កិច្ចប្រជុំក្រុមប្រឹក្សាសហព័ន្ធកីឡាអាស៊ីអាគ្នេយ៍ (SEAGF) ត្រូវបានប្រារព្ធធ្វើឡើងនៅខេត្តសៀមរាប ចាប់ពីថ្ងៃទី ៨ ដល់ ១០ ខែមេសា ដែលមានការចូលរួមពីមន្ត្រីកីឡាកំពូលៗមកពីប្រទេសពាក់ព័ន្ធនានា។ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ និងជាសហប្រធាន SEAGF រួមនឹងឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធាន NOCC ក៏មានវត្តមាននៅក្នុងកិច្ចប្រជុំនោះដែរ។
កិច្ចប្រជុំក្រុមប្រឹក្សា SEAGF-Council បានបញ្ជាក់ថា កីឡាគុនល្បុក្កតោនឹងស្ថិតនៅក្នុងចំណោម ៤០ ប្រភេទកីឡា ដែលនឹងដាក់បញ្ចូលក្នុងការប្រកួតកីឡាស៊ីហ្គេមលើកទី ៣២ នៅកម្ពុជានៅឆ្នាំក្រោយ។ ប្រទេសកម្ពុជានឹងធ្វើម្ចាស់ផ្ទះព្រឹត្តិការណ៍កីឡាអាស៊ីអាគ្នេយ៍លើកទី ៣២ និងអាស៊ានប៉ារ៉ាហ្គេម លើកទី ១២ (Cambodia 2023) ជាលើកដំបូងជាមួយពាក្យស្លោក «កីឡារស់ក្នុងសន្តិភាព»។
នៅក្នុងកិច្ចប្រជុំនោះ ផលប៉ះពាល់បរិស្ថានក្នុងការរៀបចំព្រឹត្តិការណ៍កីឡា និងប្រភេទកីឡាមួយចំនួនដែលអាចប៉ះដល់ដល់បរិស្ថាន ក៏ត្រូវបានលើកយកមកពិភាក្សាផងដែរ។ ទាំងការប្រកួតកីឡាស៊ីហ្គេម និងអាស៊ានប៉ារ៉ាហ្គេម ឥឡូវនេះនឹងក្លាយជាផ្នែកមួយនៃគំនិតផ្តួចផ្តើមបៃតងដែលត្រូវបានអនុម័តដោយ CAMSOC។
អំឡុងកិច្ចប្រជុំរយៈពេល ៣ ថ្ងៃនោះ មន្ត្រីពាក់ព័ន្ធបានពិភាក្សាអំពីបញ្ហានានាទាក់ទងនឹងព្រឹត្តិការណ៍ប្រកួតកីឡាចម្រុះក្នុងតំបន់ដ៏ធំមួយនេះ ដែលមានអ្នកចូលរួមមកពី ១១ ប្រទេសក្នុងតំបន់អាស៊ីអាគ្នេយ៍។ ព្រឹត្តិការណ៍កីឡាអាស៊ីអាគ្នេយ៍ឆ្នាំ ២០២៣ នឹងចាប់ផ្តើមនៅថ្ងៃទី ៥ ខែឧសភា៕ photos SUPPLIED