ប្រតិបត្តិករទូរគមនាគមន៍ឈានមុខគេមួយ គឺក្រុមហ៊ុន មិត្ត ហ្វូន បានចូលរួមអបអរសាទរ និងស្វាគមន៍បុណ្យចូលឆ្នាំថ្មីប្រពៃណីជាតិខ្មែរ តាមរយៈការធ្វើទស្សនកិច្ចនៅទីស្នាក់ការរបស់កាសែតភ្នំពេញប៉ុស្តិ៍ កាលពីថ្ងៃពុធកន្លងទៅ។ ក្នុងអំឡុងពេលបំពេញទស្សនកិច្ចនេះ អគ្គនាយករងក្រុមហ៊ុនមិត្តហ្វូន លោក Cao Manh Duc និងសហការីរបស់លោកបានជួបពិភាក្សា និងសម្តែងការគួរសមជាមួយបុគ្គលិកជាន់ខ្ពស់របស់កាសែតភ្នំពេញប៉ុស្តិ៍ អំពីការពង្រឹងប្រព័ន្ធផ្សព្វផ្សាយ និងទំនាក់ទំនងសាជីវកម្ម។ លោក Manh Duc បានមានប្រសាសន៍ថាមិត្តហ្វូនបានប្រតិបត្តិការនៅក្នុងប្រទេសកម្ពុជាអស់រយៈពេល ២ ទសវត្សរ៍មកហើយ ហើយចាប់តាំងពីពេលនោះមកបានចំណាយប្រហែល ៨៩៩ លានដុល្លារ សម្រាប់គម្រោង CSR និងមានគម្រោងចំណាយ ១០០ លានដុល្លារទៀតនៅក្នុងឆ្នាំនេះ។ ក្រុមហ៊ុនមិត្តហ្វូនមានហេដ្ឋារចនាសម្ព័ន្ធបណ្តាញដ៏ធំបំផុត ដែលបម្រើអតិថិជនប្រមាណ ៩ លាននាក់នៅទូទាំងព្រះរាជាណាចក្រកម្ពុជា និងបានដាក់ឱ្យដំណើរការប្រព័ន្ធ SIS Cambodia ដែលជាវេទិកាអប់រំឌីជីថល នៅក្នុងយុគឌីជីថលនេះ៕ photo hean rangsey