ក្រុមហ៊ុន Mekong Big Data (MBD) និង DataU Academy នៅថ្ងៃទី ៨ ខែវិច្ឆិកានេះ បានចុះហត្ថលេខាលើភាពជាដៃគូជាមួយក្រុមហ៊ុនបច្ចេកវិទ្យាយក្សអូស្ត្រាលី Atlassian ដោយនៅក្រោមកិច្ចព្រមព្រៀងនេះក្រុមហ៊ុន MBD នឹងក្លាយជាអ្នកតំណាងផលិតផលរបស់ក្រុមហ៊ុន Atlassian នៅកម្ពុជា និងជួយដល់អតិថិជនដែលកំពុងប្រើផលិតផលរបស់របស់ Atlassian និងអតិថិជនដែលមានបំណងចង់ប្រើប្រាស់ ដើម្បីទទួលបាននូវអត្ថប្រយោជន៍កាន់តែប្រសើរលើផលិតផល និង Tool បច្ចេកវិទ្យាទំនើបៗសម្រាប់សហគ្រាស។
Atlassian បានអភិវឌ្ឍ Software និង tool ដែលពេញនិយមប្រើទូទាំងពិភពលោករួមមាន JIRA, Confluence និង Trello ជាដើម ដើម្បីជួយដល់ក្រុមអ្នកជំនាញ និងក្រុមហ៊ុនបច្ចេកវិទ្យាកំពូលៗមកពីជុំវិញពិភពលោកឱ្យទទួលបានលទ្ធផលកាន់តែប្រសើរ។ ៨៣ % នៃក្រុមហ៊ុនធំបំផុតទាំង ៥០០ នៅលើពិភពលោកដែលហៅកាត់ថា Fortune 500 កំពុងប្រើប្រាស់ Jira Software ដើម្បីជួយផ្តល់ភាពងាយស្រួល និងបង្កើនប្រសិទ្ធិភាពការងារដល់ក្រុម Agile និង Scrum របស់ពួកគេ ព្រមទាំងប្រើប្រាស់លើគម្រោងជាច្រើនផ្សេងទៀតឱ្យសម្រេចលទ្ធផលបានកាន់តែល្អ និងឆាប់រហ័ស។
Atlassian ស្ថិតក្នុងចំណោមក្រុមហ៊ុនដំបូងគេក្នុងលោកដែលបានត្រួសត្រាយផ្នែក «Development Operation» ឬហៅកាត់ថា «DevOps»។ កញ្ចប់ Framework របស់ Atlassian អាចជួយឱ្យផ្នែកជំនាញ IT គ្រប់គ្រងលើធនធានមនុស្ស កិច្ចដំណើរការ និងបច្ចេកវិទ្យានានារបស់ក្រុមហ៊ុន ហើយបច្ចុប្បន្នបានក្លាយជាជម្រើសឈានមុខគេដែលក្រុមហ៊ុនបច្ចេកវិទ្យាកំពូលៗនៅជុំវិញពិភពលោកកំពុងប្រើប្រាស់។ DevOps ជួយដល់ក្រុមអ្នកបច្ចេកទេសបង្កើតនូវផលិតផលបច្ចេកវិទ្យាដែលមានគុណភាព និងបង្កើនលទ្ធផលការងារល្អប្រសើរជូនដល់អតិថិជន ដោយកាត់បន្ថយបញ្ហាបានយ៉ាងច្រើន កែលម្អបានកាន់តែប្រសើរ និងអនុវត្តបានឆាប់រហ័ស។
DataU Academy ត្រូវបាន Atlassian មើលឃើញថាជាថ្នាលអភិវឌ្ឍជំនាញឌីជីថលដែលមានភាពច្នៃប្រឌិត និងគាំទ្រការបង្កើតវគ្គបណ្តុះបណ្តាលថ្មីពាក់ព័ន្ធនឹង Scrum Master, Product Ownership, Agile Mindset និង Jira Engineering ឈានមុខគេនៅកម្ពុជា។ កម្មវិធីដែលជាកិច្ចសហប្រតិបត្តិការជាមួយគ្នានេះនឹងលេចចេញជារូបរាងនៅដើមឆ្នាំ ២០២២ ដើម្បីជួយដល់ក្រុមហ៊ុននានានៅកម្ពុជាវិនិយោគលើកម្មវិធីបច្ចេកវិទ្យាល្អបំផុត។
ក្រៅពីជួយគាំទ្រដល់ការអនុវត្ត និងការប្រើប្រាស់កម្មវិធីរបស់ Atlassian កិច្ចសហប្រតិបត្តិការនេះ ក៏នឹងជួយដល់ក្រុមហ៊ុនអតិថិជនរបស់ Atlassian ទាំងអស់នៅកម្ពុជា កាត់បន្ថយការចំណាយបានមួយផ្នែកទៅលើការទូទាត់វិកយប័ត្រដែលនឹងធ្វើនៅក្នុងស្រុកជំនួសវិញ។
សម្រាប់ព័ត៌មានបន្ថែម សូមទាក់ទងមកកាន់ Mekong Big Data តាមរយៈអ៊ីមែល info@mekongbigdata.com៕