Pleng Music Awards 2022 បានបង្កើតពានរង្វាន់ពិសេសមួយ ដែលមានឈ្មោះថា «អ្នកបង្កើតមាតិកាប្រចាំឆ្នាំ២០២២»។ ពានរង្វាន់នេះបង្កើតឡើងក្នុងគោលបំណងសប្បុរសធម៌ ដែលមានន័យថា សាធារណជនអាចបោះឆ្នោតឱ្យអ្នកបង្កើតមាតិកាក្នុងបណ្ដាញសង្គម ដែលលោកអ្នកពេញចិត្ត ហើយក្រុមហ៊ុន Smart Axiata នឹងបរិច្ចាគ ២ ដុល្លារសម្រាប់ការបោះឆ្នោតនីមួយៗ ដោយ ១ ដុល្លារនឹងបរិច្ចាគដល់មូលនិធិគន្ធបុប្ផាកម្ពុជា និង ១ ដុល្លារទៀតបរិច្ចាគដល់មន្ទីរពេទ្យកុមារអង្គរ។ ចំនួនទឹកប្រាក់នៃការបរិច្ចាគនឹងត្រូវបានកំណត់ត្រឹម ១០០ ០០០ដុល្លារអាមេរិក ដែលជាចំនួនមូលនិធិអតិបរមា។ បេក្ខជន ១០ នាក់ ក្នុងចំណោម ២៨នាក់នឹងត្រូវបានជ្រើសរើសពីចំនួនសន្លឹកឆ្នោតចាប់ពីថ្ងៃទី១០ ខែមីនា រហូតដល់ថ្ងៃទី១៨ ខែមីនា ហើយនឹងបន្តបោះឆ្នោតរហូតដល់ថ្ងៃទី១៩ ខែមីនា ដើម្បីស្វែងរកអ្នកឈ្នះ ហើយលោកអ្នកក៏អាចចូលរួមបោះឆ្នោតបានតាមរយៈ https://pma.pleng.com.kh/ ផងដែរ។
Pleng Music Awards ត្រូវបានបង្កើតឡើងក្នុងគោលបំណងគាំទ្រ លើកទឹកចិត្ត និងអបអរសាទរ ស្នាដៃរបស់តារាចម្រៀង និងអ្នកនិពន្ធខ្មែរ ដែលមានបទចម្រៀងនៅក្នុងកម្មវិធី Pleng។ គំនិតផ្តួចផ្តើមនេះគឺជាជំហានឆ្ពោះទៅមុខមួយទៀតសម្រាប់មនុស្សគ្រប់គ្នានៅក្នុងឧស្សាហកម្មតន្ត្រីនៅក្នុងព្រះរាជាណាចក្រកម្ពុជា។ Pleng មានបំណងលើកទឹកចិត្តសិល្បករជំនាន់ក្រោយឱ្យមានការច្នៃប្រឌិត និងបង្កើតចម្រៀងដ៏អស្ចារ្យ។ សូមកុំភ្លេចរង់ចាំទស្សនាការផ្សាយផ្ទាល់ការប្រគំតន្ត្រីនៅលើ Facebook Smart Axiata និង Pleng នៅថ្ងៃទី១៩ ខែមីនា ឆ្នាំ២០២២ វេលាម៉ោង ៥:១៥ល្ងាច៕