សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបតីក្នុងពិធីបើកសម្ពោធជាផ្លូវការនៃរោងចក្រផលិតចំណីអាហាររបស់ក្រុមហ៊ុន ស៊ី.ភី កាលពីថ្ងៃព្រហស្បតិ៍សប្តាហ៍មុន ខណៈក្រុមហ៊ុនកសិឧស្សាហកម្ម និងអាហារឈានមុខគេមួយនេះ បានពង្រីកនៅទូទាំងព្រះរាជាណាចក្រកម្ពុជា ដែលនាំមកនូវស្តង់ដាអនាម័យខ្ពស់បំផុត។ អញ្ជើញចូលរួមក្នុងពិធីសម្ពោធរោងចក្រកែច្នៃចំណីអាហារនេះផងដែរ គឺឯកឧត្តម ម៉ៅ ធនិន អភិបាលខេត្តកំពត លោក Wittaya Kreangkriwit ក្រុមប្រឹក្សាភិបាលរងជាន់ខ្ពស់នៃក្រុមហ៊ុន ស៊ី.ភី ខេមបូឌាចំកាត់ និងឯកឧត្តម Panyarak Poolthup ឯកអគ្គរាជទូតនៃព្រះរាជាណាចក្រថៃប្រចាំកម្ពុជា ព្រមទាំងឥស្សរជន និងភ្ញៀវកិត្តិយសជាច្រើនរូបទៀត។ សម្ដេចក្រឡាហោម ស ខេង បានកោតសរសើរចំពោះការបង្កើតរោងចក្រកែច្នៃចំណីអាហារតម្លៃ ៥ លានដុល្លារនេះ ស្ថិតក្នុងឃុំជម្ពូវ័ន ស្រុកជុំគិរី ខេត្តកំពត ដែលមានទំហំ ៥ ហិកតា សម្រាប់ផ្គត់ផ្គង់អាហារដែលមានគុណភាព ស្រស់ និងមានអនាម័យដល់ទីផ្សារកម្ពុជា និងជួយបង្កើតការងារ និងគាំទ្រសន្តិសុខស្បៀង៕ រូបថត ហេង ជីវ័ន