.jpg)
ក្រុមហ៊ុន Yeo’s ប្រចាំប្រទេសកម្ពុជា ដែលជាក្រុមហ៊ុន ភេសជ្ជៈឈានមុខគេនៅអាស៊ី កាលពីថ្ងៃទី១៧ ខែធ្នូ ឆ្នាំ ២០២១ បានរៀបចំពីធីប្រកាសកិច្ចសហការជាមួយអង្គការមូលនិធិកុមារកម្ពុជា (CCF) ដែលជាអង្គការមិនរកប្រាក់ចំណេញ ក្នុងការកសាងសាលាមត្តេយ្យថ្មីសម្រាប់កុមារក្រីក្រ ដែលរស់នៅខណ្ឌមានជ័យ ជាអតីតទីលានចាក់សំរាម។ ការសាងសង់សាលាមត្តេយ្យនេះ នឹងចាប់ផ្តើមនៅ ដើមឆ្នាំ២០២២ ខាងមុខ ដែលសាលានេះនឹងក្លាយជាសាលាមត្តេយ្យទី ២ នៅ CCF។ កម្មវិធីទទួលខុសត្រូវសង្គម (CSR) នេះត្រូវបានរៀបចំឡើងក្នុងគោលបំណងបង្កើនការអភិវឌ្ឍប្រកបដោយចីរភាពសម្រាប់កុមារ និងគ្រួសាររបស់ពួកគេ ដែលរស់នៅក្នុងសហគមន៍ក្រីក្រ។ ក្រុមហ៊ុន Yeo’s បានធ្វើការបរិច្ចាគថវិកា ៥ ម៉ឺនដុល្លារអាមេរិក ក្នុងការកសាងសាលាមត្តេយ្យថ្មីនេះ ដែលនឹងផ្តល់ឱកាសឱ្យកុមារតូចៗ ដែលបច្ចុប្បន្នមិនអាចទទួលការសិក្សានៅសាលាបាន។ តាមរយៈកិច្ចសហការគ្នានេះ ក្រុមហ៊ុន Yeo''s និង CCF សង្ឃឹមថាកុមារទាំងនេះ នឹងអាចទទួលបានការអប់រំ ដែលពួកគេសមនឹងទទួលបាន ព្រមទាំងអាចទទួលបានជំនាញ ដែលពួកគេត្រូវការដើម្បីជួយពួកគេឱ្យរួចផុតពីបន្ទាត់នៃភាពក្រីក្រ៕
