ភ្នំពេញ ប៉ុស្ដិ៍ | យុទ្ធនាការ «ឆ្លុះបញ្ចាំងពីអត្តសញ្ញាណយើង» របស់ស្រាបៀរអង្គរជួយលើកកម្ពស់ក្រមាដែលជាអត្តសញ្ញាណខ្មែរ

❮ ❯

ក្រមាគឺជាសម្លៀកបំពាក់ប្រពៃណី និងជាអត្តសញ្ញាណខ្មែរជាយូរលង់ណាស់មកហើយ ទើបក្រុមហ៊ុន ខេមប្រ៊ូវ សម្រេចជ្រើសរើសក្រមាខ្មែរ ជាអត្តសញ្ញាណជាតិមួយក្នុងចំណោម ៤ ដែលត្រូវបានរំលេចឡើងសម្រាប់យុទ្ធនាការរបស់ស្រាបៀរអង្គរ ដែលមានឈ្មោះថា «ឆ្លុះបញ្ចាំងពីអត្តសញ្ញាណយើង» របស់ខ្លួន។

ដោយសារ ក្រមា ជាផ្នែកមួយដ៏សំខាន់នៃវប្បធម៌ខ្មែរនេះហើយទើបបានជាកាលពីថ្ងៃទី ០១ ខែកក្កដា ឆ្នាំ ២០១៨ កន្លងទៅក្រមារបស់ព្រះរាជាណាចក្រអច្ឆរិយៈមួយនេះ ដែលមានប្រវែងរហូតដល់ទៅជាង ១០០០ ម៉ែត្រឯណោះបានបំបែកកំណត់ត្រាពិភពលោក ក្លាយជាក្រមាដែលវែងជាងគេក្នុងពិភពលោករបស់ Guinness Book of World Records។

លោក សោម ច័ន្ទណារ៉ាត អ្នកគ្រប់គ្រងម៉ាកផលិតផលស្រាបៀរអង្គរបានលើកឡើងថា៖ «ក្រមាគឺជាសម្លៀកបំពាក់ប្រពៃណីខ្មែរដ៏មានតម្លៃដែលបង្ហាញពីអត្តសញ្ញាណវប្បធម៌ជាតិរបស់យើង។ វាជានិមិត្តរូបជាតិមួយ ដោយសារតែមានរឿងរ៉ាវជាច្រើននៅពីក្រោយវា។ ក្រមា បានផ្តល់ផលប្រយោជន៍ជាច្រើនដូចជា៖ អាចបង់ ឬរុំក ធ្វើជាអង្រឹងឱ្យទារកគេង ឬជាភួយសម្រាប់ដណ្តប់ជាដើម។ សម្រាប់ប្រជាជនកម្ពុជាយើងវិញក្រមាជានិមិត្តរូបនៃភាពរឹងមាំ ភាពធន់ និងការរស់រានមានជីវិត»។

ក្រៅពីជាអត្តសញ្ញាណខ្មែរក្រមាត្រូវបានប្រើជាវត្ថុអនុស្សាវរីយ៍ ឬជាគ្រឿងតុបតែងលម្អផ្សេងៗ។ តាមភោជនីយដ្ឋានខ្លះ គេប្រើវាជាកម្រាលតុ ឬជាវាំងននបង្អួច ដើម្បីបង្កើនសោភ័ណភាពនៅក្នុងហាង ជាពិសេសគឺបង្ហាញពីភាពជាខ្មែរ ហើយក្រមាក៏ត្រូវបានច្នៃជាសម្លៀកបំពាក់ កាបូប ឬរចនាជាគ្រឿងសម្ភារផ្សេងៗផងដែរ។

លោក ច័ន្ទណារ៉ាត បញ្ជាក់បន្ថែមថា «យើងចង់លើកស្ទួយក្រមាក្នុងចំណោមយុវជនខ្មែរជំនាន់ក្រោយរបស់យើង។ ដូច្នេះ តាមរយៈយុទ្ធនាការ «ឆ្លុះបញ្ចាំងពីអត្តសញ្ញាណយើង» របស់ស្រាបៀរអង្គរ នេះ យើងសង្ឃឹមថានឹងបានឃើញមនុស្សគ្រប់គ្នាស្រឡាញ់ ថែរក្សា និងប្រើក្រមាជាក់ជាមិនខានឡើយ។ វាជានិមិត្តរូបនៃមោទកភាពជាតិរបស់យើង។ ក្រមាជារបស់ខ្មែរពិតៗ។ ក្រមាយើង អត្តសញ្ញាណយើង»។

ផលិតដំបូងក្នុងឆ្នាំ ១៩៩២ ស្រាបៀរអង្គរ គឺជាផលិតផលកំពូលមួយរបស់ក្រុមហ៊ុន ខេមប្រ៊ូវ។ ឆ្លងកាត់បទពិសោធន៍ជាច្រើនទស្សវត្ស ស្រាបៀរអង្គរ តែងតែបង្ហាញពីការប្តេជ្ញាចិត្តខ្ពស់ក្នុងការផលិតស្រាបៀរល្អបំផុត ដើម្បីឆ្លើយតបទៅនឹងចំណង់ចំណូលចិត្ត ភាពច្នៃប្រឌិត និងការផ្តល់នូវបទពិសោធន៍ស្រាបៀរដ៏អស្ចារ្យសម្រាប់អតិថិជនរបស់ខ្លួន។

ស្រាបៀរអង្គរ ត្រូវបានផលិតឡើងដោយប្រើគ្រឿងផ្សំដ៏ល្អឥតខ្ចោះដែលនាំចូលពីអឺរ៉ុប និងផលិតតាមស្តង់ដាររបស់ក្រុមហ៊ុនកាស្ប៊ែរគ្រុប ដោយប្រើបច្ចេកវិទ្យាចុងក្រោយបង្អស់ និងរក្សាបាននូវរសជាតិដើមរបស់ខ្មែរកាន់តែឆ្ងាញ់ស្របតាមតម្រូវការរបស់អតិថិជនខ្មែរនាពេលបច្ចុប្បន្ន៕

ពិសាគ្រឿងស្រវឹង សូមកុំបើកបរ!