លោកនាយករដ្ឋមន្ត្រី ហ៊ុន សែន បានអញ្ជើញជាអធិបតីបើកវេទិកាទេសចរណ៍អាស៊ាន លើកទី ៤០ (ATF 2022) នៅសណ្ឋាគារឆ្នេរសុខា ខេត្តព្រះសីហនុ កាលពីថ្ងៃពុធសប្តាហ៍មុន ខណៈព្រឹត្តិការណ៍ដ៏ធំមួយនេះ ទទួលបានការអញ្ជើញចូលរួមពីគណៈប្រតិភូជាច្រើនមកពីទូទាំងតំបន់អាស៊ីអាគ្នេយ៍។ ការធ្វើជាម្ចាស់ផ្ទះនៃព្រឹត្តិការណ៍ថ្នាក់តំបន់ដ៏សំខាន់បំផុត ដែលគិតចាប់តាំងពីការរឹតបន្តឹងបញ្ហាជំងឺកូវីដត្រូវបានបន្ធូរបន្ថយ គឺស្របជាមួយនឹងការធ្វើជាប្រធានអាស៊ានរបស់កម្ពុជានៅក្នុងឆ្នាំនេះដែរ។
វេទិការទេសចរណ៍អាស៊ាន (ATF) ត្រូវបានបើកសម្ពោធយ៉ាងអធិកអធម ក្រោមអធិបតីភាពដ៏ខ្ពស់ខ្ពស់ លោកនាយករដ្ឋមន្ត្រី ហ៊ុន សែន, រដ្ឋមន្ត្រីក្រសួងទេសចរណ៍ ឯកឧត្តម ថោង ខុន និងគណៈប្រតិភូទេសចរណ៍មកពីតំបន់អាស៊ាន រួមទាំងភ្ញៀវកិត្តិយស ក៏ដូចជាស្ថាប័នសារព័ត៌មានជាតិ និងអន្តរជាតិជាច្រើនរូបទៀត។ នៅក្នុងពិធីដ៏ឳឡារិកនោះមានការថ្លែងសុន្ទរកថាស្វាគមន៍ពីលោកនាយករដ្ឋមន្ត្រី ហ៊ុន សែន និងរដ្ឋមន្ត្រីក្រសួងទេសចរណ៍។ ក្នុងពិធីនោះក៏ការរាំរបាំអប្បរា និងការបាញ់ការបាញ់កាំជ្រួចអបអរ និងម្ហូបអាហារដ៏ឈ្ងុយឆ្ងាញ់ផងដែរ។
លោកនាយករដ្ឋមន្ត្រី ហ៊ុន សែន នៅក្នុងពិធីបើកវេទិកាទេសចរណ៍អាស៊ាន (ATF 2022) បានមានប្រសាសន៍ថា៖« ក្នុងនាមប្រជាជន និងរាជរដ្ឋាភិបាលកម្ពុជា ខ្ញុំសូមសម្តែងនូវអំណរគុណជូនចំពោះឯកឧត្តម លោកជំទាវ រដ្ឋមន្ត្រី និងថ្នាក់ដឹកនាំទេសចរណ៍អាស៊ាន ថ្នាក់ដឹកនាំអង្គការទេសចរណ៍ពិភពលោក សមាគមទេសចរណ៍ដៃគូអាស៊ាន និងក្រុមហ៊ុនទេសចរណ៍ជាតិ និងអន្តរជាតិនានា ដែលបានគាំទ្រកម្ពុជាក្នុងការរៀបចំវេទិកាទេសចរណ៍អាស៊ាន ២០២២ លើកទី ៤០ នេះ»។
«ក្នុងនាមជាប្រធានអាស៊ាន លើកទី ៣ ក្នុងឆ្នាំ ២០២២ នេះ កម្ពុជានឹងលើកកម្ពស់ ពន្លឿន និងធ្វើសុខដុមនីយកម្មរាល់កិច្ចខិតខំប្រឹងប្រែងស្តារឡើងវិញលើគ្រប់វិស័យ ដើម្បីកសាងសហគមន៍អាស៊ានប្រកបដោយបរិយាប័ន្ន ចីរភាព និងភាពធន់ ក្រោយវិបត្តិនៃជំងឺកូវីដ ១៩ ស្របតាមមូលបទ «អាស៊ានរួមគ្នាធ្វើដោះស្រាយបញ្ហាប្រឈមទាំងអស់គ្នា» (ASEAN: Addressing Challenges Together)»។
នៅព្រឹកបន្ទាប់ លោកនាយករដ្ឋមន្ត្រីបានអញ្ជើញកាត់ខ្សែបូសម្ពោធជាផ្លូវការ ពិព័រណ៍ទេសចរណ៍អន្តរជាតិ Travex។ ពិព័រណ៍ទេសចរណ៍ TRAVEX នោះដែរ មានអ្នកលក់ចំនួន ១៨៧ ស្តង់ អ្នកទិញចំនួន ៤០ ក្រុមហ៊ុន សារព័ត៌មានជាតិ-អន្តរជាតិចំនួន ២០ និងភ្ញៀវចូលរួមប្រមាណ ៣២២ នាក់ មកពី ២៧ ប្រទេសបានចូលរួម៕ photos heng chivoan