សៀមរាប បណ្ណាល័យ (Siem Reap Bannalay) ដែលជាបណ្ណាល័យសាធារណៈ និងជាមជ្ឈមណ្ឌលវប្បធម៌ ត្រូវបានបើកដំណើរការនៅថ្ងៃទី ២៣ ខែមករា ដើម្បីបណ្តុះទម្លាប់អាន និងលើកកម្ពស់ការយល់ដឹងអំពីសិល្បៈ និងវប្បធម៌ សម្រាប់សាធារណៈជននៅក្នុងសង្គម។ ក្រៅពីមានសៀវភៅដ៏ច្រើនសន្ធឹកសន្ធាប់ មជ្ឈមណ្ឌលដែលទើបបង្កើតថ្មីនេះក៏មានបង្រៀនផ្នែកតន្ត្រី របាំ និងសិល្បៈផងដែរ។ សាធារណៈជនអាចចូលអានសៀវភៅដែលមានប្រហែល ៤ ០០០ ក្បាល ទាំងជាភាសាខ្មែរ និងភាសាអង់គ្លេស ក្នុងនោះក៏មានសៀវភៅស្តីពីរឿងរ៉ាវអន្តរជាតិ និងសៀវភៅសម្រាប់កុមារផងដែរ។ សៀវភៅជាភាសាខ្មែរត្រូវបានឧបត្ថម្ភដោយអង្គការក្រៅរដ្ឋាភិបាលអប់រំរបស់បារាំង និងអង្គការ Sipar និង Reading Book Cambodia ដែលជាគ្រឹះស្ថានបោះពុម្ពមួយទៀតនៅក្នុងព្រះរាជាណាចក្រកម្ពុជា៕