នាយករដ្ឋមន្ត្រីម៉ាឡេស៊ី ឯកឧត្តម អ៊ីស្មាអែល សាប្រ៊ី ប៊ីន យ៉ាកុប បានអញ្ជើញមកមកបំពេញទស្សនកិច្ចនៅកម្ពុជា ដើម្បីពង្រឹងទំនាក់ទំនងឱ្យកាន់តែស៊ីជម្រៅរវាងប្រទេសទាំង ២ និងជួបពិភាក្សាការងារជាមួយលោកនាយករដ្ឋមន្ត្រី ហ៊ុន សែន។ ដំណើរទស្សនកិច្ចរបស់នាយករដ្ឋមន្ត្រីម៉ាឡេស៊ីនេះគឺធ្វើឡើងស្របពេលដែលកម្ពុជាធ្វើជាប្រធានអាស៊ានក្នុងឆ្នាំនេះ ខណៈប្រទេសម៉ាឡេស៊ីគឺជាសមាជិកស្ថាបនិកមួយនៃប្លុកសេដ្ឋកិច្ចក្នុងតំបន់ដែលមានសមាជិក ១០ ប្រទេសនេះ។ ដំណើរទស្សនកិច្ចផ្លូវការនេះក៏ជួយពង្រឹងបន្ថែមដល់ទំនាក់ទំនង ខណៈប្រទេសទាំង ២ ប្រារព្ធខួបលើកទី ៦៥ នៃការបង្កើតទំនាក់ទំនងការទូតនៅឆ្នាំនេះ។ ក្នុងដំណើរទស្សនកិច្ចរយៈពេល ២ ថ្ងៃ ចាប់ពីថ្ងៃទី ២៣ ដល់ ២៤ ខែកុម្ភៈ ឯកឧត្តមបានអញ្ជើញដាក់កម្រងផ្កាគោរពវិញ្ញាណក្ខន្ធនៅវិមានឯករាជ្យ និងនៅមណ្ឌប ព្រះករុណា ព្រះបាទសម្ដេចព្រះនរោត្ដមសីហនុ «ព្រះបរមរតនកោដ្ឋ» អតីតព្រះមហាក្សត្រនៃព្រះរាជាណាចក្រកម្ពុជា និងជំនួបទ្វេភាគីជាមួយលោកនាយករដ្ឋមន្ត្រី ហ៊ុន សែន នៅវិមានសន្តិភាព នៅថ្ងៃព្រហស្បតិ៍។
លោកនាយករដ្ឋមន្ត្រី ហ៊ុន សែន ហ៊ុន សែន ក៏បានរៀបចំពិធីជប់លៀងជូនដល់នាយករដ្ឋមន្ត្រីម៉ាឡេស៊ីផងដែរ។ ឯកឧត្តម អ៊ីស្មាអែល សាប្រ៊ី បានចូលក្រាបបង្គំគាល់ព្រះបាទសម្តេច ព្រះបរមនាថ នរោត្តម សីហមុនី ព្រះមបាក្សត្រនៃព្រះរាជាណាចក្រកម្ពុជា នៅព្រះបរមរាជវាំង និងចូលជួបសម្តែងការគួរសមជាមួយសម្តេចវិបុលសេនាភក្តី សាយ ឈុំ ប្រធានព្រឹទ្ធសភា និងសម្តេចអគ្គមហាពញាចក្រី ហេង សំរិន ប្រធានរដ្ឋសភា។
នៅក្នុងពិធីពិសាអាហារពេលល្ងាចកាលពីថ្ងៃពុធជាមួយសហគមន៍ម៉ាឡេស៊ី ដែលកំពុងធ្វើការនិងរស់នៅក្នុងប្រទេសកម្ពុជា ឯកឧត្តមបានបង្ហាញអំពីទំនាក់ទំនងទ្វេភាគីដ៏រឹងមាំរវាងប្រទេសទាំង ២។ ខណៈបច្ចុប្បន្នមានជនជាតិម៉ាឡេស៊ីប្រមាណ ៥ ០០០ នាក់ កំពុងរស់នៅក្នុងប្រទេសកម្ពុជា និងមានក្រុមហ៊ុនប្រហែល ៥០០ កំពុងប្រតិបត្តិការក្នុងវិស័យជាច្រើនរាប់ចាប់ពីវិស័យហិរញ្ញវត្ថុ និងធនាគារ ម្ហូបអាហារ និងភេសជ្ជៈ ពាណិជ្ជកម្ម និងវិស័យជាច្រើនទៀត៕ photoS Hong Menea, Ministry of Information and Prime Minister Hun Sen’s Facebook