ភោជនីយដ្ឋាន អ៊ុយ គុយទាវ សាខាថ្មី ស្ថិតនៅលើផ្លូវទន្លេបាសាក់ផាក កំពុងផ្តល់ជូននូវមុខម្ហូបថ្មីៗដ៏ឈ្ងុយឆ្ងាញ់ និងការតុបតែងយ៉ាងល្អប្រណីត ដើម្បីទាក់ទាញភ្ញៀវដែលមកទទួលទានអាហារនៅតំបន់កោះពេជ្រនៃរាជធានីភ្នំពេញ ហើយទទួលបានការអបអរពីសមាជិកនៃសមាគមចុងភៅកម្ពុជារួចហើយ។ បទពិសោធនៃការទទួលទានអាហារនៅភោជនីយដ្ឋាន អ៊ុយ គុយទាវ ទន្លេបាសាក់ ទទួលបានការគាំទ្រពីសមាជិកសមាគមចុងភៅ ដែលបានមកកាន់ភោជនីយដ្ឋានសាខាថ្មីនេះ កាលពីថ្ងៃអង្គារ ដើម្បីទទួលទានអាហារពេលព្រឹកដ៏ឈ្ងុយឆ្ងាញ់ជាមួយលោក លូ ម៉េង ដែលជាមេចុងភៅ និងជានាយកប្រតិបត្តិនៃក្រុមហ៊ុន Almond Hospitality ដែលគ្រប់គ្រងយីហោ អ៊ុយ គុយទាវ។ បរិយាកាសទទួលទានអាហារដ៏មានផាសុខភាពនៅភោជនីយដ្ឋាន អ៊ុយ គុយទាវ ទន្លេបាសាក់ ត្រូវបានរៀបចំ និងបញ្ចូលការច្នៃចេញពីរចនាប័ទ្មបែបខ្មែរបុរាណ និងសម័យទំនើប និងបន្ថែមការតុបតែងបង្អួចបែបសហសម័យនៃផ្ទះបែបខ្មែរដ៏ស្រស់ស្អាត។ ចំណុចសំខាន់នៃការរចនាផ្សេងទៀតរួមមានកៅអីដ៏មានផាសុខភាព ហើយផែនទីប្រទេសកម្ពុជាដែលដាក់តាំងក្នុងភោជនីយដ្ឋាន ត្រូវបានរៀបចំច្នៃប្រឌិតដ៏ល្អ ដើម្បីផ្សព្វផ្សាយបន្ថែមពីផលិតផលក្នុងស្រុក តាមបណ្តាខេត្តនីមួយៗ ដែលជាប្រភពនៃគ្រឿងផ្សំរបស់ភោជនីយដ្ឋាន អ៊ុយ គុយទាវ។ ភោជនីយដ្ឋានដែលមាន ៣៤ កៅអី ដ៏គួរឱ្យទាក់ទាញនេះ មានទីតាំងស្ថិតនៅផ្លូវទន្លេបាសាក់ផាក ជិះប្រហែល ១ នាទីពីស្ពានឥន្ទធនូ កោះពេជ្រ ដែលជាទីតាំងដែលមានភាពងាយស្រួលស្វែងរក។ បច្ចុប្បន្ន ភោជនីយដ្ឋាន អ៊ុយ គុយទាវ មាន ២ សាខា គឺ សាខាមហាវិថីកម្ពុជាក្រោម និងសាខាទន្លេបាសាក់៕ រូបថត ហេង ជីវ័ន