ក្រុមហ៊ុន Smart Axiata ដែលជាប្រតិបត្តិករទូរស័ព្ទចល័តឈានមុខគេនៅកម្ពុជា កំពុងសហការជាមួយធនាគារ អេស៊ីលីដា ដែលជាគ្រឹះស្ថានហិរញ្ញវត្ថុដ៏ល្បីមួយរបស់កម្ពុជា ដើម្បីផ្តល់ជម្រើសទូទាត់បន្ថែម ដែលអនុញ្ញាតឱ្យអតិថិជនធ្វើប្រតិបត្តិការឌីជីថលបានយ៉ាងឆាប់រហ័ស និងប្រកបដោយសុវត្ថិភាព។
លោក Feiruz Ikhwan នាយកប្រតិបត្តិស្តីទីរបស់ក្រុមហ៊ុន Smart Axiata មានប្រសាសន៍ថា៖ «ការផ្តោតជាចម្បងរបស់ក្រុមហ៊ុន Smart Axiata គឺជំរុញឌីជីថលនីយកម្មនៅកម្ពុជា សម្រាប់អតិថិជន ដៃគូ និងឧស្សាហកម្មទាំងអស់។ យើងកំពុងផ្តល់ជូនអតិថិជនរបស់យើងនូវជម្រើសកាន់តែច្រើន និងកាន់តែមានភាពងាយស្រួល តាមរយៈការបន្ថែមធនាគារ អេស៊ីលីដា ទៅក្នុងជម្រើសទូទាត់របស់យើង»។
ភាពជាដៃគូថ្មីនេះនឹងអាចឱ្យអតិថិជន និងដៃគូរបស់ក្រុមហ៊ុន Smart Axiata និងធនាគារ អេស៊ីលីដា ធ្វើប្រតិបត្តិការហិរញ្ញវត្ថុជាច្រើនតាមរយៈគណនីរបស់ធនាគារ អេស៊ីលីដា របស់ពួកគេ និងរីករាយជាមួយអត្ថប្រយោជន៍ជាច្រើនទៀត។
ក្នុងនោះរួមមានអតិថិជនរបស់ក្រុមហ៊ុន Smart Axiata នឹងអាចទិញលេខទូរស័ព្ទពិសេសនៅក្នុងគេហទំព័រ GetMyNumber និងទទួលបានជា eSIM ហើយទូទាត់តាមរយៈគណនីធនាគារ អេស៊ីលីដា របស់ខ្លួន។
អតិថិជន Postpaid របស់ក្រុមហ៊ុន Smart Axiata នឹងមានជម្រើសបន្ថែមក្នុងការទូទាត់វិក្កយបត្រប្រចាំខែ តាមរយៈគណនីធនាគារ អេស៊ីលីដា របស់ពួកគេនៅក្នុងគេហទំព័រ PayMyBill។
ដៃគូ និងអ្នកចែកចាយរបស់ក្រុមហ៊ុន Smart Axiata នៅទូទាំងប្រទេសនឹងអាចធ្វើប្រតិបត្តិការទិញ និងទូទាត់នៅក្នុងកម្មវិធី Dealer App តាមរយៈគណនីធនាគារ អេស៊ីលីដា។
លោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានមានប្រសាសន៍ថា៖ «ក្នុងនាមជាស្ថាប័នហិរញ្ញវត្ថុដ៏ល្បីមួយនៅកម្ពុជា គឺពិតជាមានកិត្តិយស ដែលបានចាប់ដៃគូសហការគ្នាជាមួយប្រតិបត្តិករទូរស័ព្ទកំពូលមួយនៅក្នុងប្រទេសគឺក្រុមហ៊ុន Smart Axiata»។
លោកបណ្ឌិតបន្ថែមថា៖ «តាមរយៈការរួមសហការនេះ យើងនឹងធ្វើឱ្យដំណោះស្រាយទូទាត់តាមប្រព័ន្ធអេឡិចត្រូនិកកាន់តែងាយស្រួល និងមានសុវត្ថិភាពខ្ពស់ដល់អ្នកប្រើប្រាស់ ដែលមានចំនួនកាន់តែច្រើនឡើងនៅក្នុងព្រះរាជាណាចក្រកម្ពុជា»។
ការដាក់ធនាគារ អេស៊ីលីដា បញ្ចូលជាជម្រើសទូទាត់នៅទូទាំងបណ្តាញឌីជីថលរបស់ក្រុមហ៊ុន Smart Axiata គឺជាការបោះជំហានមួយទៀតឆ្ពោះទៅរកការធ្វើឌីជីថលនីយកម្មបទពិសោធរបស់អតិថិជន និងផ្តល់ដំណោះស្រាយដ៏ឆាប់រហ័ស និងគួរឱ្យទុកចិត្តបានសម្រាប់ពួកគេ និងដៃគូរបស់ក្រុមហ៊ុន Smart Axiata។
ជាមួយគ្នានេះដែរ វាគឺជាផ្នែកមួយនៃយុទ្ធនាការរបស់ក្រុមហ៊ុន Smart Axiata ដើម្បីលើកទឹកចិត្តឱ្យមានការប្រើប្រាស់ដំណោះស្រាយឌីជីថល កម្មវិធីប្រូម៉ូសិន បញ្ចូលលុយតាម អ៊ី ថប់អាប់ ហើយឈ្នះ (E-Top Up to WIN) របស់ក្រុមហ៊ុន Smart Axiata ផ្តល់ជូនរង្វាន់ដល់អតិថិជនរាល់ពេលដែលពួកគេបញ្ចូលទឹកប្រាក់តាមអេឡិចត្រូនិក៕ photos SUPPLIED