។
នេះគឺជាជំហានមួយដ៏មានសារៈសំខាន់របស់ ស៊ីភី អល ក្នុងការពង្រីកវិសាលភាពរបស់ខ្លួនក្នុងតំបន់អាស៊ាន និងបានបង្ហាញពីភាពរឹងមាំនៃការផ្តល់ជូនសេវាកម្មពីប្រទេសថៃជូនដល់អតិថិជនកម្ពុជា ដោយផ្តោតជាសំខាន់លើការធ្វើអាជីវកម្ម ព្រមជាមួយនឹងការបង្កើតគុណតម្លៃដល់សង្គម ស្របតាមចក្ខុវិស័យ «ការផ្តល់ជូន និងការចែករំលែកឱកាស»។
លោក ឆោមរុំ ជិនឆៃ នាយកគ្រប់គ្រងក្រុមហ៊ុន ស៊ីភី អល ខេមបូឌា បានមានប្រសាសន៍ថា៖ «យោងតាមក្រុមហ៊ុន ស៊ីភី អល (ខេមបូឌា) ឯ.ក ដែលជាបុត្រសម្ព័ន្ធ មិនផ្ទាល់មួយរបស់ ស៊ីភី អល បានចុះកិច្ចព្រមព្រៀងធ្វើអាជីវកម្មផ្តាច់មុខ ដើម្បីប្រតិបត្តិការហាងលក់ទំនិញ 7-Eleven នៅកម្ពុជាជាមួយក្រុមហ៊ុន 7-Eleven Inc ចាប់តាំងពីឆ្នាំមុនមកម្ល៉េះ។ ថ្មីៗកន្លងទៅនេះ កាលពីថ្ងៃទី ៣០ ខែសីហា ឆ្នាំ ២០២១ ហាងលក់ទំនិញ 7-Eleven មួយសាខានៅកម្ពុជា បានបើកបម្រើសេវាកម្មជូនអតិថិជនជាផ្លូវការហើយ។ សាខាជ្រោយចង្វារ គឺជាសាខាដំបូងបង្អស់ ដែលស្ថិតនៅក្នុងរាជធានីភ្នំពេញជាបេះដូងនៃព្រះរាជាណាចក្រកម្ពុជាបានរៀបចំពិធីបើកសម្ពោធក្នុងលក្ខណៈយ៉ាងសាមញ្ញ។ ពិធីបើកសម្ពោធនេះបានរៀបចំឡើង ស្របតាមតាមស្ថានការណ៍នាពេលបច្ចុប្បន្ន នៅពេលព្រឹកវេលាម៉ោង ០៩:១៩ នាទី ដោយមានការចូលរួមក្រោមអធិបតីភាពលោកជំទាវ តោ ពិឡា ទីប្រឹក្សានៃក្រសួងពាណិជ្ជកម្មនៃព្រះរាជាណាចក្រកម្ពុជា, លោក ជីរ៉ាវុឌ្ឍ សុវណ្ណាអាត កុងស៊ុលផ្នែកពាណិជ្ជកម្មនៃស្ថានឯកអគ្គរាជទូតថៃប្រចាំព្រះរាជាណាចក្រកម្ពុជា និងលោកបណ្ឌិត ស៊ុផាឆៃ វើរ៉ាភូឈុង អនុប្រធានសមាគមមិត្តភាពកម្ពុជា-ថៃ»។
លោក ឆោមរុំ មានប្រសាសន៍បន្ថែមថា៖ «ការបើកសម្ពោធសាខាដំបូងគេបង្អស់នៃហាងលក់ទំនិញ 7-Eleven នៅកម្ពុជានៅថ្ងៃនេះគឺជានិមិត្តរូបដ៏សំខាន់នៃចំណងមិត្តភាព និងទំនាក់ទំនងរវាងប្រទេសទាំងពីរ ទាំងរវាងរាជរដ្ឋាភិបាល ក៏ដូចជារវាងប្រជាជនផងដែរ។ ជាមួយគ្នានេះ វាគឺជាចំណុចចាប់ផ្តើមនៃ ស៊ីភី អល ហ្គ្រុប ក្នុងការធ្វើឱ្យប្រសើរឡើងនូវគុណភាពជីវិតរបស់ប្រជាជនកម្ពុជា ដោយការផ្តល់ជូននូវផលិតផល និងសេវាកម្ម ដែលមានគុណភាព»។
ក្រុមហ៊ុន ស៊ីភី អល (ខេមបូឌា) ក៏មានគម្រោងផងដែរនឹងបើកឱ្យដំណើរការ សាខាហាងលក់ទំនិញ 7-Eleven នៅក្នុងតំបន់មួយចំនួនទៀត ដើម្បីបំពេញតាមតម្រូវការសមស្រប និងបរិស្ថានដែលមានការប្រែប្រួលជានិច្ច ។ ជាមូលដ្ឋាន សាខាជ្រោយចង្វារ ផ្តល់ជូននូវផលិតផលមានគុណភាពជាង ២ ០០០ មុខរាប់បញ្ចូលទាំងភេសជ្ជៈម៉ីនុយពិសេសប្រចាំហាង គឺទឹកកកព្រិល ស្លឺបភី ក៏ដូចជាភេសជ្ជៈឆុងថ្មីៗ ក្រោមស្លាកសញ្ញា អល កាហ្វេ ក៏ជាជម្រើសជូនដល់អតិថិជនផងដែរ ។ ក្នុងពេលអនាគតនឹងមានការបណ្តុះបណ្តាល ព្រមទាំងការអភិវឌ្ឍផលិតផល ដើម្បីបំពេញតាមឥរិយាបទរបស់អតិថិជន និងដើម្បីទទួលបានការពេញនិយមពីប្រជាជនកម្ពុជា ដោយតែងតែផ្តល់ជូននូវការពេញចិត្តខ្ពស់បំផុតជូនដល់អតិថិជន៕