.jpg)
ផ្សារមូលបត្រកម្ពុជា (ផមក) កាលពីថ្ងៃទី ២២ ខែកុម្ភៈបានប្រារព្ធពិធីសម្ពោធដាក់ឱ្យដំណើរការបឋមនូវកម្មវិធីទូរស័ព្ទ ស៊ី អេស អ៊ិក ត្រេដ (CSX Trade) គឺជាវេទិការសម្រាប់ជួញដូរមូលបត្រដែលបានចុះបញ្ជីនៅ ផមក ហើយវាគឺជាការធ្វើទំនើបកម្មនៃប្រព័ន្ធជួញដូរចល័តបច្ចុប្បន្ន (MTS) និងមានលក្ខណៈជាគេហទំព័រ(Web-based) មកជាកម្មវិធីទូរស័ព្ទដែលដំណើរការបានទាំងនៅក្នុងប្រព័ន្ធប្រតិបត្តិការ iOS និង Android។ កម្មវិធីទូរស័ព្ទនេះត្រូវបានអភិវឌ្ឍឡើងទាំងស្រុងដោយក្រុមការងារបច្ចេកទេសផ្ទាល់របស់ ផមក ហើយតាមរយៈកម្មវិធីទូរស័ព្ទនេះ វិនិយោគិនអាចដាក់បញ្ជាទិញលក់មូលបត្រ ពិនិត្យមើលប្រតិបត្តិការមូលបត្រ ត្រូតពិនិត្យសមតុល្យមូលបត្រ និងសាច់ប្រាក់ ក៏ដូចជាការពិនិត្យមើលទិន្នន័យទីផ្សារ ព័ត៌មានក្រុមហ៊ុនចុះបញ្ជី និងព័ត៌មានទីផ្សារជាច្រើនទៀត។ ដើម្បីប្រើប្រាស់ប្រពន្ធ័នេះ វិនិយោគិនត្រូវមានគណនីជួញដូរនៅក្រុមហ៊ុនមូលបត្រណាមួយ ដែលជាសមាជិករបស់ផមក រួចដោនឡូតកម្មវិធីនេះតាមរយៈ App Store ឬ Google Play រួចចុចទៅលើ «ស្នើដំណើរការគណនី» ក្នុងកម្មវិធីនេះ និងអនុវត្តតាមការណែនាំ។ កម្មវិធីនេះដាក់ឱ្យប្រើប្រាស់ដោយឥតគិតថ្លៃក្នុងអំឡុងពេលនៃការដាក់ឱ្យដំណើរការបឋមចាប់ពីថ្ងៃទី ២២ ខែកុម្ភៈតទៅ រហូតដល់មានការជូនដំណឹងនៅពេលក្រោយ។ ពិធីនោះទទួលបានការអញ្ជើញចូលរួមក្រោមអធិបតីភាពរបស់ ឯកឧត្តម សៀង ធីរិទ្ធិ អគ្គនាយករងនៃនិយ័តករមូលបត្រកម្ពុជា តំណាងដ៏ខ្ពស់ខ្ពស់របស់ ឯកឧត្តម ស៊ូ សុជាតិ អគ្គនាយកនៃនិយ័តករមូលបត្រកម្ពុជា និងភាគីពាក់ព័ន្ធជាច្រើនរូបទៀត៕ photo sUPPLIED
