ឯកឧត្តមបណ្ឌិត ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក កាលពីល្ងាចថ្ងៃទី ១០ ខែមេសា ឆ្នាំ ២០២២ បានអញ្ជើញជាអធិបតីក្នុងកម្មវិធី «ពិសាអាហារស្រាយបួសខែរ៉ាម៉ាដន ជាមួយយុវជនខ្មែរអ៊ិស្លាម លើកទី ១ ឆ្នាំ ២០២២» រួមជាមួយថ្នាក់ដឹកនាំ និងប្រជាពលរដ្ឋសាសនិកខ្មែរអ៊ិស្លាមកម្ពុជាជាច្រើនរូបទៀត។ កម្មវិធីពិសាអាហារស្រាយបួសខែរ៉ាម៉ាដន ជាមួយយុវជនខ្មែរអ៊ិស្លាម ឆ្នាំ ២០២២ នេះ គឺជាការរៀបចំឡើងជាលើកដំបូងក្នុងការជួបជុំជាមួយយុវជនខ្មែរអ៊ិស្លាម នាខែរ៉ាម៉ាដន។ ចំណែកកម្មវិធីជួបជុំស្រាយបួស ខែរ៉ាម៉ាដនទ្រង់ទ្រាយធំថ្នាក់ជាតិ ដែលមានការចូលរួមពីបងប្អូនខ្មែរអ៊ិស្លាមទូទៅ គឺតែងតែមានវត្តមានដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាចូលរួមពិសាអាហារស្រាយបួសជាមួយប្រជាពលរដ្ឋសាសនិកខ្មែរអ៊ិស្លាមជារៀងរាល់ឆ្នាំ ប៉ុន្តែដោយសារបញ្ហាការរាតត្បាតនៃជំងឺកូវីដ ១៩ កម្មវិធីស្រាយបួសថ្នាក់ជាតិនេះត្រូវបានខកខានប្រារព្ធធ្វើអស់រយៈពេល ២ ឆ្នាំមកហើយ៕ photoS YOUSOS aPDOULRASHIM