.jpg)
វិទ្យាស្ថាន ខេមអេដប៊ីហ្សនេសស្គូលកាលពីថ្ងៃទី ៤-៥ ខែធ្នូឆ្នាំ ២០២១ បានរៀបចំពិធីចែកសញ្ញាបត្រជូនដល់និស្សិត ដែលបានប្រលងបញ្ចប់ការសិក្សាលើកម្មវិធី ACCA CAT និងថ្នាក់បរិញ្ញាបត្រ BA+CAT សម្រាប់ ឆ្នាំ ២០២០ នៅសណ្ឋាគារសូហ្វីតែលភ្នំពេញភូគីត្រាក្រោមអធិបតីភាពដ៏ខ្ពង់ខ្ពស់របស់ឯកឧត្តមបណ្ឌិត ងី តាយី រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មការគ្រប់គ្រងកម្មវិធីកម្មវិធីសិក្សាគណនេយ្យករជំនាញកម្ពុជា និងជាប្រធានគណៈកម្មការចុះឈ្មោះ និងជាសមាជិកភាពវិទ្យាស្ថានគណនេយ្យករជំនាញ និងសវនករកម្ពុជា និងមានការចូលរួមពីសំណាក់លោកនាយកវិទ្យាស្ថានខេមអេដប៊ីហ្សនេសស្គូល ស្ថាប័ន ACCA កម្ពុជាសាស្ត្រាចារ្យនិយោជកនិស្សិត និងអាណាព្យាបាលជាច្រើនរូបទៀត។ ពិធីចែកសញ្ញាបត្រនេះត្រូវបានរៀបចំឡើងដោយបែងចែកនិស្សិតទទួលសញ្ញាបត្រជាក្រុមតូចៗដោយរក្សាគម្លាតសុវត្ថិភាព ដើម្បីចូលរួមទប់ស្កាត់ការឆ្លងវីរុសកូវីដ ១៩ ស្របតាមវិធានការណ៍សុវត្ថិភាព និងសុខភាពរបស់ក្រសួងសុខាភិបាលប្រទេសកម្ពុជា។
នៅក្នុងពិធីនោះលោក ខេស៊ីបាណេត នាយកវិទ្យាស្ថានខេមអេដប៊ីហ្សនេសស្គូលបានមានប្រសាសន៍ថាចាប់តាំងពីឆ្នាំ ២០០៣ មកវិទ្យាស្ថាន ខេមអេដប៊ីហ្សនេសស្គូល សហការជាមួយក្រសួងសេដ្ឋកិច្ច និងហិរញ្ញវត្ថុបានបណ្តុះបណ្តាលនិស្សិតជាច្រើនជំនាន់រួចមកហើយ។ ក្នុងរយៈពេល ២១ ឆ្នាំនេះវិទ្យាស្ថាន ខេមអេដប៊ីហ្សនេសស្គូលបានខិតខំយ៉ាងខ្លាំង ដើម្បីបង្កើតកាលានុវត្តភាពដល់និស្សិត និងសាធារណៈជនទូទៅដែលសិក្សានៅវិទ្យាស្ថានដោយយកគុណភាពជាចម្បងជាពិសេសចំពោះគុណភាពគ្រូបង្រៀន និងកម្មវិធីសិក្សា ដើម្បីអោយស្របទៅនឹងមាត្រដ្ឋានជាតិ និងអន្តរជាតិ។ លោកបានបន្តទៀតថាប្រព័ន្ធគណនេយ្យ និងហិរញ្ញវត្ថុគឺជាផ្នែកដ៍សំខាន់មួយនៃហេដ្ឋារចនាសម្ព័ន្ធសេដ្ឋកិច្ច។
នាឱកាសដ៏មានអត្ថន័យនោះដែរឯកឧត្តមបណ្ឌិត ងី តាយី បានមានប្រសាសន៍ថាឯកឧត្តមពិតជាមានសេចក្តីរំភើបជាមួយប្អូនៗដែលទទួលបានជយលាភីក្នុងការសិក្សាថ្នាក់គណនេយ្យករជំនាញ និងអ្នកបច្ចេកទេសគណនេយ្យ។ ភាពជោគជ័យរបស់ប្អូនៗក្មួយៗគឺជាជោគជ័យរបស់គ្រួសាររបស់វីជ្ជាជីវៈគណនេយ្យ និងសវនកម្ម និងរបស់សង្គមជាតិទាំងមូល។ ឯកឧត្តមបានសង្កត់ធ្ងន់ថាវិទ្យាស្ថាន ខេមអេដប៊ីហ្សនេសស្គូលពិតជាបានដើរតួយ៉ាងសំខាន់ក្នុងវិស័យគណនេយ្យ និងហិរញ្ញវត្ថុក្នុងព្រះរាជាណាចក្រកម្ពុជាតាមរយៈការបង្កើតធនធានមនុស្សដែលប្រកបដោយវិជ្ជាជីវៈច្បាស់លាស់ ដើម្បីបម្រើក្នុងវិស័យ ៣ ក្នុងសេដ្ឋកិច្ចរបស់កម្ពុជា។
បន្ថែមពីនេះទៅទៀតឯកឧត្តមក៏បានលើកឡើងថាភាពជោគជ័យដែលវិទ្យាស្ថានដែលទទួលបានក៏អាស្រ័យទៅនឹងការចូលរួមពីសំណាក់វិស័យឯកជននិងរដ្ឋក៏ដូចជាវិទ្យាស្ថានខ្លួនឯងផ្ទាល់ផងដែររួមមានសាស្ត្រាចារ្យដែលប្រកបដោយគុណវឌ្ឍន៍គណៈគ្រប់គ្រងសាលា និងបុគ្គលិកផ្សេងៗទៀត ដើម្បីបណ្ដុះបណ្ដាលអាជីពនេះឱ្យកាន់តែបានលទ្ធផលល្អ និងប្រសើរជាងមុន។ ឯកឧត្តមក៏បានលើកសរសើរដល់វិទ្យាស្ថានខេមអេដដែលបានតែងតែខិតខំពង្រឹងគុណភាពអប់រំរបស់ខ្លួនឱ្យលេចធ្លោទាំងក្នុង និងក្រៅប្រទេសតាមរយៈការទទួលស្គាល់គុណភាពអប់រំរបស់វិទ្យាស្ថានដូចជាការទទួលស្គាល់ពី ASEAN University Network-Quality Assurance (AUN-QA) និងតាមរយៈ QS Stars Rating System ជាដើម៕
