ស្ថានទូតអូស្ត្រាលីនៅក្នុងទីក្រុងភ្នំពេញ កាលពីថ្ងៃព្រហស្បតិ៍កន្លងទៅ បានរៀបចំការតាំងពិព័រណ៍រូបថត ដើម្បីរំឭកខួបលើកទី ៣០ ឆ្នាំនៃបេសកកម្មថែរក្សាសន្តិភាពរបស់អង្គការសហប្រជាជាតិនៅកម្ពុជា ហៅកាត់ថា អ៊ុនតាក់ (UNTAC) នៅសណ្ឋាគារ Raffles Hotel Le Royal ក្រុងភ្នំពេញ។ អតីតមេបញ្ជាការកងកម្លាំងអ៊ុនតាក់ គឺឧត្តមសេនីយ៍ឯក John Murray Sanderson បានអញ្ជើញជាអធិបតីនៅក្នុងពិធីតាំងពិព័រណ៍រូបថតនេះ ដែលបើកជូនសាធារណជន ចាប់ពីថ្ងៃទី ២៩ ខែមេសា រហូតដល់ថ្ងៃទី ២៨ ខែឧសភា។ ការតាំងពិព័រណ៍រូបថតនេះ ក៏ទទួលបានការគាំទ្រពីមជ្ឈមណ្ឌលសិក្សាបណ្តុះបណ្តាលកសាងសន្តិភាព និងវិទ្យាស្ថានចក្ខុវិស័យអាស៊ីផងដែរ។ ឧត្តមសេនីយ៍ឯក John Murray Sanderson អញ្ជើញមកបំពេញទស្សនកិច្ចនៅកម្ពុជា ដើម្បីប្រារព្ធខួបលើកទី ៣០ ឆ្នាំ នៃអ៊ុនតាក់ និងជាផ្នែកមួយនៃខួបលើកទី ៧០ ឆ្នាំនៃទំនាក់ទំនងការទូតរវាងអូស្ត្រាលី និងកម្ពុជា៕ photo Supplied